VOV4.Jarai - Tơlơi duam pơđung drah ƀơi tơring čar Daklak glăk ngă tơnap, mrô mơnuih ruă kraih hăng djai đi lu, Sang ia jrao prong kual Dăp Kơdư amra rơniă

Tơdơi kơ 6 hrơi duam ƀu thâo yŭ ngŏ yua kơ tơlơi ruă duam pơđung drah, yă Mạc Thị Pun, tơkeng thun 1955, ƀơi plơi Êa Krăi, să Dliê Ya, tơring glông Krông Năng, phrâo hơdor glăi. Ñu ruai glăi, lơ 9/8 ñu pơ-iă drơi jăn, ruă hrŏm hrah amăng drơi jăn anun mơnuih amăng sang ñu ba nao pơ̆ sang ia jrao tơring glông pel ĕp lăng. Tơdơi kơ dua hrơi đih sang ia jrao, ƀơi hlung ƀuh brop hăng hlăk hluai ƀu thâo yŭ ngŏ dong tah, ñu dưi ba nao pơ̆ Sang ia jrao prong Dăp Kơdư:

“Rơđah biă ñu lĕ gơñu ba nao pơ̆ sang ia jrao laih, gơñu ba kâo rai pơ̆ anai ƀu thâo hơdor hơget dong tah. Ră anai dô̆ ruă amăng hlung anai đôč, suă jua ăt dưi mơn, tơlơi suaih pral ƀơƀrư̆ hơkrŭ glăi laih. Mơng hrơi tom brơi truh ră anai mơhao mơñum ia huă asơi. Ră anai bơni kơ ơi ia jrao biă hmâo pơjrao brơi laih kơ kâo hơdip glăi”.

Yă Mạc Thị Pun hmâo tơtlaih djai tơdơi kơ 8 hrơi pơjrao klă ƀơi Sang ia jrao

Ƀơi giăm sưng đih mơng yă Mạc Thị Pun, yă H’ Nhét Ƀuôn Tô, ƀơi să Ea Tua, tơring glông Čư̆ Kuiñ, kơđiăng pơkra glăi tơngan glăk jur jrao kơ ană đah rơkơi lĕ Y Hông Ƀuôn Tô. Yă H’ Nhét brơi thâo, Y Hông hmâo tơlơi ruă drah hlai mơng muai. Năng ai ñu 10 hrơi hlâo, ƀuh ană ñu duam, ruă čroh kian, ñu ba nao pơ̆ Sang ia jrao prong kual Dăp Kơdư. Tơdơi kơ sa rơwang hrơi tơjuh pơjrao klă, truh ră anai tơlơi suaih pral mơng Y Hông hơkrŭ glăi ƀơƀrư̆ laih. Yă H’ Nhét lăi:

“Duam pơ-iă drơi đơi, 3 hrơi pơkă lăng mơng 38-39, pơ-iă hơnong tui anun ƀu trun ôh. Ƀuh nô anet nao mơñă tơbiă leng kơ drah, ƀuh drah ană kâo djai hngol amĭ hlong djai hngol mơn. Huĭ rơhyư̆t biă, tơdah ta ƀu thâo tañ thơ ruăi kraih thơ, amra ba truh kơ djai mơtăm”.

Ayong Y Hông Ƀuôn Tô glăk jur drah pioh pơjrao duam pơđung drah

Ơi ia jrao H’ Noen H’đơk, mă bruă ƀơi Anom pơjrao tơlơi ruă tưp Sang ia jrao prong kual Dăp Kơdư brơi thâo, ră anai anom glăk pơjrao brơi giăm truh kơ 100 čô mơnuih ruă duam pơđung drah.

“Đih ƀơi anom pơjrao anai lu ñu lĕ hơdôm mơnuih duam pơđung drah dengue hmâo gru nam amra kơañhăk; bơ̆ hơdôm mơnuih ruă hmâo kơañăk rai pơ̆ anai pô anun kâo pơkă brơi tlâ̆o jrao pơgăn kơañăk. Tơdơi kơ 2 mông kâo pơsit glăi pô ruă tơtlaih kơañăk anun kah mơng pơjrao ƀơi anai, bơ̆ tơdah pô ruă ăt ƀu tơtlaih kơañăk mơn lĕ ba nao pơ̆ anih hơkrŭ glăi pran jua klă hlâo. Mơng akô̆ blan 8 truh ră anai ăt ba nao mơn 5 čô laih”.

Tui hăng ơi ia jrao Phạm Hồng Lâm, Khua Anom pơjrao tơlơi ruă tưp Sang ia jrao prong kual Dăp Kơdư, mơng akô̆ thun truh ră anai, anom hmâo tŭ mă hăng pơjrao brơi rơbêh kơ 800 čô mơnuih duăm pơđung drah. Lăp đing nao, mrô mơnuih ruă kraih đĭ lu mơng akô̆ blan 8 truh ră anai. Pô ruă hmâo arăng ba nao pơ̆ sang ia jrao đĭ lu ngă bruă pel ĕp pơjrao tơlơi ruă lu rơgao hơnong:

“Biă ñu thun anai mrô mơnuih kơañăk lu biă. Ƀơi anăp mrô mơnuih ruă lu hăng lu djuai tơlơi ruă hă Sang ia jrao ăt bưp lu tơlơi tơnap mơn. Biă ñu amăng mơnuih mă bruă dô̆ kơƀah, ră anai ƀing gơmơi dưi iâu đĭ dong 3 čô mơnuih điều dưỡng, 2 čô ơi ia jrao hơdôm anom pơjrao pơkon lĕ abih bang mơng 20 truh 22 čô mơnuih, djru bruă djơ̆ anô̆ ñu truh 150 čô mơnuih ruă, sa čô khom mă bruă dưm kơnar hăng 3 čô, mrô sưng mơnuih ruă hăng anih pơjrao ăt abih mơn, đa lĕ khom dưm sưng ƀơi glông jơlan rô nao rai, khom đih sưng lŏp”.

Ơi Hoàng Hải Phúc, Kơ-iăng Khua gơgrong bruă Anom wai lăng tơlơi duam ruă tơring čar Daklak, brơi thâo, duam pơđung drah ƀơi tơring čar glăk ngă tơnap biă hăng tơnap him lăng. Yap truh lơ 16/8, đơ đam tơring čar hmâo čih pioh giăm 3.500 čô mơnuih duam pơđung drah, 5 čô mơnuih djai. Pơkă lăng hlâo klin ngă kơtang amăng rơnuč blan 8 hăng blan 9, tơlơi anai amra ba truh lu rơgao hơnong ƀơi hơdôm bôh sang ia jrao. Ơi Hoàng Hải Phúc pơtă, kiăng plai ƀiă tơlơi mơnuih ruă kraih khom ba nao sang ia jrao, yôm phăn hloh lĕ tơlơi pơmin mơn mơnuih ƀôn sang amăng bruă rơnăk anih anom dô̆, pơgang bĕ keč kĕ. Lom duam khom nao mơtăm pơ̆ hơdôm bôh anih anom ia jrao kiăng pel ĕp hăng pơjrao:

 “Hăng bruă mă lĕ Ƀirô pơphô bruă kơ Gơnong bruă ia jrao kiăng Jơnum min mă yua hơdôm hră pơ-ar črâo ba samơ̆ lu anih anom, lu anom bruă ăt ƀu đing nao mơn, akă pơphun bruă pơgang pơgăn duam pơđung drah mơn amăng hơdôm hrơi rơgao. Jơlan gah yôm phăn hloh ră anai lĕ khom lăi pơthâo, pơsur mơnuih ƀôn sang thâo hluh kơ anô̆ sat mơng klin ruă kiăng mơnuih ƀôn sang pơgang mă pô. Dua lĕ tơlơi mă bruă mơng jơnum min, gơnong bruă ƀơi plơi pla kiăng lăi pơthâo kơ mơnuih ƀôn sang khom ngă tui bruă agaih rơnăk anih anom dô̆ pơdjai bôh keč lăng kuăng ƀơi rim sang anô̆. Bruă mă anai dưi ngă tui na nao amra gah lui jơlan phun ba truh klin ruă”./.

            Nam Trang: Čih – Siu H’ Prăk: Pơblang