VOV4.Jarai - Amăng 1 blan laih rơgao, duam đung drah amăng tơring čar Gia Lai glăk ngă tơnap tap hăng mrô mơnuih duam đĭ lu tui. Ƀơi anăp kơ tơlơi sit nik anai, mơnuih ƀon sang, gong gai ƀon lan gum hrŏm hăng gơnong bruă ia jrao pok pơhai bruă pơgang, pơjrao brơi mơnuih duam đung drah.

Tơdơi kơ rơbêh ha wŏt hrơi tơjuh hơjan hlim, amai Pel, dŏ ƀơi plơi Phung, să Biển Hồ, plơi prong Pleiku hrŏm hăng abih bang mơnuih amăng sang anŏ rơmet pơagaih jum dar sang, pruih ia jrao pơdjai keč amoaih pioh pơgang kman duam đung drah. Amai Pel brơi thâo, anai lĕ bruă juăt ngă amăng sang anŏ mơng akŏ bơyan hơjan truh ră anai:

“Amăng sang anŏ aka ƀu hơmâo hlơi ôh duam đung drah, samơ̆ ƀing gơmơi ăt kiăng pơgang, khŏm rơmet pơagaih jum dar, amăng sang lơ̆m pit đih khŏm akă mông sơker, tơdah jum dar ƀuh ia pơkŏng khŏm tuh hĭ, rơmet pơagaih jum dar lan sang”.

Yă Đinh Thị Hoa, Kơ-iăng Khua Jơnum min mơnuih ƀon sang să Biển Hồ brơi thâo, dong mơng akŏ thun truh ră anai, amăng să ƀuh 15 anih ngă lar hyu duam đung drah ƀơi djop plơi pla ala ƀon hăng hơmâo rơbêh 20 čô mơnuih duam đung drah. Gong gai să ječ ameč hơmâo hơdôm hơdră kiăng guang dar hơdôm anih hơmâo kman, pơtô pơblang kiăng mơnuih ƀon sang rang kơđiăng amăng bruă pơgang duam đung drah.

“Tơdơi kơ ƀuh anih lar hyu kman, să hơmâo gum hrŏm hăng anom bruă ia jrao amăng plơi pla hrŏm hăng mơnuih ƀon sang hyu koh pơƀut glăi than kyâo, tuh săi hĭ hơdôm anih pơkŏng ia, pruih ia jrao ƀơi hơdôm anih amuñ ngă keč čeh čar. Laih dong git gai anom bruă ia jrao lăi pơthâo Anom bruă wai pơgang tơlơi duam ruă tơring čar Gia Lai kiăng kơ djru brơi ia jrao kiăng pruih pơgang ƀơi hơdôm anih lar hyu kman, pruih pơgang jum dar anun ataih 200 met yua anun ngă ngă kman lar hyu”.

Mơnuih ƀon sang Gia Lai pơgang duam đung drah hăng bruă anăm brơi pơkŏng lui ia

Tơring glông Ia Grai lĕ sa amăng hơdôm anih ƀuh kman duam đung drah lar hyu kơtang hloh amăng tơring čar Gia Lai hăng giăm 370 čô mơnuih duam đung drah amăng thun anai. Tui ơi Ngân Văn Thư, Khua anom bruă ia jrao tơring glông Ia Grai, ră anai anom bruă glăk pơjrao brơi 20 čô mơnuih, rĭm hrơi tŭ mă 5 čô mơnuih duam, lu hloh lĕ ƀing kông nhơn kuah kơsu.

“Anom bruă ăt pơphô bruă brơi khul git gai Jơnum min mơnuih ƀon sang tơring glông jak iâu djop anih anom gum hrŏm, pơphun lu tal abih bang mơnuih ƀon sang hyu rơmet pơagaih, pruih ia jrao pơjrao keč amoaih. Mă bruă amăng tơring glông lĕ ƀing kông nhơn mơng kông ti kơsu, hơdôm grup bơwih ƀong ƀơi anai, ƀơi hơdôm anih hơmâo kman ăt dŏ ƀuh lu keč amoaih, arŏng aroač. Sit biă ñu lĕ mŏng, gơnam kuah mă kơsu ăt dŏ. Thâo rơđah anŏ ngă lar hyu kman anom bruă hơmâo pơphô bruă, pơjing akŏ bruă, kơtưn amăng bruă pel ĕp, krăo lăng, pơtrut pơsur mơnuih ƀon sang pơgang anih dŏ hơdip jum dar, pruih ia jrao pơdjai keč”.

Tui Anom bruă wai pơgang tơlơi duam ruă tơring čar Gia Lai, abih bang mơnuih duam đung drah mơng akŏ thun truh ră anai truh pơ 2.821 čô ( Amăng anun, hơmâo 1 čô mơnuih djai). Kman duam đung drah ƀuh ƀơi 131/220 boh să, phường, tơring kual amăng djop tơring glông, plơi prong. Hơdôm anih hơmâo mơnuih duam đung drah lu anun lĕ Ia Grai, Ia Pa, Čư̆ Prông, Krông Pa, Čư̆ Pưh, Pleiku, Đăk Đoa…

Ơi Đinh Hà Nam, Kơ-iăng khua gơnong bruă ia jrao Gia Lai brơi thâo, hơmâo 3 amăng abih bang 4 djuai kman duam đung drah glăk lar hyu amăng tơring čar, anun lĕ DEN 1, DEN 2 hăng DEN 4. Yua anun amra dŏ ngă tơnap tap pơ anăp anai, him lăng kman lar hyu kơtang hloh amăng blan 8 hăng 9. Sit biă ñu, ƀing mơnuih ƀă djuai kman anai ăt amuñ ƀă djuai kman pơkŏn hăng amra ngă duam kơtang. Yua anun, mrô mơnuih duam đung drah amra ruă kraih hăng djai pơ anăp anai. Tui ơi Đinh Hà Nam, ƀơi anăp kơ tơlơi tơnap tap mơng duam đung drah, gơnong bruă ia jrao glăk tŏ ngă tui khut khăt hơdôm hơdră pơgang, prui ia jrao pơdjai keč ƀơi hơdôm kual ƀuh kman lar hyu; pơphun klă bruă tŭ mă, pơjrao brơi mơnuih duam đung drah kiăng kơ plai ƀiă  mơnuih duam đung drah amăng plơi pla. Rơmet pơagaih hĭ hơdôm anih amuñ ngă keč čeh čar, anai lĕ bruă hơdôm boh sang anŏ kiăng kơ ngă tui na nao tơdah kiăng pơgang pơgăn duam đung drah.

“Amăng tơring čar Gia Lai, tui hluai djuai kman ăt pơsit tong duam đung drah amuñ ruă kraih hăng djai pơ anăp anai lơ̆m kman lar hyu kơtang. Ayuh hyiăng hơjan hlim, ngă pơkŏng ia, tơlơi anai amuñ ngă keč čeh čar, duam đung drah lar hyu kơtang. Rơkâo djop ƀon lan pơphô bruă brơi khul git gai pơgang kman djop plơi pla pơtô pơblang, lăi pơthâo kơ bruă pơgang duam đung drah, ngă hiưm pă anăm brơi keč amoaih čeh čar, tơdah ƀing ta yua čeh kơthung dưm ia, ƀing ta kiăng klup hĭ sir hŭi kơ ngă keč čeh čar”.

Siu Đoan: Pơblang