Kiăng djru ba neh met wa ƀơi hơdôm boh plơi pla anai amăng bruă khăm pơjrao tơlơi ruă, Jơnum min mơnuih ƀon sang tơring čar Gia Lai hơmâo ngă hră pơtrun djru prăk pơhlôm nua ia jrao kơ hơdôm boh sang anŏ tơnap tap, mơnuih ƀon sang djuai ƀiă ƀơi tơring čar rơwang thun 2023-2025 laih anun pôr pơthâo lu hloh kiăng thâo hơdră djru hră pơhlôm nua ia jrao. Jơlan hơdră djru blung a hơmâo hơdôm boh tơring pok pơhai tŭ yua laih.

Yă Trần Thị Tuyết Hạnh dŏ ƀơi să Čư̆ An, tơring glông Đăk Pơ, Gia Lai jing sang anŏ tơnap tap kơtang biă mă. Rơkơi ñu hơmâo lu tơlơi ruă yơh, ană bă ñu hai ƀu hơmâo prăk djru mơn, anun yơh mah ƀu hơmâo pran jua, ñu ăt tơgŭ mơng mơmot, krong tơ̆ rơdah, hyu mă bruă ĕp prăk kăk. Mơng hrơi thâo sang anŏ ñu hơmâo anăn kơnuk kơna djru brơi hră pơhlôm nua ia jrao, yă Hạnh gir hyu čan ling, blơi brơi 5 čô mơnuih amăng sang ñu mơtăm.

“Sang kâo hơmâo 5 čô, lơ̆m aka ƀu hơmâo kơnuk kơna djru jing kâo blơi mơng ha čô đôč, ƀu anăm hơmâo prăk blơi brơi abih 5 čô ôh, samơ̆ ră anai ta blơi hră pơhlôm nua ia jrao hơmâo djru ba 40%, dŏ glăi 60% sang anŏ gơmơi ăt gir blơi brơi abih 5 čô hlao mơtăm. Yua dah amăng sang hơmâo rơkơi kâo ñu ruă kơtang hloh, ruă amăng 15 thun anai laih”.

Amai Đinh Thị Bước ăt jing sa amăng hơdôm boh sang anŏ rin ƀơi plơi Pơ Nang, să Tú An, plơi prong An Khê hơmâo djru blơi hră pơhlôm nua ia jrao. Amai Bước brơi thâo, sang anŏ ñu hơđong pran jua lơ̆m 6 čô mơnuih amăng sang ñu lêng kơ hơmâo hră pơhlôm nua ia jrao 100% kơnuk kơna ta djru. Bruă anai jing djru sang anŏ ñu plai ƀiă laih tơnap tap prăk kăk tơdah djơ̆ djuam duam ruă. Amai Bước lăi: “Hơmâo kơnuk kơna djru ba, sang anŏ gơmơi khin nao blơi hră pơhlôm nua kiăng abih bang suaih pral. Amăng sang anŏ, tha, čơđai rim wơ̆t nao khăm, pơjrao tơlơi ruă ƀơi sang ia jrao lêng kơ hơmâo arăng djru ba klă soh”.

Rơwang thun 2023-2025, rơngiao kơ prăk djru mơng Kơnuk kơna tui Tơlơi phiăn hră pơhlôm nua ia jrao jing tui Tơlơi pơtrun 48 mơng Khul khua jơnum min pơ ala mơnuih ƀon sang tơring čar Gia Lai, prăk tơring čar djru ba hơmâo 30% rơnoh prăk blơi hră pơhlôm nua hăng sang anŏ giăm rin, čơđai sang hră djuai ƀiă; djru ba 10% rơnoh prăl blơi hră pơhlôm nua ia jrao hăng sang anŏ ngă hmua, wai lăng đang glai, hyu mă akan bơwih ƀong găp ƀrô tui hăng tơlơi pơkă mơng Kơnuk kơna. Ngă tui tơlơi pơtrun anai, kơnong ƀơi plơi prong An Khê hơmâo djru ba giăm 16.000 čô mơnuih. Ơi Trịnh Duy Phước, Khua anom bruă prăk pơhlôm nua plơi prong An Khê, tơring čar Gia Lai brơi thâo, yap abih thun anai, An Khê amra hơmâo năng ai rơbêh 30.000 čô mơnuih hơmâo djru blơi hră pơhlôm nua ia jrao.

“Tơdơi kơ hơmâo tơlơi pơtrun mơng Jơnum min pơ ala mơnuih ƀon sang tơring čar, anom bruă hơmâo ngă hrŏm hăng Ping gah, Jơnum min mơnuih ƀon sang hơdôm boh să, phường ăt kah hăng hơdôm anom bruă bơdjơ̆ nao bruă iâu pơthưr mơnuih ƀon sang thâo rơđah tơlơi pơtrun mơng Ping gah hăng Kơnuk kơna. Anom bruă pơhlôm nua mơnuih mơnam ăt gum ngă hrŏm hăng hơdôm boh să, phường pơphun bưp mơnuih ƀon sang, plĕ hră ƀơi jơlan, tep panô, áp phích hyu pôr pơtâo, biă ñu bruă tŭ yua hloh jing bruă pơbưp mơnuih ƀon sang, lăi glăi hơdôm tơlơi ană plơi aka ƀu thâo hluh kơ hră pơhlôm nua ia jrao”.