VOV4.Jarai - Tui hăng Anom bruă wai lăng klin duam ruă tơring čar Gia Lai, ră anai duam đung drah hơđuh đĭ kơtang ƀơi abih bang 17 boh tơring glông, plơi prong hăng 2.414 čô mơnuih ruă, đĭ 6 wơ̆t pơhmu hăng thun hlâo. Kơnong mơng blan 6 truh ră anai, Gia Lai hơmâo laih năng ai 2.000 čô mơnuih duam đung drah. Hơdôm boh tơring hơmâo mrô mơnuih duam đung drah lu hloh anun lĕ Ia Grai, plơi prong Pleiku, Krông Pa hăng Ia Pa...

Sang ia jrao Čơđai tơring čar Gia Lai pơjrao brơi mơnuih duam đung drah

Ăt tui hăng anom bruă ia jrao Gia Lai mơn, mrô mơnuih duam đung drah amra lu tui truh kơ blan 10 thun anai yua dah mông anai hơmâo hơjan lu, lŏn djrưh, jing anih amuñ hơmâo hơdrip, ană keč čeh čar. Yua hnun, rơngiao kơ tơlơi gum djru mơng anom bruă ia jrao pơgang klin duam đung drah lĕ ană plơi kiăng kih rơmet anih dŏ, biă ñu ƀu brơi hơmâo ia dŏ đom glăi jum dar sang, anăm brơi ană keč čeh mơboh ôh.

Siu H’Mai: Pơblang