Amăng thun 2021 hăng 2022, 23 boh anih pơjrao duam ruă gah kơnuk kơna hơmâo pơpha nao 758 mơta ia jrao, hăng rơnoh prăk truh 646 klai prăk, samơ̆ phrâo ngă djop 66% đôč. Ră anai, hơdôm anih pơjrao duam ruă amăng tơring čar kơƀah ƀu hơmâo ia jrao pơjrao tum ôh. Bruă ngă, ĕp mă prăk mơ̆ng djop sang bruă ia jrao yua kơnuk kơna wai lăng ƀơi Gia Lai dŏ bưp lu tơlơi tơnap tap. Bruă pơhrui prăk pơjrao lĕ ƀu djop rơnoh prăk yua amăng sang ia jrao ôh, anun tơl dong hnưh prăk blan kơ ƀing mă bruă amăng sang ia jrao, bơbeč truh bruă mă pơkă lăng hăng pơjrao tơlơi duam ruă kơ mơnuih ƀôn sang.

Git gai jơnum anai, yă Nguyễn Thị Thanh Lịch Kơ-iăng Khua jơnum min mơnuih ƀôn sang tơring čar Gia Lai git gai Gơnong bruă ia jrao tơring čar ngă hrom Anom bruă djă prăk pơhlôm nua bruă mơnuih mơnam hăng Gơnong bruă prăk kăk tơring čar lăi pơthâo hơdră pơhrua rơnoh prăk kơƀah, čan hlâo prăk pioh tla prăk blan kơ mơnuih mă bruă amăng sang ia jrao kiăng hơmâo prăk yua, blơi gơnam mă bruă pơjrao duam ruă; laih dơ̆ng rơkâo khua mua djop sang ia jrao kơtưn hơdră ĕp mă prăk pioh yua kiăng hơmâo boh tơhnal klă hloh, kơtưn bruă glăm ba amăng bruă mă.