VOV4.Jarai - Ră anai hơdôm sang ia jrao tơring čar pơjrao brơi mơnuih duam đung drah ƀơi Gia Lai glăk gơniă yua mơnuih duam đung drah ba nao đih pơ sang ia jrao mơng hơdôm sang ia jrao tơring glông lu tui. Amăng mrô 3.608 čô mơnuih duam đung drah tơring čar Gia Lai dong mơng akŏ thun truh lơ 21/8 hơmâo truh pơ 70% čô mơnuih duam đung drah nao đih pơjrao pơ sang ia jrao, amăng anun rơbêh ha mơkrah mrô mơnuih ba mơng hơdôm sang ia jrao tơring glông ba nao đih pơ sang ia jrao tơring čar.

Mrô čơđai pơjrao duam đung drah pơ Sang ia jrao Nhi Gia Lai lu ƀiă pơhmu hăng hơdôm tơlơi ruă pơkŏn

Ră anai, Sang ia jrao prong tơring čar Gia Lai, Sang ia jrao Nhi Gia Lai, Anom bruă khăm pơjrao plơi prong Pleiku hơmâo mă yua giăm 50% mrô sưng kiăng kơ pơjrao brơi mơnuih duam đung drah, lu hloh lĕ ƀing mơnuih duam ba rai mơng hơdôm tơring glông. Tui ƀing ơi ia jrao, thun anai Type virus đĭ ƀiă pơhmu hăng thun hlâo, ngă kơ mơnuih ruă kraih lu ƀiă pơhmu hăng thun hlâo. Anom bruă ia jrao tơring čar Gia Lai tŏ tui pơkiăo nao ƀing nai ia jrao, ơi ia jrao hăng ba nao jrao, gơnam măi mok, sưng đih kiăng pơjrao brơi mơnuih duam ruă.

Siu Đoan: Pơblang