Lơ 22/9, Anom bruă ia jrao tơring glông Krông Pa, tơring čar Gia Lai pôr tơlơi pơhing, hơmâo sa čô mơnuih djai yua tơlơi ruă djơ̆ tuai, anun lĕ amôn Ksor Kiêm 8 thun djuai ania Jrai, dŏ pơ ƀôn Čư̆ Krih, să Čư̆ Drăng, tơring glông Krông Pa. Mơnuih amăng sang anŏ amôn Kiêm lăi, yua ƀu thâo ôh asâo kĕ anun ƀu hơmâo tlâ̆o ia jrao vaccine pơgang djơ̆ tuai ôh. Lơ̆m amôn Kiêm duăm hlor pơ-iă amăng drơi jăn, ruă rơgah, pơ-ai buai, sang anŏ nao blơi mă ia jrao ba glăi mơñum duăm ƀu lưh ôh. Truh lơ 12/9, ba nao pơ sang ia jrao tơring glông Krông Pa, lơ̆m duăm hlơr pơ-iă, pơtŭk, pơ-ai kơtang.

Truh tlam mơmŏt hrơi anun, ñu kraih tui, brơi nao pơ sang ia jrao  pơjrao čơđai tơring čar Phú Yên hăng ĕp lăng kah thâo duăm yua kman djơ̆ tuai asâo yang ngă djơ̆ tuai kĕ. Lơ 15/9, amôn Kiêm arăng brơi ba nao pơ sang ia jrao prong Nhi Đồng 2, ƀôn prong Hồ Chí Minh lơ̆m bơrơbah laih. Arăng mă drah ba pơčrang, boh tơhnal ƀuh lĕ hơmâo kman virus asâo djơ̆ tuai laih anun truh lơ 20/9, amôn Kiêm djai yơh. Mơ̆ng akŏ thun truh ră anai, Gia Lai hơmâo 11 čô mơnuih djai yua kman ruă asâo djơ̆ tuai, lu hloh amăng kual Dap Kơdư.