VOV4.Jarai-Ră anai, anom bruă ia jrao Gia Lai hlăk pok pơhai hơdră pơhlôm pơgang lu mơta klin duam ruă. Amăng anun, lăp bơngơ̆t biă mă lĕ klin duam đung drah, yua hơmâo giăm 3000 čô mơnuih ƀă mơ̆ng akŏ thun truh ră anai. Klin Covid 19 dưi pơgăn laih, samơ̆ rĭm hrơi djop anom bruă ia jrao ăt dŏ čih pioh hơmâo 10 čô mơnuih ƀă. Hrom hăng anun, lu tơlơi ruă pơkŏn bơbrah rơkông đok, duam ƀlĕ hmơi pơđeh hăng djơ̆ čut kra ăt či hơmâo đôč tơdah ƀu pơgang tong ten. Ƀơi anăp kơ tơlơi anai, anom bruă ia jrao Gia Lai pơtrut bruă pơtô pơblang kơ mơnuih ƀôn sang brơi pruih ia jrao, rơnăk ayuh hyiăng anih hơdip jum dar pơgăn klin duam đung drah.

Kơ bruă tlâ̆o pơgang, Gia Lai him lăng brơi tlâ̆o pơgang djop kơ 700 rơbâo arăt vaccine pơgang ruă bơbrah rơkông đok kơ mơnuih ƀôn sang hơdôm blan pơ anăp, pơtrut hmar ƀiă tlâ̆o vaccine pơgang Covid 19 kơ khul mơnuih djop hnơr thun pơkă, biă mă ñu ƀing čơđai prăp lui nao hrăm hră thun phrâo.

Gia Lai tlâ̆o pơgang vaccine Covid 19 kơ djop hnơr thun

Kiăng pơplih pơkra tơlơi lui raih, ƀu đing nao amăng bruă pơgang pơgăn klin ruă Covid-19, Lâm Đồng glăk pok pơhai klă lu jơlan pơsir, biă ñu pơtrut kơtang bruă tlâ̆o pơgang hlôm hlâo klin ruă kơ čơđai sang hră hlâo kơ thun hrăm phrâo. Ră anai, ƀơi Lâm Đồng, mơnuih rơbêh kơ 18 thun tlâ̆o vaccine Covid-19 (ară tal 3) kơnong kơ hmâo 64,5%, ară tal 4 hmâo 43,5%; tlâ̆o ară lok glăi tal 3 kơ čơđai mơng 12 thun truh kơ 18 thun ăt kơnong kơ hmâo rơbêh kơ 58% mơn.

Bôh than ba truh yua kơ sa dua čô mơnuih ƀôn sang hmâo tơlơi pơmin ƀu đing nao, lui raih, ƀu tlâ̆o djop vaccine pơgang Covid-19 tui tơlơi pơtă mơng gơnong bruă ia jrao. Kiăng bruă pơgang pơgăn klin ruă Covid-19 ba glăi bôh tơhnal, đĭ tui mrô mơnuih nao tlâ̆o vaccine, tơring čar Lâm Đồng glăk pok pơhai bruă tlâ̆o vaccine pơgang Covid-19 amăng đơ đam tơring čar, amăng anun đing nao tlâ̆o giong hĭ ară tal 3 kơ mơnuih anun lĕ čơđai sang hră mơng 12 truh 18 thun hlâo kơ mut thun hrăm phrâo 2022-2023.

Nay Jek-Siu H’Prăk: Pơblang