Thun hrăm anai, Sang hră gưl I Nguyễn Viết Xuân (tơring kual Nhơn Hòa, tơring glông Chư Pưh, tơring čar Gia Lai) hơmâo 804 čô čơđai sang hră. Mơng pel ĕp, mrô čơđai amăng sang hră hơmâo hră pơhlôm nua ia jrao kơnong 80%. Nai Trịnh Mạnh Thắng, khua sang hră brơi thâo, yua anai lĕ kual hơmâo lu amĭ ama nao mă bruă pơ ataih; đa sang anŏ tơnap tap, ƀing čơđai lĕ mơnuih djuai ania ƀiă ƀu hơmâo amĭ ama đing nao kơ bruă duh prăk blơi hră pơhlôm nua ia jrao brơi ƀing gơñu.

“Thun anai mrô prăk duh amăng hră pơhlôm nua ia jrao đĭ pơhmu hăng thun hrăm hlâo anun, lu čơđai amăng ƀon lan sang anŏ tơnap tap biă mă. Sang hră ƀuh mơn tơlơi anai hăng ăt hơmâo ba tơbiă lu hơdră djru, mơng hrơi jơnum ƀing amĭ ama čơđai akŏ thun hrăm, sang hră ăt bưp pơtô pơblang brơi amĭ ama čơđai kiăng ƀing gơñu thâo bruă blơi hrăm pơhlôm nua ia jrao amra ba glăi lu tơlơi dưi brơi ƀing čơđai hăng mơnuih mơnam”.

Amăng mrô 23 boh sang hră ƀơi tơring glông Chư Pưh kơnong 5 boh sang hră dưi hơmâo rơbêh 90% mrô čơđai blơi hră pơhlôm nua ia jrao. Ba truh kơ bruă lu čơđai aka ƀu hơmâo hră pơhlôm nua ia jrao hơmâo ngăn drăp kơnuk kơna djru brơi hră pơhlôm nua ia jrao hrŏ trun kơtang, lơm să, plơi pla hơmâo pơklaih mơng tơnap tap laih. Ơi Nguyễn Hữu Hưng-Kơ-iăng khua anom bruă hră pơhlôm nua mơnuih mơnam tơring glông Chư Pưh, tơring čar Gia Lai brơi thâo dong:

“Ƀing mơnuih dưi mut hrŏm hră pơhlôm nua ia jrao amăng hơdôm thun laih rơgao hrŏ trun kơtang, ba truh tơlơi anai yua bơdjơ̆ nao tơlơi pơsit mrô 612 (QĐ Jơnum min djuai ania) kơ hrŏ trun kual, pơklaih kual, yua anun ƀing čơđai ƀơi kual anai hrŏ tui mơn, lơm anun lu hloh lĕ ƀing čơđai mơnuih djuai ania ƀiă. Yua anun, mrô mơnuih mut hrŏm hră pơhlôm nua ia jrao brơi čơđai sang hră mơng tơring glông Chư Pưh kơnong 81%.

Kar kăi mơn, bruă pơhlôm abih bang čơđai ƀơi tơring glông Chư Sê ăt bưp lu tơlơi tơnap tap. Mah ƀing čơđai djuai ania ƀiă hơmâo ngăn drăp djru brơi 60% mrô prăk blơi hră pơhlôm nua ia jrao samơ̆ ăt dŏ giăm 2.700 čô čơđai aka ƀu mut hrŏm. Yă Ngô Thị Hiền, Kơ-iăng khua anom bruă hră pơhlôm nua mơnuih mơnam tơring glông Chư Sê, tơring čar Gia Lai brơi thâo, mrô čơđai sang hră amăng tơring glông phrâo 86% đôč.

“Khul apăn akŏ hơdôm boh sang hră, djop anih anom kơđi čar amăng să hăng anom bruă hrăm pơhlôm nua mơnuih mơnam hơmâo gum hrŏm nao tơl hơdôm boh plơi pla hăng djop sang hră kiăng pơtô pơblang, pơtrut pơsur samơ̆ ƀing amĭ ama čơđai lêng kơ lăi glăi yua sang anŏ tơnap tap yua anun ƀu gưt blơi hră pơhlôm nua ia jrao brơi ƀing čơđai. Samơ̆, thun hrăm 2023-2024, ƀing gơmơi hơmâo pơphô bruă brơi Jơnum min mơnuih ƀôn sang tơring glông git gai hơdôm khul git gai hơdôm boh să, sang hră hăng gơnong bruă pơtô pơjuăt kiăng pok pơhai hrăm pơhlôm nua ia jrao brơi ƀing čơđai, gir run 100% mrô čơđai dưi mut hrŏm.

Tui jŭ yap mơng hră pơhlôm nua mơnuih mơnam tơring čar Gia Lai, ră anai mrô čơđai sang hră hơmâo hră pơhlôm nua ia jrao giăm 90%. Tơring čar dŏ giăm 22 rơbâo čô čơđai tơnap ƀu dưi blơi hră pơhlôm nua ia jrao. Tơlơi anai bơdjơ̆ nao tơlơi dưi kơ ƀing čơđai tơdah dju djuam duam ruă bruă nao khăm pơjrao amra rơngiă lu prăk kak.