VOV4.Jarai-Tơring čar Gia Lai hlăk pok pơhai lu hơdră kiăng pơđĭ tui mrô tlâ̆o vaccine Covid 19 kơ čơđai mơ̆ng 5-12 thun. Kiăng pơđĭ tui mrô mơnuih tlâ̆o pơgang lĕ, pơphun hyu tlâ̆o pơgang tơl plơi pla. Ơi Đinh Hà Nam, Kơ-iăng Khua Gơnong bruă ia jrao tơring čar Gia Lai brơi thâo, mrô čơđai mơ̆ng 5-12 thun ƀơi Gia Lai djop gêh găl dưi tlâ̆o vaccine pơgang Covid 19 lĕ 212 rơbâo čô. Yap truh lơ 10/8, Gia Lai hơmâo tlâ̆o brơi 170.700 arăt vaccine arăt tal sa hăng rơbêh 83 rơbâo 700 arăt tal 2 kơ khul anai, dưi djop mrô mơnuih tlâ̆o arăt tal 1 lĕ rơbêh 80%, arăt tal 2 lĕ rơbêh 39%.

Anih tlâ̆o pơgang klin ƀơi plơi prong Plei Ku

Tui hăng ơi Nam, mrô kah hăng ră anai, tơring čar Gia Lai dăp tal 27 amăng dêh čar kơ bruă tlâ̆o brơi čơđai mơ̆ng 5-12 thun. Kiăng pơđĭ tui mrô tlâ̆o vaccine pơgang Covid 19 kơ khul anai, tơring čar Gia Lai hlăk ngă hăng gir run dơ̆ng lu hơdră pôr tơlơi pơhing, anom bruă pơtô hrăm ăt pơtô lăi, jak iâu amĭ ama čơđai sang hră, brơi djru jŭ yap, pơtrut tlâ̆o brơi djop mơnuih pơgang klin mơ̆ng kual plơi pla mơtam.

Nay Jek: Pơblang