Sa amăng hơdôm čô mơnuih dŏ tơguan truh yang hrơi dơ̆ng kiăng hmao mă hră iâu anăn mut pơkă lăng tơlơi ruă mơta kơ rơkơi ñu, truh yang hrơi leo gai či tlam či mut pơkă lăng, amai Yên Thị Sáng, dŏ pơ tơring kual Čư̆ Prong, tơring glông Čư̆ Prong brơi thâo, amăng sa rơwang hrơi tơjuh, abih wơ̆t rơkơi sang hăng dua čô ană lêng kơ ruă mơta soh. Hnang blung ană đah rơkơi tơlŭi ruă, ƀă mơ̆ng gơ̆p pơ sang hră, blơi mă ia jrao glăi tơdjôh pơjrao pơ sang hăng ia jrao mơñum. Rơgao sa wơ̆t hrơi tơjuh, ană plai ƀiă ruă rơkơi dơ̆ng ƀă hăng ană tal dua ăt ƀă mơ̆n, anun yơh ñu khom brơi nao pơ anih pơjrao ruă mơta pơkă lăng, čang rơmang pơjrao djơ̆ hloh:

"Tơlơi ruă mơta mơ̆ng nô ha wơ̆t hrơi tơjuh laih, truh ră anai plai ƀiă hnun, ană tal dua dơ̆ng ruă kơtang, ama gơñu mơguah phrâo ƀă, tlam hlong nao pơ sang ia jrao mơtam brơi ĕp lăng. Ră anai, lu mơnuih ruă mơta biă mă”.

Amăng 1 blan hăng anai đôč, lu mơnuih ruă nao pơ sang ia jrao ƀơi tơring čar Gia Lai hơmâo čih pioh truh 3000 čô mơnuih ruă mơta. Amăng anun, mơkrah dưi pơkă lăng hăng pơjrao ƀơi sang ia jrao ruă mơta či Plei Ku. Pơkă rim hrơi, sa boh sang ia jrao tŭ jum, pơjrao brơi năng ai 50 čô mơnuih ruă mơta, tăp năng truh 100 čô mơnuih ruă.

Kiăng dưi sem lăng tŭ yua tơlơi ruă mơta, anom bruă ĕp lăng tơlơi duăm ruă tơring čar, CDC Gia Lai hơmâo ngă hră mơ-it djop sang ia jrao ƀơi 17 boh tơring glông, ƀôn prong anet hăng phun. Tui hăng anun, rơkâo djop sang ia jrao gưl tơring glông kơtưn pơtô lăi, ĕp lăng, ƀuh tañ hăng pơsir hmao kru ƀơi anih hơmâo tơlơi ruă mơta. Thạc sĩ, ơi ia jrao pơjrao tơlơi ruă mơta Vũ Phương Việt Hằng-anom bruă ĕp lăng tơlơi duăm ruă tơring čar Gia Lai brơi thâo: tơlơi ruă mơta ƀơi čơđai sang hră lu tui, anun yơh wơ̆t amĭ ama čơđai sang hră hăng nai pơtô amăng sang hră kiăng hơmâo hơdră ngă hrŏm pơgang tañ anăm brơi tơlơi ruă mơta ƀă hyu lu:

“Hơmâo tơlơi pơtô lăi hlâo phara. Anun lĕ sang hră pơpă hơmâo mơnuih ƀă tơlơi ruă hmar. Lơ̆m čơđai ruă mơta, ƀing amĭ ama čơđai sang hră brơi dŏ pơ sang mơtam, anăm ƀă kơ mơnuih pơkŏn. Sit čơđai sang hră ƀă laih amĭ ama ba nao pơ sang ia jrao pơkă lăng, anăm blơi mă ôh ia jrao tơdjôh ruă mơtaƀu djơ̆ hơdră, hŭi ba truh tơlơi ruă kơtang tui kraih hloh”.

Tơlơi ruă mơta juăt hơmâo amăng 3-7 hrơi tơdơi kơ jĕ giăm mơnuih ruă mơta. Anŏ mưn juăt ƀuh kah hăng ruă mơta, mriah amăng mơta hăng truh pơ alăk mơta, ngă ƀlĕ ia mơta, tơgŭ mơ̆ng tơbiă eh mơta ƀlit sir mơta, tơdah hơmâo kman ngă ruă mơta lĕ hơmâo eh mơta kơñĭ, mơtah asăt. Ƀing čơđai juăt hơmâo hrŏm ƀlĕ ia mơdung, mơta, truh pơtŭk ruă rơkông đok, duăm pơ-iă amăng drơi jăn...Mơnuih ruă amra ƀă mơ̆ng jơlan ia bah, ia mơta kơdah djơ̆ ao, bơnal akhăn sut ƀô̆ mơ̆ng mơnuih ruă....

Kiăng bĕ hĭ huăi ƀă tơlơi ruă mơta, rim čô khom kơđiăng anăm pơpao, ñir mơta hăng tơngan, čơđeng tơngan, ƀudah rơwư amăng bah, amăng mơdung ôh. Anăm nao giăm mơnuih ruă mơta. Khom rao tơngan na nao hăng ia čơƀu laih anun ia pơrơgoh kman. Mă yua hla pơar thu rơgoh, ƀudah akhăn hmlơi gah ia jrao yua sa wơ̆t lui mơtam pioh uă ƀơi mơta, sủ ia mơta, giong anun hlong glŏm amăng kơthung djah, hơmâo kơnăp gôm, kiăng huăi kman ƀă hyu kơ pô pơkŏn amăng sang anŏ, mơnuih jum dar, khom rơgoh na nao ƀô̆ mơta.