VOV4.Jarai - Hrom hăng hơdôm bôh tơring čar amăng kual Dăp Kơdư, klin duam pơđung drah ƀơi tơring čar Gialai ăt glăk pơphun tơnap mơn. Ƀơi anăp tơlơi anun, gơnong bruă ia jrao mơng tơring čar hmâo pok pơhai laih lu bruă mă kiăng pơgăn hăng ngă plai ƀiă klin ruă. Ră anai duam pơđung drah hmâo gluh đĭ kơtang laih ƀơi 16 amăng mrô 17 bôh tơring glông, plơi prong amăng tơring čar hăng 308 čô mơnuih ruă, đĭ 57% bơhmu hăng thun hlâo.

Ơi ia jrao ƀơi Anom ia jrao plơi prong Pleiku glăk pel ĕp hăng pơjrao brơi kơ sa čô mơnuih duam pơđung drah

Hơdôm bôh tơring glông hmâo mrô mơnuih duam pơđung drah lu lĕ Ia Grai, Ia Pa, Cư̆ Prông,  Krông Pa, Čư̆ Pưh, Pleiku, Đăk Đoa hăng 112 bôh anih klin ngă. Ơi Đinh Hà Nam, Kơ-iăng Khua Gơnong bruă ia jrao tơring čar Gialai brơi thâo, klin duam pơđung drah amra ngă tơnap pơ̆ anăp anai, gơnong bruă ia jrao tơring čar glăk pơtrut kơtang dong bruă pơdjai keč ƀơi hơdôm kual hmâo klin ngă, pơphun klă bruă tŭ mă, pơjrao mơnuih ruă kiăng plai ƀiă mrô mơnuih duam pơđung drah amăng plơi pla./.

Siu H’ Prăk: Pơblang