VOV4.Jarai - Phường Čeo Reo, plơi prong Ayun Pa hmâo ha tal anih klin ngă tañ hloh hăng glêh tơnap hloh ƀơi tơring čar Gialai. Kiăng pơgăn klin, ƀing apăn bruă, mơnuih mă bruă ia jrao, lu biă ñu lĕ đah kơmơi, hmâo gah lui laih bruă sang anô̆, gir run mă bruă ƀu yap hrơi mlăm hăng găn rơgao hluh gah Tết tui phiăn juăt anai, gum hrom klă hăng hơdôm khul pơgăn klin. Bôh tơhnal lĕ phường Čeo Reo hmâo mă glăi laih tơlơi hơđong hăng tơlơi suaih pral amăng giăm truh 1 thun. Truh bơyan bơnga Nhâm Dần 2022, Čeo Reo ăt djă pioh klă mơn bruă pơgang klin gơnang kơ ƀing đah kơmơi apăn bruă ia jrao bă kơ pran jua mă bruă ơi ia jrao.

Ha mơkrah rơnuč blan 12, giăm Tết tui phiăn juăt Nhâm Dần 2022, điều dưỡng Nay H’ Ning (48 thun, ƀơi anom ia jrao phường Čeo Reo, plơi prong Ayun Pa, tơring čar Gialai) lu bruă hloh dong. Yua kơ hơdôm hrơi anai, mơnuih mă bruă hăng ƀing hrăm gưl dlông ƀơi hơdôm bôh tơring čar, ƀôn prong glăi plơi ƀong tết leng kơ rai lăi pơthâo tơlơi suaih pral. Tơdơi kơ bơhmu hăng hră krăp lăng klin ngă, amai H’ Ning lăi pơthâo, pơtô brơi mơnuih ƀôn sang krăp lăng mă tơlơi suaih pral, ƀudah pơčrang lăng tañ kiăng ruah mă hăng pơtô brơi dô̆ čơlah lom kiăng. Gun bruă lĕ tui anun, samơ̆ hăng amai H’ Ning, klin dưi wai lăng klă kah hăng ră anai lĕ, sa tơlơi mơ-ak biă hăng drơi pô ñu hăng sang anô̆. Hơdor glăi rơgao hăng anai ƀrô krep 1 thun, ăt amăng hơdôm hrơi giăm Tết tui phiăn juăt mơn, phường Čeo Reo lĕ anih blung a mơng tơring čar Gialai hmâo klin Covid-19, amăng hơdôm hrơi, klin mơng anai lar hyu lu anih anom. Lom anun, ñu hăng ƀing gŏp ñu hmâo gơgrong bŏng glăi laih hrơi mlăm hăng klin amăng lu blan ƀu hmâo glăi pơ sang. Anai ăt lĕ hơdôm hrơi lăo hơdor hloh amăng 25 thun amăng bruă mă mơng amai H’ Ning:

“Gum hrom pơgăn klin drơi pô kâo hning kơ sang anô̆ biă, biă ñu djơ̆ hrơi hrơi Tết truh hlơi hlơi leng kơ glăi pơ̆ sang sôh. Samơ̆ yua kơ bruă mă ƀing gơmơi amra dô̆ glăi ƀơi sang ia jrao kiăng pơgăn klin Covid-19. Hơdor glăi hloh lĕ hmâo hơdôm hrơi hyu huĕt ĕp mơnuih bơdjơ̆ nao pô ƀă klin truh kơ 2, 3 mông mơguah hrơi tơdơi kah mơng giong, glêh glar biă. Drơi pô kâo ăt thun tha laih mơn, samơ̆ dưi hmâo ƀing adơi amai pơsur anun djop tơlơi hning rơngôt tañ  rơgao hĭ mơn”.

Hrom hăng điều dưỡng H’ Ning, anom ia jrap phường Čeo Reo, plơi prong Ayun Pa dô̆ hmâo 3 čô ơi ia jrao, y tá pơkon gum hrom dô̆ gak. Ơi ia jrao H’ Bem – Khua Anom ia jrao brơi thâo, mơnuih ruă blung a ƀơi phường Čeo Reo dưi thâo amăng mlăm lơ 29/1. Amăng mlăm mơtăm, abih bang anom ia jrao prăp lui sum ao, gơnam yua ƀong huă dô̆ glăi ƀơi anih mă bruă kiăng đing nao kơ bruă mă lu hloh. Bruă phun mơng anom lĕ djru grŭp hyu huĕt ĕp mơng Anom wai lăng tơlơi duam ruă, djru bruă pơčrang lăng mơng Anom kơsem min klin ruă Tây Nguyên. Anai lĕ hơdôm bruă mă ƀu hmâo anăn, samơ̆ kiăng biă. Lom hơdôm bôh sang anô̆ tum jơngum čơkă Tết, ñu hăng ƀing gŏp ñu ăt mă bruă mơn ƀu thâo hrơi mlăm ôh hăng ƀu hmâo hrơi pơdơi ôh. Hơdôm wot hning kơ ană anet 4 thun, amăng sum ao pơgang gôm sir klep mơng akô̆ truh kơ tơkai, ñu kơnong kơ dưi đuăi găn nao pơ̆ sang, dŏng glăi lăng ană mơng ataih. Tết anai, čang rơmang prong hloh mơng amai H’ Bem lĕ dưi hơđong čơkă bơyan bơnga phrâo ƀơi sang anô̆, samơ̆ ăt prăp lui mơn bruă mă tơdah hmâo tơlơi pơplih:

“Ră anai, tơlơi klin Covid-19 ƀơi plơi prong Ayun Pa hơđong laih. Hơdôm hrơi anai, bruă mă plai ƀiă laih bơhmu hăng thun hlâo hăng tal gluh đĭ klin phrâo rơgao. Kâo čang rơmang thun sô abih tết truh, bơyan bơnga rai, tơlơi klin Covid-19 hơđong kiăng kâo gum hrom ƀing gŏp hăng abih bang mơnuih ƀôn sang hmâo mông bơwih brơi kơ sang anô̆. Khă hnun hai, tơdah hmâo klin ruă truh thơ drơi pô kâo hăng ƀing gŏp kâo amra gơgrong dô̆ gak mơn kiăng ngă giong bruă mă, biă ñu amăng bruă pơgang, bơwih brơi, pơđĭ tui tơlơi suaih pral mơnuih ƀon sang pơhlôm hloh”.

Phường Čeo Reo, plơi prong Ayun Pa hmâo giăm truh 4500 čô mơnuih ƀôn sang, 4 grŭp mơnuih ƀôn sang hăng hmâo 2 bôh plơi neh wa djuai ania Jarai. Anai ăt lĕ anih mut tơbiă mơng plơi prong Ayun Pa, giăm hăng 2 bôh tơring glông Phú Thiện hăng Ia Pa, anun hmâo ha tal anih hmâo klin blung hlâo, wai lăng tơnap tap ƀơi tơring čar Gialai. Ơi Phan Văn Trung – Kơ-iăng Khua Jơnum min mơnuih ƀôn sang phường Čeo Reo, plơi prong Ayun Pa, tơring čar Gialai brơi thâo, rơgao kơ 3 tal gluh glăi, truh ră anai, tơlơi klin ngă ƀơi anai dưi wai lăng laih. Dưi hmâo bôh tơhnal anai, rơngiao kơ tơlơi tŭ ư hrom, gơgrong mơng mơnuih ƀôn sang, dô̆ hmâo črăn pran prong mơng khul ơi nai ia jrao ƀơi anih phun, amăng anun hmâo ƀing ơi ia jrao, mơnuih apăn bruă ƀơi Anom ia jrao phường Čeo Reo:

“Hmâo bôh tơhnal anai, bruă mă mơng ƀing ơi nai ia jrao Anom ia jrao phường Čeo Reo prong biă. Khă ƀing ơi nai ia jrao leng kơ đah kơmơi, samơ̆ lom hmâo F0, gơñu leng kơ gum hrom ƀu yap hrơi mlăm ôh, hrom hăng gum hrom hăng khul grŭp pơkon. Tơlơi klin ruă ƀơi phường truh ră anai hơđong, ƀu hmâo hlơi dô̆ čơlah ƀơi sang. Samơ̆ ƀing gơmơi ăt ƀu lui raih mơn, bruă lăi pơhing ăt pok pơhai na nao kiăng mơnuih ƀôn sang ngă klă 5 mơta bruă pơgang klin”.

Bơyan bơnga phrâo truh hăng djop sang. Plơi prong Ayun Pa, Gialai dưi pơhrôp khăn gru đơhet. Amăng tơlơi mơ-ak čơkă Tết, ƀing đah kơmơi ƀơi Anom ia jrao phường Čeo Reo ăt glăk mă bruă mơn hăng hur har kơ bruă mă, yua kơ tơlơi hơđong mơng mơnuih ƀôn sang./.

Nguyễn Thảo: Pô čih – Siu H’ Prăk: Pơblang