VOV4.Jarai - Să Hà Bầu, tơring glông Đăk Đoa lĕ hmâo ha tal anih klin Covid-19 ngă kơtang ƀơi tơring čar Gialai. Kiăng hơdôm hrơi bơyan bơnga mơ-ak pơhlôm, bruă pơgang, pơgăn klin hmâo pơtrut kơtang, hăng tơlơi gum hrom mơng abih bang hơdôm bôh sang anô̆. Neh wa hmâo pơkra laih tơlơi juăt amăng tơlơi hơdip rim hrơi, bơwih ƀong huă rim hrơi; gong gai hăng gơnong bruă ia jrao pơtrut kơtang hơdôm bruă wai lăng hăng lăng tui klin ngă, pơsit ƀu pioh klin ngă glăi.

Ăt kah hăng djop thun, sang anô̆ ơi Hmyek ƀơi plơi Bông, să Hà Bầu, tơring glông Đăk Đoa, tơring čar Gialai hmâo prăp lui giong čeh tơpai hăng glăk pơtop 10 kg braih ñar kiăng pơkra hơdôm gơnam ƀong tui phiăn juăt, ƀong amăng hơdôm hrơi bơyan bơnga phrâo. Thun anai, ơi Hmyek hmâo jơnum laih sang anô̆ tañ, pơtă pơtăn ană tơčô pô hơdôm tơlơi kiăng hloh pioh pơhlôm amăng tal klin ngă. Tui hăng ơi Hmyek, tal klin ngă amăng blan 2 rơnuč thun 2021 ƀơi să Hà Bầu pơphun mơng bruă tum pơƀut lu mơnuih amăng anih jôk atâo hăng bơbliu pĕ kơ phê. Yua anun, ñu pơtô lăi ană amôn kơnong kơ hơ-ư̆č hmưi Tết amăng phung wang sang anô̆ đô̆č. Hăng sang anô̆ iao gah hăng kơnung djuai pơ̆ hơdôm bôh să, tơring glông ataih lĕ hơ-ư̆č hmưi tơdruă hơdôm tơlơi klă hiam tui telephone. Hăng bruă gơgrong lĕ tha plơi plơi Bông, ơi Hmyek ăt lăi pơthâo tui anun mơn truh hơdôm bôh sang anô̆ amăng hơdôm mông jơnum plơi:

 “Amăng tơlơi klin Covid-19 kah hăng ră anai lĕ, tha plơi kâo pơtă pơtăn na nao ƀing ană tơčô amăng hrơi Tết mơ-ak samơ̆ khom pơgang hlôm hlâo klin. Tâ̆o hloh anăm hyu ataih, kơnong kơ čơkă tết amăng sang đô̆č. Prăp lui ƀañ kĕo, ia mơñum kiăng ngui ngor mơ-ak amăng sang đôč klă yơh, yua kơ klin Covid-19 ră anai huĭ rơhyưt biă, pơ̆ hơpă leng kơ hmâo klin sôh. Kâo ăt pơtă pơtăn mơn neh wa amăng plơi tui anun, ƀu dưi tum pơƀut lu mơnuih, yua kơ klin ruă huĭ rơhyư̆t biă, amuñ lar tưp hyu, lom tơbiă gah rơngiao khom gôm adung mơbah, rơmet agaih sang dô̆, khom ngă tui tơlơi pơkă pơgang hlôm hlâo klin mơng kơnuk kơna”.

Hrom hăng mơnuih apăn bruă phun pơgang pơgăn klin ƀơi plơi Bông hăng ơi Hmyek, ayong Pơt – Khua plơi brơi thâo: Hlâo kơ Tết sa blan, ñu hmâo gum hrom hăng ding kơna amăng Grŭp wai lăng mă pô plơi pla, tha plơi, mơnuih hmâo arăng đăo gơnang hăng hơdôm mơnuih amăng khul đah kơmơi, hlăk ai amăng plơi ngă tui bruă lăi pơhing truh hơdôm bôh sang anô̆ khom ngă tui 5 mơta bruă pơgang klin amăng hơdôm hrơi hơ-ưč hmưi Tết tơdruă. Tơlơi anai, hmâo črăn pha ra bơhmu hăng hlâo adih, samơ̆ jing tơlơi kiăng biă yua kơ tui hăng ñu, bơyan bơnga phrâo kơnong kơ sit nik mơ-ak ngui ngor, tơdah abih bang mơnuih ƀôn sang leng kơ pơhlôm klă:

 “Tơlơi mơ-ak bơyan bơnga čơkă tết lĕ Jơnum min mơnuih ƀôn sang să ăt lăi pơhing, črâo ba kiăng neh wa čơkă tết mơ-ak samơ̆ khom pơhlôm klă. Neh wa khom ngă tui tơlơi črâo ba, pơtô brơi mơng jơnum min să, khom tui tơlơi pơkă pơgang klin, tơbiă gah rơngiao khom gôm adong mơbah, hơdư̆ ƀiă tum pơƀut lu mơnuih, kơnong kơ ngui ngor čơkă tết amăng rơwang giăm đôč. Pơ̆ anăp anai ƀing gơmơi amra črâo ba tŏng ten hloh, kơtưn hloh dong hơdôm bruă pơgang pơgăn klin. Ƀing ta mơ-ak čơkă tết samơ̆ khom đing nao pơgang klin”.

Amăng 2 blan rơnuč thun 2021, să Hà Bầu, tơring glông Đăk Đoa lĕ anih klin ngă kơtang mơng tơring čar Gialai hăng rơbêh kơ 530 čô mơnuih ƀă klin hăng ha rơbâo čô F1 ƀơi 7 bôh plơi neh wa djuai ania ƀiă, khom pơjrao, dô̆ čơlah. Ơi Y Hiếu – Kơ-iăng Khua să Hà Bầu, tơring glông Đăk Đoa  brơi thâo, ră anai, klin Covid-19 ƀơi tơring glông hmâo pơgăn, wai lăng klă laih. Kiăng dưi djă pioh bôh than anai, gong gai pơsit ƀu dưi lui raih, ƀu pioh klin ngă glăi amăng Tết tui phiăn juăt Nhâm Dần. Kiăo tui anun, Grŭp črâo ba pơgang pơgăn Covid-19 să Hà Bầu ăt hơdư̆ mơn bruă mă mơng hơdôm anih anom ngui ngor, hơdôm anih sĭ mlia gơnam ƀong, ia mơñum amăng plơi; pơphun bruă mơng hơdôm grŭp Covid-19 plơi pla ƀơi 8 bôh plơi; pơsur hơdôm bôh sang anô̆; sang anô̆ hơpă ƀong tết ƀơi sang anô̆ anun, samơ̆ ƀu tum pơƀut lu hloh kơ 10 čô mơnuih ôh ƀơi sa anih. Ơi Y Hiếu lăi:

“Amăng thun phrâo, kiăng neh wa čơkă tết mơ-ak rơnuk rơnua lĕ ƀing ta khom ngă tui tơlơi pơkă pơgang, pơgăn klin, blung hlâo ƀing ta ƀu dưi tum pơƀut lu mơnuih, khom djă pioh rơwang ataih nao rai, dua lĕ tơbiă gah rơngiao khom gôm adung mơbah, tlâo lĕ khom rao tơngan hăng ia čơƀu ƀudah ia pơdjai kơman. Jơnum min mơnuih ƀôn sang să lăi pơhing kiăng neh wa thâo hluh, neh wa hmư̆ tui kiăng pơgang tơlơi suaih pral mơng pô hăng sang anô̆, ngă hiưm hơpă kiăng neh wa hrưn đĭ bơwih ƀong, ngă brơi plơi jai pơđĭ kyar, pơdrong asah klă hiam”.

Hăng pran jua ƀu lui raih ƀơi anăp klin ruă, gong gai hăng mơnuih ƀôn sang să Hà Bầu glăk hmâo hơdôm hrơi mơ-ak bơyan bơnga phrâo hrom hăng kơđiăng Covid-19. Neh wa thâo hluh rơđah biă: pơhlôm tơlơi suaih pral, bơyan bơnga phrâo mơng sit nik pơhlôm mơ-ak./.

            Nguyễn Thảo: Čih – Siu H’ Prăk: Pơblang