Kiăng pơtrut pơsur pơpŭ bơni hơdôm tơlơi gum pơgôp prong mơng ƀing ơi ia jrao, hơmâo tơlơi tŭ ư mơng Anom pơtô bruă Ping gah dêh čar, pă anom bruă pôr pơhing kah hăng:Hră pơhing Mơnuih ƀon sang, Gong phun pơtui jua pơhiăp Việt Nam, Gong phun pơdah rup Việt Nam, Hră pơhing Thông tấn xã Việt Nam hơmâo ngă hrŏm hăng Ding jum ia jrao - pơphun jơlan hơdră bơbưp, bơni kơ ƀing ơi ia jrao ƀrô Hrơi pioh kơ nai ia jrao Việt Nam 27/2.

Jơlan hơdră hơmâo pơphun hăng tơlơi adoh mơng ƀing kơhnâo adoh suang Sang adoh Gong phun pơtui jua pơhiăp Việt Nam bơni kơ lŏn ia, plơi pla hăng hơdôm tơlơi gum pơgôp mơng ƀing buh ao kô̆ hrơi mlăm lăng ba tơlơi suaih pral kơ mơnuih ƀon sang.

Pơ ala kơ khua mua pă anom bruă pôr pơhing, ơi Lê Quốc Minh, Ding kơna git gai Ping gah, Khua Dăp hơdră Hră pơhing Mơnuih ƀon sang, Kơ-iăng khua anom pơtô bruă Ping gah, Khua khul mơnuih čih hră pơhing Việt Nam mơ-it tơlơi hơ-ơč hmưi hiam klă hloh hăng abih bang khua mua Ding jum ia jrao, khua mua amăng anom bruă ia jrao ƀrô 68 thun Hrơi pioh kơ nai ia jrao Việt Nam, hơ-ơč kơ ƀing ơi ia jrao dưi ngă lu bruă truh kih, jing anih mơnuih duam ruă hăng mơnuih ƀon sang dưi gơnang.

Hơdor glăi hrơi blan pơgang klin Covid-19 glêh glar tơnap tap hăng lu tơlơi lông lăng amăng 3 thun rơgao, ơi Lê Quốc Minh lăi rơđah: Amăng mông anun hơmâo lu bruă ngă hiam, pran jua thâo khăp pap mơng ƀing khua ia jrao, mơnuih mă bruă ia jrao ƀu hŭi kơ tơnap tap, ƀu hŭi djai brŭ dong tah, nao pơ anih hơmâo klin, dŏ hrŏm hăng tơlơi hŭi rơhyưt, abih pran jua djru pơjrao brơi mơnuih ră amăng anih pơčlah klin, nao mă bruă pơ hơdôm boh sang ia jrao pơdong jăng jai...Laih anun hơmâo ƀing ơi ia jrao đuăi lui ƀing ta hlao laih, ƀu hơmâo pơwơ̆t glăi dong tah. Mơnuih ƀon sang amăng dêh čar lêng kơ hơdor, thâo hluh hơdôm tơlơi djru prong prin anun. Tơdơi kơ abih klin Covid-19, anom bruă ia jrao bưp lu tơlơi tơnap tap, tơlơi gun. Anun lĕ bruă kơƀah ia jrao, gơnam yua gah ia jrao, bruă brơi prăk kơ sang ia jrao kơnuk kơna pơdong, bruă djru prăk hăng ƀing ơi ia jrao aka ƀu djơ̆ pran ôh, anun jing ngă lu mơnuih pơdơi bruă:

“Jing anom bruă pôr pơhing phun, Hră pơhing Mơnuih ƀon sang, Thông tấn xã Việt Nam, Gong phun pơtui jua pơhiăp Việt Nam, Gong phun pơdah rup Việt Nam amra hyu pôr pơthâo kơ bruă lăng ba tơlơi suaih pral mơnuih ƀon sang, kơ hơdôm bruă mă mơng anom bruă ia jrao, mơng ƀing ơi ia jrao”.

Jơlan hơdră hơmâo tô hrŏm hăng bruă bơkơtuai hơmâo anăn “Gir yua kơ tơlơi suaih pral mơnuih ƀon sang - Anom bruă ia jrao găn rơgao tơnap tap”. Anun jing tơlơi ră ruai mơng Kơ-iăng nai tha prin, nai prin tha, nai ia jrao Nguyễn Viết Nhưng, Khua hơđăp Sang ia jrao ruă kơsô̆ Dêh čar ta hrŏm hăng ƀing gŏp ñu hơmâo mă Pri Hồ Chí Minh hăng bruă “Kơsem min mă yua boh thâo măi mok rơgơi - amăng bruă đăo lăng tơlơi ruă, pơjrao tơlơi ruă jơlan suă jua” laih anun ĕp jơlan pơjrao đut hlao tơlơi ruă lao. Anun jing hơdôm tơlơi thâo rơgơi amăng bruă akŏ pơdong anom bruă ia jrao, pơgang klin duam ruă tŭ yua hăng pơđĭ tui anŏ klă bruă bơwih brơi mơnuih duam ruă mơng ơi ia jrao apăn bruă pơjrao mrô 1 Trần Phước Đoàn, Kơ-iăng khua Anom wai lăng klin duam ruă - tơring čar Tây Ninh, ơi ia jrao apăn bruă pơjrao mrô 1 Phạm Thị Hồng Lam, Kơ-iăng khua sang ia jrao tơring glông Nghi Xuân, tơring čar Hà Tĩnh, ơi ia jrao Phạm Ngọc Dung, Khua sang ia jrao să Quảng Sơn, Sang ia jrao tơring glông Hải Hà, tơring čar Quảng Ninh.

Nao jơnum hrŏm, khua mua hơdôm boh sang ia jrao gơnong dlông Huế, Sang ia jrao pơjrao čơđai, Sang ia jrao 199 - Ding jum kông an, Sang ia jrao Vinmec, Sang ia jrao kơsem min drah - pơmut drah Gơnong dlông hơmâo lăi glăi tơlơi pơmin, tơlơi gir run găn rơgao tơnap tap amăng mông hơmâo klin Covid-19, kơ mơnuih mă bruă ia jrao pơdơi bruă, kơ bruă kơƀah ia jrao, măi mok, ia jrao hóa chất. Kơ-iăng nai tha prin, nai prin tha Trần Minh Điển, Khua Sang ia jrao pơjrao Čơđai Gơnong dlông brơi thâo:

“Tom brơi, Ding jum ia jrao hăng ƀing khua mơng hơdôm boh sang ia jrao prong hơmâo jơnum truh 21 mông, ƀing ta hơmâo ƀuh bruă tơnap amra pơsir tui amăng ƀrư̆. Khă hnun hai, amăng bruă kiăng sang ia jrao mă bruă klă hloh, djơ̆ hloh, anun lĕ dưi prăp mă pô prăk kăk”.

Bơ Nai tha prin, nai prin tha Phạm Như Hiệp, Khua sang ia jrao prong Huế brơi thâo:

“Hơdôm tơlơi tơnap tap sit gơmơi amra dưi pơsir mơn, pơhmutu kah hăng tơlơi phiăn khăm pơjrao tơlơi ruă amra hơmâo mă yua amăng thun 2024 yua dah amăng tơlơi phiăn khăm pơjrao tơlơi ruă ăt hơmâo lu tơlơi mơ̆ ƀing ta dưi pơsir, pơhmutu nua blơi, bruă bơwih brơi ia jrao, mơnuih ƀon sang gum ngă, kah pơpha anih pơjrao, laih anun hơdôm tơlơi anun amra dưi pơsir hĭ hơdôm tơlơi mơ̆ anom bruă ia jrao glăk bưp”.

Pơhiăp ƀơi mông bưp, pơpŭ bơni kơ ƀing ơi ia jrao, anom bruă ia jrao, Kơ-iăng khua gum bruă git gai Ding jum ia jrao Đỗ Xuân Tuyên brơi thâo: Hrơi blan pơ anăp, Ding jum ia jrao pơƀut ngă giong tơlơi phiăn, tơlơi pơkă hơdôm tơlơi phiăn, pơplih phrâo anom bruă pơgang hlâo tơlơi ruă laih anun pơđĭ tui tơlơi suaih pral. Pơđĭ tui tơlơi rơgơi wai lăng sang ia jrao, anŏ klă bruă khăm pơjrao tơlơi ruă, pran jua djru brơi mơnuih duam ruă. Lăng glăi abih nua pơjrao tơlơi ruă kiăng djơ̆, djŏp, pơplih phrâo hơdră tla prăk, hơdră brơi prăk kơ anom bruă pơgang hlâo klin duam ruă...Ding jum ăt pơplih phrâo bruă ngă hră pơ-ar, pơđĭ tui anŏ klă, tŭ yua bruă pôr pơhing, pơtô lăi, biă ñu lăi pơthâo hơdră ngă bruă, kiăng hơmâo tơlơi tŭ ư hrŏm mơng abih bang mơnuih hăng hơdôm jơlan hơdră ngă bruă gah ia jrao.