VOV4.Jarai - Lơ 24/7, Ding jum ia jrao jơnum lăng nao rai mơng ataih hăng ƀing juăt bruă amăng dêh čar ta hăng dêh čar tac rơngiao kơ tơlơi klin ruă djơ̆ čut kra. Bruă jơnum hmâo pơlir hơbit pơsit truh lơ 24/7/2022, Việt Nam akă čih pioh hlơi ruă djơ̆ čut kra ôh. Khă hnun hai, tơlơi ruă anai amra lar truh hăng ƀă djơ̆ ƀơi dêh čar ta, yua kơ klin ruă hmâo čih pioh ƀơi lu dêh čar, tơlơi rô nao rai gêh gal hăng hmâo jơlan gah đĭ lu tui kơplah wah Việt Nam hăng hơdôm bôh dêh čar ƀơi rŏng lŏn tơnah, amăng kual. Ding jum ia jrao hmâo laih hră pơ-ar mơ-ĭt kơ Jơnum min mơnuih ƀôn sang hơdôm bôh tơring čar, ƀôn prong kơ kơtưn lăng tui tơlơi ruă djơ̆ čut kra; prăp lui gơnam pơčrang lăng pioh djru bruă pơkă pơsit tơlơi tuă, pơsit pô ruă, hơdôm Gơnong bruă ia jrao kơtưn lăng tui hơdôm mơnuih đing đăo ƀơi bah amăng jang guai dêh čar, ƀơi hơdôm anih anom ia jrao hăng pơphun lăi pơhing pơđĭ tui tơlơi pơmin kơ mơnuih ƀôn sang kơ tơlơi ruă djơ̆ čut kra hăng hơdôm bruă pơgang hlôm hlâo jăng jai./.

Siu H’ Prăk: Pơblang