VOV4.Jarai-Tlam lơ 6/9, grup hyu mă bruă mơ̆ng Ding jum ia jrao yua kơ Kơ-iăng Khua ding jum, ơi Đỗ Xuân Tuyên ngă khua khul hơmâo mă bruă hăng Jơnum min mơnuih ƀôn sang tơring čar Dak Nông kơ bruă pơđĭ kyar pơkra ia jrao hăng pơjrao tui hơdră ia jrao akha kyâo laih anun ĕp lăng bruă ngă tui man pơdong bruă ia jrao pơ kual plơi pla, mă yua prăk čan mơ̆ng ODA. Ƀơi mông jơnum, Kơ-iăng Khua ding jum ơi Đỗ Xuân Tuyên rơkâo, Dak Nông kiăng đing nao pơđĭ kyar mơnuih mă bruă gah ia jrao akha kyâo, jŭ yap glăi mrô mơnuih mă bruă amăng Khul pơjrao hăng ia jrao akha kyâo ƀơi sang bruă ia jrao tơring glông, pơđĭ tui bruă ngă hmua pla đang jrao akha kyâo amăng sang ia jrao să; laih dơ̆ng pơkă hnong pơđĭ kyar anih pla jrao akha kyâo, boh nik ñu pla jrao akha kyâo amăng đang kyâo glai; pơhưč tuh pơ alin pla kyâo jrao hăng lir hơbit bruă ba tuai hyu ngui.

Pơdjơ̆ nao bruă tlâ̆o vaccine pơgang Covid 19, Kơ-iăng Khua ding jum git gai brơi pơđĭ tui dơ̆ng bruă tlâ̆o pơgang brơi djop mơnuih kiăng pơgang klin khut khăt. Hăng bruă blơi prăp gơnam yua gah ia jrao, juă nua blơi, Kơ-iăng Khua ding jum rơkâo Dak Nông sem glăi djop hră pơtrun mơ̆ng kơnuk kơna pioh rơkâo pơsir hĭ tơlơi tơnap tap, gun gan pơblih glăi hơdôm tơlơi aka ƀu gêh găl.

Nay Jek: Pơblang