VOV4.Jarai - Ră anai, Anom bruă ia jrao rŏng lŏn tơnah (WHO) ăt lăng Covid-19 lĕ klin hŭi rơhyưt hăng glăk bơngŏt amra ƀuh dong hơdôm djuai klin phrâo čeh čar mơng virus Sars-Cov2. Ƀơi Việt Nam, mah hơmâo lu mơnuih kiăng kơ lăng klin Covid-19 jing kar hăng hơdôm tơlơi ruă kă pơkŏn samơ̆ tui hăng ing rơgơi gah bruă ia jrao, kơnong lăng tơlơi anai kar hăng anŏ prap lui pơgi kơdih đôč. Ding jum ia jrao pơsit tong, ră anai aka ƀu dưi pơmĭn klin kar hăng tơlơi ruă pơkŏn. Ƀơi dêh čar ta klin kheng phrâo mơng klin hŭi rơhyưt hơdai nao klin ngă ruă rơnang, yua anun aka ƀu dưi lăng klin Covid-19 kar hăng tơlơi ruă pơkŏn. Ƀing rơgơi kơhnâo brơi thâo, Việt Nam kiăng tŏ tui grum hrŏm kjăp hăng anom bruă ia jrao rŏng lŏn tơnah kah hăng djop khul grup amăng jar kmar laih dong hơdôm dêh čar pơkŏn kiăo tui lăng na nao klin Covid-19 lar hyu amăng mơnuih mơnam. Mơng anun pơphô bruă kơ Kơnuk kơna pơsit lăng klin Covid-19 kar hăng tơlơi ruă pơkŏn amăng hrơi blan lăp djơ̆ hloh, him lăng amăng hơdôm blan rơnuč thun kah mơng dưi sem lăng tơlơi anai, yua anun kiăng rang kơđiăng amăng pơgang klin.

Siu Đoan: Pơblang