VOV4.Jarai-Lơ 4/8, yă Đào Hồng Lan, Khua jăng jai Ding jum ia jrao ngă khua khul nao mă bruă hăng tơring čar Dak Lak. Tui hăng tơlơi lăi pơthâo, amăng hơdôm hrơi rơgao, bruă mă pơkă lăng hăng pơjrao duam ruă amăng tơring čar Dak Lak hơmâo pơblih hiam klă, bruă mă mơ̆ng ia jrao kual plơi pla dưi đing nao, djru yôm biă mă amăng bruă pơhlôm, pơgang klin mơ̆ng plơi pla. Kơ bruă pơhlôm, pơgang klin duam ruă, ră anai tơring čar Dak Lak hlăk hơmâo 40 mơta klin ƀă hyu, amăng anun 10 mơta tơlơi ruă klin hrŏ tui, 2 mơta klin đĭ glăi, 27 mơta klin duam ruă jăng jai hlăk hơđong pơkă hăng thun 2021. Lơ̆m anun, 2 mơta klin hlăk tơnap lĕ klin Covid 19 hăng duam đung drah.

Khua jăng jai ding jum ia jrao yă Đào Hồng Lan đĭ pơhiăp amăng mông mă bruă

Pơhiăp ƀơi mông mă bruă git gai, yă Đào Hồng Lan, Khua jăng jai ding jum ia jrao lăi, tơlơi pơhing klin duam ruă hlăk tơnap tap, yua kơ anun yơh gong gai kơnuk kơna tơring čar kiăng hơmâo hơdră git gai tong ten hloh, pơhlôm, pơgang klin, anăm lui klin hơđuh kơtang. Kơ bruă tlâ̆o pơgang vaccine Covid 19, Dak Lak sa amăng 4 boh tơring čar hơmâo mrô mơnuih tlâ̆o arăt tal pă pơñă glăi aset hloh amăng dêh čar, yua kơ anun tơring čar kiăng kơtưn bruă pơtô pơblang, pôr pơthâo mơnuih ƀôn sang khom ha pran jua ngă hrom tlâ̆o pơgang brơi djop.

Nay Jek: Pơblang