Tơdrông tua găn nao rai ƀơi ia krông Vầu pơkuh nao rai 2 boh să Ba-Tư tơring glông Đông Giang, tơring čar Quảng Nam him lăng amra glưh, yua anun arăng khŏm pơgăn hĭ; jơlan phrâo bôr đĭ ia ăt kor đuăi mơn. Ƀu hơmâo jơlan nao rai, rơbêh ha blan anai, ƀing nai ia jrao, ơi ia jrao mă bruă pơ Sang ia jrao să Ba khŏm găn nao ia krông lơ̆m nao mă bruă. Tơlơi glêh glar hloh lĕ bruă pơgiăng, ba mơnuih ruă kraih. Ơi ia jrao Nguyễn Thị Thu Hà, amăng bruă ƀơi sang ia jrao să Ba brơi thâo:

“Tơdrông joh yua anun ƀing gơmơi khŏm găn nao ia krông lơ̆m nao mă bruă, ia rô kơtang, amuñ ngă ia ƀlung, ƀing gơmơi khŏm rok tui tơdrông hơđăp. Jơlan nao rai glêh tơnap, mơnuih ruă kraih ba nao sang ia jrao kaih, ngă hŭi rơhyưt biă mă”.

Ơi ia jrao Phạm Thị Kim Bằng, Khua sang ia jrao să Ba brơi thâo, sang ia jrao tŭ mă khăm, pơjrao brơi rơbêh 600 boh sang anŏ gah 2 boh să Ba hăng Tư, tơring glông Đông Giang, tơring čar Quảng Nam samơ̆ kơnong hơmâo 6 biên chế đôč. Akŏ thun anai, 2 čô mơnuih pơplih anih mă bruă nao pơ kual dơnung, kơnong dŏ 4 čô pơhlôm brơi kơ bruă khăm, pơjrao truh pơ bruă pơjrao mơnuih ruă kraih, sĭ lơ̆m rơka rơkač, mă tơkeng…Ơi ia jrao Phạm Thị Kim Bằng brơi thâo, ƀing ơi ia jrao, nai ia jrao kiăng pơplih mă bruă na nao.

“Ƀing nai ia jrao dŏ glăi hơmâo 4 čô mă bruă glêh glar biă mă, mă bruă tơhrơi kah hăng mlăm, lu wŏt ƀu dưi pơjrao brơi lăp djơ̆. Sang ia jrao kual čư̆ siăng jơlan nao rai tơnap tap yua anun djop mơta tơlơi khŏm thâo yơh. Lăi pơthâo khua mua laih samơ̆ ƀing gơñu brơi thâo thun laih rơgao ƀing nai ia jrao pơplih bruă ăt lu mơn. Ră anai, Sang ia jrao kơƀah mơnuih mă bruă. Ƀơi kual čư̆ siăng tơlơi hơdip tơnap tap yua anun adơi ayong mă bruă amlaih mơtăm. Bruă mă lu samơ̆ prăk apah aset đôč. Ƀing nai ia jrao mă bruă rơbêh 10 thun laih samơ̆ prăk apah kơnong 5 klăk truh pơ 5 klăk 500 rơbâo đôč”.

Abih bang nai ia jrao ƀơi kual čư̆ siăng lĕ mơng kual dơnung adih. Lu mơnuih hơdip ataih mơng plơi pla sui thun laih. Tui hăng nai ia jrao Nguyễn Thị Hương Thảo, sang ia jrao tơring glông Đông Giang lĕ sa amăng mrô anun. Sang anŏ Thảo ƀơi tơring glông Đại Lộc, yua jơlan nao rai tơnap tap hăng bruă mă lu dong yua anun rơbêh 10 thun anai kơnong hrơi năm, hrơi tơjuh Thảo kah glăi čuă rơkơi hăng ană anet dong. Đa amăng hơdôm hrơi hơmâo klin kheng, ha blan, ƀudah hơdôm blan kah mơng glăi pơ sang:

“Bruă mă ƀơi sang ia jrao tơring glông Đông Giang lu biă mă mơ̆ prăk apah aset đôč. Čang rơmang gưl glông hơmâo hơdră djru brơi ƀing nai ia jrao kual ataih, asuek kar hăng ƀing gơmơi kiăng bong glăi ƀing nai ia jrao”.

Bruă mă mơng nai ia jrao glêh tơnap yơh, hăng ƀing nai ia jrao kual ataih, kual mơnuih djuai ania ƀiă tơlơi tơnap đĭ dua wŏt. Sit biă ñu, tơdơi kơ 2 thun klin Covid-19 lar hyu, jai hrơi jai hơmâo lu mơnuih hơdai nao mă bruă pơ kual dơnung, đa hơmâo mơnuih pơdơi bruă ngă kơ kual čư̆ siăng kơƀah ƀing nai ia jrao. Ơi ia jrao Lê Thị Quyết, Khua sang ia jrao tơring glông Đông Giang brơi thâo, sang ia jrao phrâo pơhrua sa, dua čô mơnuih pơmut biên chế samơ̆ pơhmu hăng tơlơi sit nik, ăt aka ƀu djơ̆ hăng tơlơi kiăng ră anai:

“Tui hăng biên chế arăng jao gap ƀrô samơ̆ pơhmu hăng bruă mă, mơnuih mă bruă mut biên chế dŏ aset yua anun ƀu pơhlôm djop mơnuih mă bruă. Kiăng hơmâo hơdră djru brơi gơnong bruă ia jrao kiăng ƀing nai ia jrao hơđong, sit biă ñu hăng hơdôm boh sang ia jrao kual čư̆ siăng tui hăng anai”.

Bruă mă glêh tơnap biă mă lơ̆m anun prăk apah aka ƀu lăp djơ̆ hăng bruă mă lĕ tơlơi phun ngă ƀing nai ia jrao pơdơi bruă lu biă mă ƀơi hơdôm boh ƀon lan. Kơnong ƀơi tơring čar Quảng Nam, kơnong 6 blan akŏ thun anai hơmâo giăm 50 čô nai ia jrao rơkơi pơdơi bruă. Ƀơi kual čư̆ siăng, kual mơnuih djuai ania ƀiă, ƀing nai ia jrao, ơi ia jrao plih nao mă bruă pơ kual dơnung jai hrơi lu tui amăng bruă bơwih brơi tơlơi suaih pral kual mơnuih mơnuih djuai ania ƀiă bưp tơnap tap. Ơi Mai Văn Mười, Khua gơnong bruă ia jrao tơring čar Quảng Nam brơi thâo, gơnong bruă phrâo pơphun ĕp pơmut ƀing nai ia jrao brơi gơnong bruă ia jrao, pơsir hĭ bruă kơƀah nai ia jrao, ơi ia jrao ră anai:

“Amăng hrơi blan laih rơgao, gơnong bruă hơmâo pơphun ĕp pơmut giăm 100 čô ơi ia jrao hăng hơdôm rơtuh čô nai ia jrao hrăm gưl prong. Tơring čar Quảng Nam ăt hơmâo bưp ƀô̆ mơta hăng pơ alum pran jua adơi ayong laih dong hluai tui tơlơi sit nik ƀơi ƀon lan jao bruă brơi kơ lăp djơ̆. Khua mua hơdôm boh tơring glông kual ataih ăt đing nao biă mă kơ bruă ĕp brơi anih dŏ brơi ƀing ataih mơng plơi pla. Gơnong bruă glăk hơmâo hră mơ-it Khul pơ ala mơnuih ƀon sang tơring čar kơ bruă pơhrui aset ƀơi hơdôm boh sang ia jrao tơring glông. Sit biă ñu ƀơi kual čư̆ siăng ngăn drăp kơnuk kơna hơmâo djru brơi prăp apah kơ mơnuih apăn bruă”.

Gong gai hăng gơnong bruă bơdjơ̆ nao tơring čar Quảng Nam čang rơmang Kơnuk kơna tañ hơmâo hơdră bruă ĕp pơmut, hơmâo prăk apah lăp djơ̆ kiăng bong glăi ƀing nai ia jrao, sit biă ñu lĕ ƀing nai ia jrao, ơi ia jrao mă bruă ƀơi kual ataih, asuek.