VOV4.Jarai - Hrơi blan rơgao, lu tơring čar amăng dêh čar ta lăi hrom, tơring čar Dak Lăk lăi hơjăn kơƀah ia jrao, gơnam yua gah ia jrao ngă kơ mơnuih ƀon sang bơngơ̆t biă. Phrâo anai, Khua dêh čar ơi Phạm Minh Chính git gai jơnum Khua mua Kơnuk kơna kơ bruă anai, amăng anun lăi nao tơhnal gal hră pơ-ar pơjuă nua tuh pơ plai blơi gơnam. Khua dêh čar ta kiăng ƀơi anăp lĕ Ding jum ia jrao git gai ngă hrŏm hăng hơdôm ding jum, anom bruă bơdjơ̆ nao lăng glăi abih bang tơlơi phiăn gah bruă blơi ia jrao gun, gơnam yua gah ia jrao. Hluai tui anun thâo ba tơbiă hơdră ngă bruă, ngă hră pơ-ar tui tơlơi dưi.

Glăk dŏ wai rơkơi ñu pơ Sang ia jrao Đại học Buôn Ma Thuột, Dak Lăk, pô anai brơi thâo, sui mơng anai 5 hrơi, mơnuih amăng sang ñu ruă tơtăng ară drah hơtai boh laih anun hơmâo ba nao pơ Sang ia jrao prong kual Dap Kơdư. Lơ̆m khăm lăng, ƀing ơi ia jrao brơi thâo rơkơi pô anai khŏm dưm stent ară drah arăng iâu mạch vành kah mơng dưi hơdip. Khă hnun, yua Sang ia jrao ƀu hơmâo ôh măi anai anun jing dưi djru hơdip brơi jăng jai, laih anun kiăng sang anŏ ñu ba nao pơ sang ia jrao pơkŏn:

“Ƀing ơi ia jrao dŏ pơjrao ƀơi anun gơñu djru brơi jăng jai, gơñu lăi anai lĕ tơlơi ruă kơtang biă, dŏ pioh lui pơ anai lĕ djai đôč, yua dah ƀơi anai ƀu hơmâo măi mok pơjrao ôh”.

Ƀu kơnong kơƀah măi mok gơnam yua gah ia jrao đôč ôh, lu mơnuih ruă ƀơi Dak Lăk ăt tơnap mơn lơ̆m nao blơi ia jrao pơ anih sĭ ia jrao amăng Sang ia jrao. Bruă kơƀah ia jrao hăng măi mok hơmâo ơi Nguyễn Đại Phong, Khua sang ia jrao prong kual Dap Kơdư pơsit laih. Ơi Phong brơi thâo, phun tơhnal ñu lĕ aka ƀu dưi gơgrong tuh pơ plai blơi gơnam prong gah tơlơi dưi mơng Gơnong bruă ia jrao Dak Lăk.

“Ră mông anai dŏ glăi 2 mrô gơgrong tuh pơ plai blơi gơnam aka ƀu gêh gal tơlơi phiăn, kah hăng gơgrong tuh pơ plai lăp djơ̆ laih samơ̆ hơmâo gơnam aka ƀu thâo rơđah nua, aka ƀu hơmâo amăng akŏ bruă mơng Ding jum laih anun hơmâo mơn hră pơ-ar aka ƀu giong, laih anun bruă gơgrong blơi măi stent mạch vành, amăng hrơi blan rơgao sa, dua boh sang ia jrai pơjrao ruă hơtai ƀơi Hà Nội hăng sang ia jrao pơkŏn bơdjơ̆ nao tơlơi phiăn blơi stent mạch vành, anun jing bruă gơgrong blơi stent mạch vành ngă kơ kông ti kơđiăng hloh, ngă tŏng ten hloh, sang ia jrao glăk sem lăng mơn. Tơdah ƀu ngă djơ̆ lĕ soh tơlơi phiăn”.

Ơi Nay Phi La, Khua gơnong bruă ia jrao tơring čar Dak Lăk brơi thâo, mrô jŭ yap blung a, ƀơi hơdôm anih khăm pơjrao tơlơi ruă amăng tơring čar glăk kơƀah hơdôm mơta gơnam pioh khăm pơjrao tơlơi ruă kah hăng: ia jrao pơgang, ia jrao hơmâo generic yôm jing ia jrao djru pơjrao ječ brơi mơnuih ruă kraih. Tui hăng ơi Nay Phi La, hơmâo tơlơi kơƀah ia jrao, gơnam yua gah ia jrao lĕ yua klin Covid-19 sui 2 thun, ngă đut tơhnal anih juăt blơi yua gơnam, nua gơnam ƀu hơđong, logistic lêng đĭ soh, anun jing tơnap biă mơng hơmâo nua lăp djơ̆. Hrŏm hăng anun, bruă blơi măi mok gah ia jrao dŏ tơnap hloh dong yua dah hrŏm sa djuai măi samơ̆ mrô ñu phara, anŏ klă gah kĭ thuâ̆t phara mơn anun jing nua ñu amra phara mơn. ia jrao hơmâo kah jing 5 grup pioh gơgrong tuh pơ plai, samơ̆ gơnam yua ia jrao aka ƀu kah phara ôh, aka ƀu yap ôh anŏ hmư̆ hing, anŏ klă mơng anih pơkra anun jing nua ñu phara mơn. Tơlơi anai ăt pơgăn mơn kơ bruă pơjuă nua gơgrong blơi gơnam.

Kơƀah ia jrao hăng măi mok ia jrao jing ngă bruă khăm pơjrao ƀơi Sang ia jrao prong Dap Kơdư tơnap mơn.

Kiăng pơsir brơi tơlơi tơnap jăng jai, Gơnong bruă ia jrao kiăng hơdôm anom bruă sĭ mơdrô ia jrao kiăo tui hră kĭ ngă hrŏm djru ba ia jrao amăng tơring čar. Sui thun yun blan, tơring čar amra akŏ pơdong anom bruă pơjuă nua hơjăn djru brơi hơdôm boh sang ia jrao huăi tơnap yua tơlơi phiăn.

“Ƀing gơmơi lăi pơthâo hăng Jơnum min mơnuih ƀon sang tơring čar khŏm akŏ pơdong hlao anom bruă pơjuă nua gơgrong blơi gơnam yua ia jrao pơƀut kơ abih bang hlao. Čih pơkra anăn păn ia jrao gun hơjăn kơ tơring čar kiăo tui tơhnal ta tuh pơ plai blơi blung a, čih pơkra tơlơi phiăn pơgang ba ăt kah hăng djru gah tơlơi phiăn, prăk kăk kơ ƀing apăn bruă gum nao pơjuă nua blơi gơnam”.

Amăng lơ 23/6 phrâo rơgao, Khua dêh čar ơi Phạm Minh Chính git gai mông Jơnum khua mua Kơnuk kơna kơ bruă brơi ia jrao, gơnam yua gah ia jrao hăng hơdôm hơdră pơhlôm hơmâo mơnuih mă bruă kơ sang ia jrao. Tui hăng tơlơi lăi pơthâo mơng Ding jum ia jrao, ră anai glăk kơƀah ia jrao ƀơi hơdôm boh tơring, sang ia jrao gơnong dlông. Tơhnal phun ñu lĕ yua mơnŏng pioh pơkra ia jrao, gơnam tam kơƀah, nua pơmă, bruă blơi ia jrao, gơnam yua gah ia jrao, ia jrao hoá chất, sinh phẩm pioh pơgang klin kheng hăng khăm, pơjrao tơlơi ruă jai tơnap hloh. Lăp đing nao lĕ arăng bơngơ̆t, hŭi soh, hŭi arăng hyu hơduah ĕp, sem lăng, ƀu khin ngă, ƀu khin blơi gơnam ôh.

Tum pơƀut glăi ƀơi mông jơnum, Khua dêh čar ơi Phạm Minh Chính črâo rơđah, tơhnal phun mơng ta, hăng bruă pơphun pơjuă nua gơgrong blơi gơnam hơmâo ngă kaih; aka ƀu gir pơjuă nua ia jrao djơ̆ hăng tơlơi hơmâo sit ƀơi anih sĭ mơdrô.

“Kâo kiăng ngă tui klă tơlơi phiăn glăk hơmâo kơ bruă pơjuă nua blơi ia jrao ƀơi gơnong dlông wơ̆t hăng ƀơi tơring čar; hluai tui pran jua ƀing ta khŏm ngă rơđah rơđông, djơ̆ hăng tơlơi hơmâo ƀơi anih sĭ mơdrô, pơgăn hưp ham ƀong kông ngăn, pơhlôm brơi hơmâo djŏp ia jrao yua kơ sang ia jrao. Ƀơi anăp lĕ khŏm pơhlôm hơmâo ia jrao mă yua tui hră pơhlôm nua. Lăng glăi, kiăng kơnuk kơna wai lăng klă hloh dong ƀơi hơdôm anom bruă bơdjơ̆ nao đah mơng huăi kaih amăng bruă brơi hră yua ia jrao; tañ pơkra glăi, pơhrua tui hơdôm tơlơi pơkă đah mơng tañ ngă amuñ brơi bruă ngă hră pơ-ar. Kah pơpha bruă mă kơ rim anom bruă mơng ngŏ truh pơ yŭ đah mơng blơi gơnam yua gah ia jrao, kiăo tui hơnong pơkă laih anun pơtrut hyu pel ĕp, wai lăng”.

VOV  Tây Nguyên: Čih - Siu H’Mai: Pơblang