VOV4.Jarai - Ƀơi kual Dap kơdư, klin Covid-19 glăk lar hyu kơtang ƀơi Dak Lak hăng Lâm Đồng. Tui hăng anom bruă wai pơgang klin tơring čar Dak Lak, truh 16 mông lơ 21/2, đơ đam tơring čar hơmâo 988 čô mơnuih ƀă klin Covid-19 phrâo hăng 3 čô mơnuih djai. Jŭ yap amăng 1 wŏt hrơi tơjuh giăm anai, Dak Lak hơmâo mrô mơnuih ƀă klin lu hloh dong mơng hlâo anun, hăng 4.145 čô. Abih bang čơđai anet, čơđai hrăm mơng anih 1 truh pơ anih 6 brơi pơdơi hĭ jang jai, pơwŏt glăi hrăm lăng nao rai mơng ataih hăng pơplih glăi hơdră pơtô hrăm phrâo.

Grup djru pơjrao brơi mơnuih F0 pơ sang ƀơi Dak Lak

Ƀơi tơring čar Lâm Đồng, klin Covid-19 ăt lar hyu kơtang, hăng 2.364 čô mơnuih ƀă klin amăng rơwang hrơi tơjuh laih rơgao, amăng lơ 21/2 hơmâo dong 3 čô mơnuih djai. Gơnong bruă ia jrao tơring čar Lâm Đồng hơmâo hră pơ-ar git gai djop sang ia jrao tơring glông, plơi prong amăng tơring čar pơphô bruă brơi Jơnum min mơnuih ƀon sang tơring čar kiăng kơ pok hơdôm grup djru gah ia jrao tơl sang, laih dong akŏ pơjing grup hyu khăm pơjrao brơi mơnuih ƀă klin Covid-19 amăng plơi pla kiăng kơ gum hrŏm hăng gơnong bruă ia jrao bơwih brơi klă hloh brơi ƀing mơnuih ƀă klin.

Siu Đoan: Pơblang