Mơ̆ng akŏ thun truh ră anai tơring čar Dak Nông hơmâo čih pioh rơbêh 2 rơbâo čô mơnuih ƀă klin duam đung drah, đĭ hloh 8,7 wơ̆t pơkă hăng thun hlâo. Klin duam đung drah ƀă truh pơ 71 boh să, phường, tơring kual ƀơi Dak Nông. Amăng anun, tơring glông Dak Mil, Čư̆ Jŭt, Dak Song hăng plơi prong Gia Nghĩa yơh hơdôm anih hơmâo mrô mơnuih ƀă lu hloh. Tui hăng ơi Hùynh Thanh Huynh, Kơ-iăng Khua Gơnong bruă ia jrao tơring čar Dak Nông, duam đung drah amăng tơring čar tơnap biă mă, hơmâo rơwang hrơi tơjuh čih pioh truh 170 čô mơnuih duam. Kiăng pơgăn klin duam đung drah lar hyu kơtang, anom bruă ia jrao pơtrut kơtang bruă pơtô pơblang, brơi mơnuih ƀôn sang pơđĭ tui tơlơi thâo hluh; iâu pơthưr djop anom bruă, sang bruă gong gai kơnuk kơna pơtô lăi, pơtrut mơnuih ƀôn sang ngă hrom pơrơgoh jum dar anih dŏ gŏ uă sang anŏ, pruih ia jrao pơdjai ană keč, arong aruač mač kman. Ơi Huỳnh Thanh Huynh brơi thâo:

“Hơdră phun ngă tui pơ anăp adih lĕ pơtum bruă pơsir hĭ anih hơmâo klin, rơnăk jum dar sang dŏ, hrom hăng anun pơtrut tơlơi gơgrong mơ̆ng djop ping gah, gong gai kơnuk kơna, biă mă ñu khul grup hyu rơmet ngă rơgoh plơi pla. Hrom hăng anun, anom bruă ia jrao amra mă yua rơdêh pơgiăng hyu ia jrao pruih pơdjai kman, ană keč anih keč boh kiăng pơgăn kman klin ƀă hyu duam ruă. Rơngiao kơ anun, ƀing gơmơi pơtum nao kơ bruă pơtô hrăm pơsir mơtam hơdră pơjrao duam ruă hăng pơpha djop ia jrao, gơnam yua pơjrao duam ruă pioh bơwih brơi kơ bruă pơjrao duam ruă”.

Ƀing nai ia jrao pok pơhai pruih ia jrao ƀơi hơdôm anih hơmâo klin duam đung drah

Ƀơi tơring čar Dak Lak, tui hăng mrô jŭ yap mơ̆ng Anom bruă pel ĕp tơlơi duam ruă tơring čar, mơ̆ng akŏ blan 10 truh ră anai, duam đung drah amăng tơring čar ăt ƀă tơnap tap biă mă, mrô mơnuih ƀă jai hrơi lu, hơmâo laih mơnuih djai yua duam đung drah. Mơ̆ng akŏ thun truh ră anai, hơmâo 7 rơbâo čô mơnuih ƀă duam đung drah. Lăp đing nao, amăng blan 10 phrâo rơgao hơmâo 2 čô mơnuih djai yua duam đung drah.

Tui hăng ơi Hoàng Hải Phúc, Kơ-iăng Khua wai lăng anom bruă ĕp kman duam ruă tơring čar Dak Lak, hăng adai hơjan sui hrơi amăng tơring čar, tơlơi pơhing duam đung dra jai kơtang tui pơ anăp adih. Kiăng pơgăn ƀiă klin duam đung drah ƀă hyu, anom bruă ia jrao tơring čar Dak Lak, kiăng kơtưn amăng bruă pơtô lăi, brơi mơnuih ƀôn sang thâo hluh amăng bruă pơhlôm pơgang mă pô; pok pơhai hơdră rơnăk anih dŏ jum dar, pơgang ayuh hyiăng hơdjă, pơdjai ană keč, boh keč amăng pum rơguh, amăng ia plăng rô lơ̆m plơi pla, sang anŏ.

“Anom bruă ĕp kman duam ruă tơring čar hơmâo lăi pơthâo hăng lu hră pơar kơ Gơnong bruă ia jrao kiăng pơtruh brơi khua mua jơnum min mơnuih ƀôn sang tơring čar git gai djop anom bruă amăng tơring čar khom ngă hrom sa amăng plĕ, djru pơhlôm pơgang klin duam đung drah. Biă mă ñu, pôr tơlơi pơhing, hơmâo na nao jơlan hơdră pôr jua pơhiăp, pơdah rup, pôr tơlơi pơhing kơ abih bang thâo laih anun pơdah thâo amăng plăng tơlơi pơhing mơnuih mơnam facebook, Zalo, kiăng thâo hơdră pơhlôm pơgang klin. Ƀing gơmơi ăt pơtrut pơsur mơnuih ƀôn sang thâo pơgang mă drơi jăn pô, sit duam, ruă akŏ, ruă hrŏm hrăm amăng drơi jăn, duam na nao pơiă drơi dua hrơi ƀu lưh ôh lĕ, khom nao pơ sang ia jrao mơtam yơh”.

Yap mơ̆ng akŏ thun truh ră anai, tơring čar Gia Lai hơmâo rơbêh 6.400 čô mơnuih duam đung drah ƀơi 287 anih ƀă djop să, phường, tơring kual; hơmâo sa čô mơnuih djai. Lu biă mă ñu amăng blan 9, mrô mơnuih duam đung drah lu hloh, rơbêh 2.400 čô. Lu tơring glông, plơi pla hơmâo mrô mơnuih ƀă kah hăng tơring glông Đak Pơ, plơi prong Plei Ku, tơring glông Krông Pa….Djop sang ia jrao pơtum lu ơi ia jrao pioh pơjrao tơlơi duam ruă kơ mơnuih duam đung drah.

Tơring čar Quảng Nam mrô mơnuih ƀă duam đung drah lu hloh kual Tong krah

Giăm tơring čar gah kơdư kual Dap Kơdư lĕ tơring čar Quảng Nam, klin duamđung drah ăt hơđuh rai kơtang mơ̆n. Truh ră anai, tơring čar hơmâo mrô mơnuih ƀă duam đung drah lu biă mă kual Tong krah truh 12 rơbâo 100 čô, đĭ hloh 22 wơ̆t pơkă hăng tal anai mơ̆n thun hlâo, hơmâo laih sa čô mơnuih djai. Anom pơjrao mơnuih duam ruă ƀă kman, Sang ia jrao prong kual cư̆ siăng gah kơdư Quảng Nam, rim hrơi tŭ jum 40-50 čô mơnuih duam đung drah. Kơnong ƀơi tơring glông Đaị Lộc, tơring čar Quảng Nam hơmâo čih pioh truh 4.300 čô mơnuih duam, amăng anun hơmâo 29 čô mơnuih duam kraih hăng 300 čô mơnuih hlăk dŏ pơjrao ƀơi sang ia jrao prong kual čư̆ siăng gah kơdư Quảng Nam.

Ơi Nguyễn Văn Văn, Kơ-iăng khua Gơnong bruă ia jrao tơring čar Quảng Nam brơi thâo, ră anai, adai hơjan ƀu lê̆ anŏ, ngă kơ kman duam đung drah tañ ƀă hyu biă mă ñu keč brung pô ba kman duam đung drah hăng arong aruač, kman jum dar sang anih hơmâo ia djrưh. Anom bruă ia jrao tơring čar Quảng Nam ngă hrom jơnum min mơnuih ƀôn sang djop tơring glông akŏ pơjing khul ngă bruă kơsung nao mă bruă pruih ia jrao pơdjai kman ană keč, arong aruač kman klin.

“Kơtưn bruă hyu ĕp lăng, pơsir djop anih hơmâo klin mơ̆ng blung a. Hrom hăng anun, pơtrun hiăp djop sang ia jrao khom kơđiăng yua kơ duam đung drah amuñ huăl hăng tơlơi duam pơkŏn ngă pơ-iă drơi. Khom prăp lui djop gơnam yua ma wbruă, ia jrao gun amra pơsir mơtam klin kheng. Djop sang ia jrao amra prăp lui ia jrao srôm, jur ia kơ mơnuih duam, prăp rơdêh pơgiăng mơnuih duam kraih amăng mông ječ ameč”.

Kiăng pơgang tơlơi suaih pral kơ drơi jăn pô, sang anŏ hăng mơnuih jum dar, Ding jum ia jrao iâu pơthưr djop mơnuih rĭm wơ̆t hrơi tơjuh pioh 10 mơnit kih rơmet pơdjai ană keč, rơnăk agaih sang anŏ gŏ uă. Duñ abih djah djâo khăng, čơlŭ mong pơčah, anăm hơmâo gơnam ia dong anih keč boh. Pit đih mơmŏt mlam khom akă musker, wơ̆t pit đih amăng tơhrơi hai, kiăng huăi hơmâo anih keč boh. Yang hrơi ăt khom pơgang anăm brơi keč kĕ, pruih ia jrao pơdjai keč, pơgang keč kĕ, yua keč brung yơh pô ba kman duam đung drah.