Tui hăng Ding jum ia jrao, ră anai mrô mơnuih djơ̆ Covid-19 lu biă ñu pơ̆ kual Kơdư dêh čar – anih glăk amăng hơdôm hrơi pơplih bơyan hăng mrô mơnuih ruă čih pioh amăng 10 hrơi rơgao đĭ 4,2 wot bơhmu hăng hlâo kơ anun. Hrom hăng anun, bruă gôm adung mơbah ƀơi anih hmâo lu mơnuih, anom pel ĕp pơjrao tơlơi ruă djơ̆ anô̆ ñu hmâo anih akă ƀu pơhlôm ôh.

Ƀơi dêh čar ta, pơplih mơng kơman klin XBB.1.5 hmâo mơng blan 1/2023 hăng dưi hmâo Ding jum ia jrao lăi pơtă hlâo tơlơi pơplih mơng kơman klin amra lar hyu tañ hloh hăng hơdôm anô̆ brơi ƀuh gah rơngiao kah hăng pơtuk or, phơ-añ, ƀlĕ ia adung... Ră anai ăt čih pioh mơn anô̆ pơplih mơng djuai kơman anai ƀơi ƀing hmâo tơlơi ruă djơ̆ klin. Khă mrô mơnuih djơ̆ kơman glăk đĭ pơhmu hăng hơdôm rơwang hrơi tơjuh hlâo kơ anun, samơ̆ tui hăng Nai tha prin, nai prin tha Phan Trọng Lân, Khua Anom bruă ia jrao pơhlôm hlâo, Ding jum ia jrao, hăng pơplih mơng klin ruă kah hăng ră anai, klin ăt ƀơi rơnoh 1 mơn, anun lĕ rơnoh mơtah:

 “Hăng rơnoh klin anai anun lĕ ƀơi gưl să, phường, ƀing ta amra thâo tañ hloh, rơguăt hloh, guang dar kual pơplih tañ hloh ƀu pioh bơdjơ̆ nao hơdôm bruă mă pơpkon, hăng pơsir klin ruă ƀơi phun, anun lĕ pơsir klă hloh pioh huăi bơdjơ̆ nao tơlơi pơđĭ kyar bơwih ƀong, mơnuih mơnam, tơlơi anun hluai tui lu kơ tơlơi gum hrom mơng hơdôm anih anom, mơng anun bĕ tơlơi hual kơdual, ƀu đing nao mơng mơnuih ƀôn sang”.

Khă ră anai mrô mơnuih ruă klin kraih amăng mrô mơnuih djơ̆ kơman ƀu hmâo tơlơi đĭ lu lăp yap ba, samơ̆ Nai tha prin, nai prin tha Phan Trọng Lân ăt pơtă mơn, amăng hơdôm hrơi anai, khom lăng tui kơjăp hơdôm mrô. Hơdôm bôh tơring čar, ƀôn prong pơtrut kơtang bruă pel ĕp rơnoh klin ngă, lăi pơthâo tơlơi pơhing kiăng mơnuih ƀôn sang thâo hăng pơgang pơgăn, biă ñu tơlơi klin ruă dơ̆ hơpă, amra wai lăng dơ̆ anun:

 “Ră anai ƀing ta ƀuh lĕ tơhnal ñu dơ̆ hơpă, wai lăng dơ̆ anun hă kiăng lăi ƀing ta ƀu hmâo hơdư̆ ôh hơdôm bruă mă hơpă mơ̆ bôh than ba jơlan hlâo mơng ƀing ta; tlâ̆o vaccine brơi abih bang hơdôm hnưr thun tum djop amra hơdư̆ đut hlah hơdôm anô̆ bơdjơ̆ nao. Tui anun tơhnal hmâo samơ̆ tui hluai tơlơi rơđah rơđông samơ̆ ƀu hơdư̆ hơdôm bruă mă hơpă mơng mơnuih mơnam lom ƀơi rơnoh mơtah, anun lĕ rơnoh ƀu rơgao kơ sa”.

Tui hăng ƀing juăt bruă, mrô mơnuih djơ̆ Covid-19 ƀơi dêh čar ta đĭ tañ amăng 10 hrơi rơgao amra yua kơ ƀă djơ̆ klin mơng pô tơdơi kơ tlâ̆o vaccine ƀudah mơnuih tom djơ̆ kơman klin anai hmâo hrŏ trun anun ƀă glăi tơlơi ruă. Bruă mơnuih ƀôn sang kơtưn bơkơtuai, nao rai ăt ngă gal mơn kơ tơlơi lar hyu. Bôh nik ñu, mrô mơnuih djơ̆ Covid-19 dô̆ lu hloh mrô mơ̆ Ding jum ia jrao lăi pơthâo rim hrơi, yua kơ hmâo lu mơnuih ruă samơ̆ ƀu hmâo nao pel ĕp lăng, pel ĕp mă pô hăng pơjrao ƀơi sang. Pơtŏng sit, mrô mơnuih djơ̆ Covid-19 đĭ, ƀu djơ̆ tơlơi hling hlang ôh, Nai prin tha Nguyễn Lương Tâm, Kơ-iăng Khua Anom ia jrao pơhlôm hlâo (Ding jum ia jrao) brơi thâo, ƀơi rŏng lŏn tơnah ăt hmâo mơn hơdôm tơlơi klin ngă hơmeč đĭ, hơmeč trun:

 “Ƀing ta khom hơđong kiăng wai lăng. Ƀơi Japan, Hàn Quốc, Mi... mrô mơnuih djơ̆ Covid-19 đĭ laih anun trun hăng amra jing tơlơi ruă lar hyu. Ƀing ta khom hơđong pran jua, ngă klă 2 mơta bruă, tlâ̆o vaccine pơgang hlôm hlâo. Hơdôm bôh tơring čar akă tlâ̆o djŏp lĕ khom pok pơhai dong”.

Khă mrô mơnuih ruă Covid-19 hơdôm hrơi giăm anai đĭ samơ̆ giăm truh 4 blan rơgao đơ đam dêh čar ƀu hmâo čih hlơi djai yua kơ ruă anai ôh. Pơkă lăng hlâo mrô mơnuih ruă klin amra đĭ dong samơ̆ amra ƀu ngă rơgao hơnong kơ anom bruă ia jrao yua kơ kah hăng abih bang mơnuih ruă leng kơ hmâo anô̆ pơdah rơnang. Khă hnun hai, hơdôm mơnuih amuñ bơdjơ̆ nao kah hăng: Mơnuih tha rơma, mơnuih hmâo tom tơlơi ruă pơkon... tâ̆o hloh anăm lui raih ôh, yua kơ tơlơi ruă amra ngă kơtang hloh. Tui hăng tơlơi pơtă mơng Ding jum ia jrao, bơnal gôm adung mơbah hăng pơdjai kơman jing bruă mă klă hloh pioh pơgang, pơgăn klin Covid-19. Kơ-iăng Khua Ding jum ia jrao Nguyễn Thị Liên Hương brơi thâo, rim rơwang hrơi tơjuh hơdôm bôh anom apăn bruă mơng Ding jum ăt jơnum lăng nao rai  mơng ataih mơn hăng ƀing juăt bruă mơng Khul ia jrao rŏng lŏn tơnah hăng CDC Mi kiăng pơblang, pơsit tơlơi klin ruă ƀơi Việt Nam, hrom hăng anun ba tơbiă tơlơi pơsit kơ tơlơi ƀuh ƀô̆ ăt kah hăng hơdôm anô̆ bơbeč mơng kơman klin pơplih:

 “Ră anai hơdôm mơnuih ruă Covid-19 đĭ samơ̆ ƀu hmâo mơnuih djai ôh, mrô pơplih jing kơtang đĭ rơnang. Khă hnun hai, ƀing ta ăt kiăng kơđiăng mơn pioh hmâo bruă ngă hmao tlôn hăng Covid-19 ăt kah hăng hơdôm klin ruă pơkon kah hăng duam pơđung drah. Hơdôm bôh tơring čar, ƀôn prong khom pơjing kơčăo bruă pok pơhai hơdôm bruă mă lăp djơ̆ hăng pơpha prăk mă yua kơ hơdôm bruă pơgang pơgăn klin. Hăng vaccine pơgang Covid-19, Anom kơsem min klin ruă dêh čar hăng Anom ia jrao pơgang hlôm hlâo amra ba tơbiă blơi ƀudah rơkâo gum djru hăng mrô hluai tui anun ba tơbiă mơng hơdôm bôh tơring čar, ƀôn prong”./.