Hlăk dŏ ngă hră pơar mut pơkă tơlơi ruă mơta ƀơi sang ia jrao pơjrao ruă mơta Dak Lak, amôn Tôn Nữ Yến Nhi, čơđai sang hră anih 11, sang hră gưl klâo Ea Hleo, tơring glông Ea Hleo brơi thâo, amăng anih gơñu hơmâo lu gơyut ƀă tơlơi ruă mơta hăng pơdơi hrăm hră, ñu lĕ ruă mơta 3 hrơi hăng anai laih, blơi ia jrao tơdjôh pơjrao ruă mơta samơ̆ ƀu hlao ôh anun khom rai pơ sang ia jrao:

“Tơlơi mưn ñu sit tơgŭ mơ̆ng pit 2 gah mơta ƀlit eh mơta sir krep, ƀu anăm blang mơta ôh. Hrơi anai, rai ĕp lăng brơi ơi ia jrao pơjrao brơi, kâo blơi ia jrao tơdjôh mơta năng ai dua klâo hrơi či plai ƀiă mơ̆n thâo laih anun gơnam yua dưm phara soh hăng mơnuih pơkŏn amăng sang anŏ”.

Hăng 800 čô čơđai sang hră hlăk dŏ hrăm, tơdơi kơ jơnum mut thun hrăm phrâo, sang hră gưl sa Lý Tự Trọng, plơi prong Ƀuôn Ma Thuôt hơmâo čih pioh 156 čô čơđai sang hră pơdơi hrăm hră yua ruă mơta. Kơnong mơ̆ng lơ 11/9 truh ră anai sang hră hơmâo 139 čô čơđai ruă mơta hăng mơkrah mrô anun ăt nao sang hră đôč. Nai Lương Thị Bích Nguyên, khua sang hră brơi thâo, lu čơđai sang hră ruă mơta samơ̆ ăt nao hrăm hră đôč, anun tơlơi ruă mơta ƀă hyu hmar biă mă.

Sang hră hơmâo ngă hră pơčrâo anih wai lăng gah bruă ia jrao prăp lui ia hra pơkra giong laih pioh tơdjôh mơta kơ ƀing čơđai sang hră; kơtưn rơnăk rơgoh anih hrăm, amăng sang hră tơdơi kơ mông hrăm giong mơguah hăng tlam; laih dơ̆ng pơtă pơtăn kơ amĭ ama čơđai sang hră, tơdah čơđai sang hră ƀă tơlơi ruă mơta kiăng pơjrao abih pơ sang ƀơ̆i, anăm brơi ƀă bơrơkua amăng sang hră.

“Hơmâo hơdôm čô amĭ ama čơđai sang hră yua sang anŏ tơnap tap, amĭ amă hyu mă bruă pơ ataih anun bruă lăng ba ană bă pơ sang ƀu gêh găl ôh, khom brơi ană nao sang hră đôč, anun yơh tơlơi ƀă ruă mơta amăng sang hră ƀu thâo bĕ hĭ ôh, gơmơi hlăk ngă tui lu hơdră, brơi čơđai truă mơnil, klŭm mâo pơgang mơta, khom rơnăk hơdjă amăng sang hră, rao tơngan re se hăng pơtô brơi čơđai pač ƀô̆ mơta, rao tơngan rơgoh na nao”.

Sang hră gưl muai Hoa Lan, phường Tân Tiến, plơi prong Ƀuôn Ma Thuôt hơmâo 2 boh sang hră čơƀeng dơ̆ng, năng ai 200 čô čơđai sang hră hrăm ƀơi 10 boh anih. Hlâo kơ anun, sa blan, sang hră hơmâo ƀuh mơnuih ruă mơta dua, klâo čô, samơ̆ hơdôm hrơi giăm anai čơđai ruă mơta jai lu tui, truh kơ 20 čơđai ƀă, ră anai sang hră pơtrut bruă pơtô pơblang brơi thâo hơdră pơhlôm pơgang hlâo tong ten hloh. Nai neh Lê Thị Liên, khua sang hră gưl muai Hoa Lan brơi thâo, ră anai hlăk pơtrut kơtang bruă pơtô pơblang hăng pơtô brơi ƀing nai, čơđai sang hră ngă tui djơ̆ tơlơi pơtrun pơhlôm pơgang tui hăng anom bruă ia jrao pơthâo brơi:

"Bruă mă pơgang rơnăk sang hră yơh mrô sa. Sa lĕ pơrơgoh gơnam yua mă bruă hăng gơnam čơđai djă ngui, khom pơpha djă phara soh; dua lĕ hơdôm gơnam yua amăng anih hrăm, ƀing nai juăt djă khom rơnăk rơgoh, pruih ia jrao pơdjai kman; klâo lĕ pơtô ƀing čơđai khom rao tơngan na nao djơ̆ hơdră. Sit ƀuh čơđai ruă mơta sang hră brơi dŏ pơčlah jăng jai ƀu brơi dŏ hrŏm ƀing čơđai suaih pral hŭi ƀă. Lăi pơthâo ƀing nai ia jrao laih anun amĭ ama čơđai sang hră pioh pơjrao tong ten kơ ƀing čơđai ruă mơta”.

Tui hăng ơi ia jrao Lê Dương Thùy Linh, Kơ-iăng Khua sang ia jrao pơjrao ruă mơta Dak Lak lăi, tơlơi ruă mơta ƀơi Dak Lak hơmâo mơ̆ng blan 8. Khă hnun, năng ai 2 wơ̆t hrơi tơjuh hăng anai, mrô mơnuih ƀă ruă mơta lu tui. Ră anai, sa hrơi sang ia jrao čơkă jum pơjrao brơi mơ̆ng 200-300 čô mơnuih ruă mơta, lu kơ čơđai sang hră. Ơi ia jrao Linh brơi thâo, tơlơi ruă mơta juăt ƀă yua mơ̆ng tơngan djă mơnong, ƀă mơ̆ng ia bah, ia mơta, ia mơdung mơnuih ruă ƀudah tui hluai gơnam djă ngui mơ̆ng ƀing čơđai muai, kah hăng akhăn uă ƀô̆, sut ƀô̆ mơta, boh nik ñu amăng dơnao ia arăng mơnơi hrŏm hrăm luai ia....

“Tal klin kheng thun anai kơtang biă mă, rơngiao kơ ñu ngă ruă amăng alăk mơta kman anai ñu ngă truh kơ sơ̆l hăng ruă amăng alăk phun lơ̆m mơta adih, amra ngă mơmŏt mơta tơdơi anai, hơdôm čô mơnuih ruă hyu blơi mă ia jrao hŭi mơ̆n ñu ngă rơnah amăng lăm mơta. Laih dơ̆ng sit ñu ƀă virus tal anai, mơnuih ruă mơta truh duăm, ruă truh jơlan suă pran amăng rơkông đok, laih anun ruă kian pruăi. Ră anai aka ƀu hơmâo vaccin pơhlôm pơgang tơlơi ruă ôh hăng aka ƀu hơmâo ia jrao tơdjôh mơta pioh pơhlôm pơgang lơi, yua anun mơnuih ƀôn sang anăm hyu blơi mă ôh ia jrao pơgang tơdjôh ča čot tơdah ƀu hơmâo ia jrao mơ̆ng sang ia jrao pơcrâo brơi, pơkă lăng tong ten tơlơi ruă”.

Ăt tui hăng ƀing ơi ia jrao lăi mơ̆n, tơlơi ruă mơta lĕ tơlơi ruă đôč đač mơ̆n hăng amra grăng amăng 1-2 wơ̆t hrơi tơjuh; samơ̆ tơdah kraih amra sui truh 1 blan. Khă tui anun, tơdah pơjrao tañ hăng djơ̆ hơdră lĕ tơlơi ruă mơta amra tañ hlao hăng huăi ba truh kơ tơlơi ruă sat pơglăi pơkŏn ôh.