VOV4.Jarai - Lơ 21/2, Anom bruă Kơnuk kơna hơmâo hră pơtrun mơng Kơ-iăng Khua dêh čar ơi Vũ Đức Đam amăng jơnum lăng nao rai mơng ataih đơ đam dêh čar kơ bruă brơi čơđai pơwŏt glăi nao sang hră ƀơi djop ƀon lan. Tui anun, Kơ-iăng khua dêh čar ơi Vũ Đức Đam rơkâo Ding jum ia jrao ječ ameč pơjing akŏ bruă tlâ̆o vaccine brơi ƀing čơđai mơng 5 truh pơ pơgŭ 12 thun; pơtrun tơlơi črâo ba amăng bruă pơčrang lăng, pơčlah hăng ƀing čơđai kiăng pơhlôm brơi lăp djơ̆; črâo ba amăng bruă kiăo tui lăng tơlơi suaih pral brơi ƀing čơđai hơmâo tơlơi ruă kă amăng drơi jăn lơ̆m ƀing gơñu ƀă klin; pel ĕp tơlơi pơkă hrơi mông pơčlah pơ sang hăng ƀing čơđai F1 pơhlôm brơi lăp djơ̆. Ding jum pơtô pơjuăt kiăng tŏ tui pơphun, hruă kjăp, ba tơbiă hơdôm hơdră pơtô hrăm lăng nao rai mơng ataih, lăng nao rai amăng tivi kar hăng bruă yôm phun lơ̆m ngă tui tơlơi pơplih phrâo amăng bruă pơtô hrăm.

Siu Đoan: Pơblang