VOV4.Jarai - Ƀơi tơring čar Kon Tum amăng hơdôm thun giăm anai ƀuh ƀing nai ia jrao, ơi ia jrao ƀơi ƀon lan ngă hră pơ-ar rơkâo pơplih anih mă bruă hăng pơdơi bruă. Hăng hơdôm tơring čar kual čư̆ siăng kriang pơtâo dŏ lu tơlơi tơnap tap kar hăng ƀơi Kon Tum, bruă kơƀah mơnuih mă bruă, biă mă ñu lĕ ƀing mơnuih thâo rơgơi mă bruă sui thun gah gơnong bruă ia jrao glăk ngă bơngŏt amăng bruă bơwih brơi tơlơi suaih pral kơ mơnuih ƀon sang. Ƀơi anăp kơ tơlơi anai, tơring čar Kon Tum ăt hơmâo hơdôm hơdră djru kiăng bong glăi mơnuih mă bruă.

Dong mơng thun 2018 truh ră anai hơmâo laih 59 čô nai ia jrao, ơi ia jrao hrăm gưl prong soh glăk mă bruă ƀơi hơdôm anom bruă khăm pơjrao ƀơi ƀon lan amăng tơring čar Kon Tum rơkâo pơplih anih mă bruă hăng pơdơi bruă. Kơnong 6 blan laih rơgao amăng tơring čar anai ăt hơmâo laih 3 čô ơi ia jrao hăng 1 čô nai ia jrao pơdơi bruă. Yă Huỳnh Thị Hồng, Khua pơ ala mơnuih ƀon sang tơring čar Kon Tum pơdah tơlơi bơngŏt ƀơi anăp kơ bruă lu ơi ia jrao thâo rơgơi mă bruă sui thun khŏm lui bruă:

“Sang ia jrao prong tơring čar Kon Tum mơng mrô II đĭ mrô I prong 750 boh sưng kiăng pơhlôm djop mơnuih mă bruă. Ơi ia jrao hăng nai ia jrao rơkâo pơdơi bruă ƀudah pơplih nao mă bruă pơ hơdôm anih gêh gal kiăng mă bruă sui thun dong, tơlơi anai amra ngă kơƀah mơnuih mă bruă thâo rơgơi, sit biă ñu ƀơi hơdôm sang ia jrao kơnuk kơna akŏ pơdong amăng tơring čar”.

Ƀing ơi ia jrao amăng Sang ia jrao prong tơring čar Kon Tum glăk khăm pơjrao brơi mơnuih duam ruă

Tui hăng ơi Lê Ngọc Tuấn, Khua Jơnum min mơnuih ƀon sang tơring čar Kon Tum, bruă phun ngă rĭm thun tơring čar hơmâo rơbêh 14 čô ơi ia jrao, nai ia jrao rơkâo pơplih anih mă bruă, pơdơi bruă lĕ yua prăk apah hăng anih anom mă bruă ƀu pơhlôm. Sit biă ñu brơi ƀuh prăk pơhrui, hơdră djru brơi mơnuih mă bruă ƀơi hơdôm sang ia jrao ƀon lan yua kơnuk kơna akŏ pơdong amăng tơring čar dŏ aset pơhmu hăng rơnoh pơhrui hrŏm, kah hăng ƀơi hơdôm anih anom ia jrao akŏ pơdong mă hajăn ƀơi hơdôm tơring čar, ƀôn prong pơkŏn. Yua anun tui ơi Lê Ngọc Tuấn kiăng kơ bong glăi mơnuih mă bruă khŏm pơsir hĭ hơdôm tơnap anai ƀơi hơdôm sang ia jrao kơnuk kơna akŏ pơdong.

“Kiăng kơ bong glăi ƀing nai ia jrao, ơi ia jrao ƀing ta kiăng đĭ tui prăk apah brơi ƀing mơnuih mă bruă ƀơi hơdôm anih anom khăm pơjrao yua kơnuk kơna akŏ pơdong. Tuh pơ alin blơi gơnam tam măi mok kiăng pơhlôm brơi anih khăm pơjrao klă hloh. Hơmâo hơdră djru, hăng pơphun pơtô hrăm laih dong kơtưn ngă pô brơi hơdôm anih anom ia jrao yua kơnuk kơna akŏ pơdong kiăng hơmâo lu dong prăk pơhrui brơi kơ ƀing nai ia jrao, ơi ia jrao glăk mă bruă amăng gơnong bruă ia jrao”.

Ƀing nai ia jrao ƀơi tơring čar Kon Tum amăng hơdôm hrơi glêh tơnap amăng pơgang klin Covid-19

Ăt tui ơi Lê Ngọc Tuấn, Khua Jơnum min mơnuih ƀon sang tơring čar Kon Tum, ƀơi anăp kơ tơlơi sit nik, ƀing ơi ia jrao, nai ia jrao ƀơi anih anom ia jrao yua kơnuk kơna akŏ pơdong rơkâo pơplih anih mă bruă hăng pơdơi bruă, thun 2020 khul apăn bruă Ping gah tơring čar Kon Tum hơmâo hơdră djru brơi ƀing mơnuih apăn bruă amăng gơnong bruă ia jrao lơ̆m brơi kiăo tui hrăm chuyên khoa I, II hăng djru brơi prăk hrăm. Jơnum min mơnuih ƀon sang tơring čar Kon Tum ăt rơkâo ba tơbiă akŏ bruă pơđĭ kyar tui mơnuih mă bruă amăng tơring čar truh thun 2030, anăp nao truh thun 2050, amăng anun ba tơbiă hơdră bruă kiăng pơđĭ kyar mơnuih mă bruă brơi gơnong bruă ia jrao. Samơ̆ sit biă ñu brơi ƀuh, hơdôm hơdră djru kiăng kơ ba glăi mơnuih mă bruă amăng gơnong bruă ia jrao ƀơi Kon Tum aka ƀu pok pơhai tŭ yua, ha amăng plĕ yua anun ăt dŏ ƀuh na nao ƀing ơi ia jrao, nai ia jrao rơkâo pơplih anih mă bruă, pơdơi bruă mơng hơdôm anih anom khăm pơjrao yua kơnuk kơna akŏ pơdong.

Siu Đoan: Pơblang