Tân Lập jing sa amăng 3 boh să mơ̆ng tơring glông Kon Braih, tơring čar Kon Tum ƀu hơmâo ơi ia jrao. Ơi ia jrao Y sỹ Nguyễn Thị Thanh Tuyền, Khua sang ia jrao să Tân Lập brơi thâo, phun ñu lĕ blan 1 phrâo rơgao, ơi ia jrao mă bruă pơ Sang ia jrao anai hơmâo pơkiăo nao mă bruă pơ Anom bruă ia jrao kual Đăk Rve. Ƀu hơmâo dong tah ơi ia jrao, bruă mă mơ̆ng Sang ia jrao să Tân Lập ƀu kjăp đơi ôh, tap năng măi mok ba rai pơ anai jing lui soh mơn:

“Lơ̆m ƀing ơi ia jrao ƀu ƀuh, hơmâo măi mok gơnam yua kiăng ƀing ơi ia jrao kah mơ̆ng dưi mă yua kah hăng siêu âm, pơkă hơtai boh jing sang ia jrao să ƀu thâo ngă hơget ôh. Hơmâo boh thâo kĭ thuâ̆t pioh pơ să kiăng hơmâo ơi ia jrao kah mơ̆ng dưi, ia jrao hnun mơn, Sang ia jrao să hơmâo ơi ia jrao kah ia jrao mơ̆ng dưi mă yua”.

Ƀơi tơring glông Kon Braih, tơring čar Kon Tum, bruă kơƀah ơi ia jrao sui amăng lu thun laih laih. Thun 2023, Sang ia jrao tơring glông hơmâo jao kiăng ruah 32 čô ơi ia jrao, samơ̆ biă ñu kơnong kơ hơmâo 17 čô đôč. Bruă ơi ia jrao rơkâo plih anih mă bruă, rơkâo pơdơi bruă hơmâo na nao yơh. Mơ̆ng thun 2019 truh ră anai, hơmâo laih 7 čô ơi ia jrao rơkâo pơdơi bruă lơ̆m sang ia jrao ƀu dưi ruah pô hlơi ôh. Ơi ia jrao Nguyễn Luận, Kơ-iăng khua sang ia jrao tơring glông Kon Braih brơi thâo, bruă kơƀah truh 15 čô ơi ia jrao glăk ngă tơnap kơ anom bruă amăng bruă pơtô pơjuăt, pơđĭ kjăp tui bruă mă ăt kah hăng bruă khăm pơjrao brơi mơnuih ƀôn sang.

“Kơƀah ơi ia jrao ngă tơnap biă kơ bruă khăm pơjrao tơlơi ruă, wai lăng tơlơi suaih pral kơ mơnuih ƀôn sang hăng bruă pơgang klin kheng ƀơi anom bruă, biă ñu lĕ pơphun mă yua boh thâo măi mok phrâo đah mơ̆ng pơđĭ klă tui bruă wai lăng tơlơi suaih pral kơ mơnuih ruă, kiăng mơnuih ruă huăi ba nao pơ sang ia jrao pơkŏn rơngiă prăk lu”.

Anom bruă ia jrao tơring čar Kon Tum ră anai hơmâo 539 čô ơi ia jrao, amăng anun pơ tơring čar hơmâo 294 čô ơi ia jrao, pơ tơring glông hơmâo 146 čô ơi ia jrao, hăng pơ să hơmâo 99 čô ơi ia jrao. Nai ia jrao, ơi ia jrao CKII Trần Ái, Kơ-iăng khua gơnong bruă ia jrao tơring čar Kon Tum brơi thâo, mơ̆ng anai truh pơ thun 2030 tơring čar kiăng thim 100 čô ơi ia jrao pơhrua phrâo, pơhlôm hơmâo 10,5 - 11 čô ơi ia jrao amăng 10.000 čô mơnuih ƀôn sang, lơ̆m anun bruă ruah ơi ia jrao glăk bưp lu tơlơi tơnap biă:

“Ruah ơi ia jrao pơ să tơnap biă mă. Tui amăng thun 2023 hăng mrô kiăng ruah mơnuih mă bruă pơ să lĕ 108 čô ơi ia jrao, samơ̆ gơmơi hơmâo ruah kơnong kơ hơmâo 23 čô ơi ia jrao đôč. Tơnap dong lĕ ƀing ơi ia jrao hrăm gưl prong sit nik hui đôč mơ̆ng glăi pơ să, pơ tơring glông, gơñu ƀu gưt glăi ôh. Anai jing bruă tơnap biă hăng ƀing gơmơi”.

Ƀơi anăp bruă kơƀah ơi ia jrao, anom bruă ia jrao tơring čar Kon Tum glăk pơsir hĭ tơlơi tơnap hăng bruă brơi ơi ia jrao pơplih nao rai anih mă bruă; iâu ơi ia jrao pơ să giăm ƀiă nao mă bruă pơ kual ataih yaih ƀudah kual hơmâo lu mơnuih ruă hloh...Khă hnun, anai jing hơdră jăng jai mơn. Sui sui pơ anăp, anom bruă ia jrao tơring čar Kon Tum glăk kiăng hơdră pơsir đut tơhnal đah mơ̆ng huăi kơƀah ơi ia jrao kah hăng pơtô pơjuăt tui anih mă bruă hăng pơtô pơjuăt yua tơring čar pơkiăo nao hrăm.

Phrâo anai ƀơi mông ngă bruă hăng khua mua mơ̆ng Kơnuk kơna, yă Y Ngọc, Kơ-iăng khua Jơnum min mơnuih ƀôn sang tơring čar Kon Tum rơkâo hăng Kơnuk kơna sem lăng, hơmâo hơdră phara hơjăn pioh pơtô pơjuăt ơi ia jrao ƀơi anih, plai ƀiă kơƀah ơi ia jrao pơ să tui ră anai. Yă Y Ngọc ăt lăi mơn, tơdah ƀu hơmâo hơdră pơtô pơjuăt ơi ia jrao lĕ mơnuih djuai ƀiă, mơnuih hơdip hơđăp amăng plơi lĕ mơ̆ng 5 truh kơ 10 thun dong, pơ kual ataih ayaih, kual mơnuih djuai ƀiă mơ̆ng tơring čar Kon Tum ƀu hơmâo ơi ia jrao dong tah.