VOV4.Jarai - Ngă tui tơlơi git gai, črâo ba mơng Ding jum ia jrao hăng Jơnum min mơnuih ƀon sang tơring čar kơ bruă tañ pok pơhai tlâ̆o vaccine Abdala pơgang klin Covid-19, Gơnong bruă ia jrao tơring čar Kon Tum brơi thâo amra pơgiong bruă tlâ̆o vaccine anai brơi abih bang mơnuih ƀon sang amăng blan 2/2022. Kiăng kơ ngă tui hơnong pơkă anai, lơ 9/2, Gơnong bruă ia jrao tơring čar Kon Tum hơmâo hră pơ-ar mơ-it nao Anom bruă wai pơgang klin kman hăng Sang ia jrao 10 boh tơring glông, plơi prong amăng tơring čar, rơkâo tañ pok pơhai bruă tlâ̆o vaccine Abdala pơgang klin Covid-19 brơi kơ mơnuih ƀon sang.

Tlâ̆o vaccine pơgang klin Covid-19 brơi mơnuih ƀon sang ƀơi Sang ia jrao să Ia Chim, plơi prong Kon Tum

Tơlơi lăi pơthâo mơng Gong bruă ia jrao tơring čar Kon Tum brơi thâo, yap truh lơ 7/2/2022 gơnong bruă ia jrao tơring čar hơmâo tlâ̆o brơi 27.956 liều vaccine Abdala pơgang klin Covid-19 amăng mrô 45.000 liều arăng kah brơi hăng mrô mơnuih tlâ̆o djop vaccine Abdala phrâo 61% đôč. Ră anai, liều vaccine Abdala ƀơi tơring čar Kon Tum dŏ 13.890 liều.

Siu Đoan: Pơblang