Bruă pơplông ngă pơhư̆č rơbêh kơ 40 bôh sang hră wai lăng pơtô čơđai muai ƀơi 10 bôh tơring glông, plơi prong amăng tơring čar Kon Tum gum hrom. Rim grŭp pơplông hmâo 3 čô mơnuih, pơplông 2 mơta tơlơi bôh thâo hăng ngă tui. Črăn pơplông bôh thâo, hơdôm grŭp čih anăn gơnam ƀong kơ čơđai muai hmâo tom hơdră lăi pơthâo rơđah gơnam mă yua, hơdră hơbai. Črăn pơplông ngă tui, ƀing nai hăng mơnuih mă bruă ngă bơbuă drơi jan mơng rim grŭp pơdah ƀơi anăp hơbai 10 anung gơnam ƀong yang hrơi dŏng hăng ƀong čơtlăm kơ čơđai muai hăng nua 20 rơbâo prăk sa anung gơnang ƀong, sa hrơi.

Hơdôm gơnam ƀong khom pơphlôm djop 4 djuai gơnam ƀong, anun lĕ: đạm, mơnong blik, tơpung hăng vitamin. Pơplông lĕ tal pioh mơnuih apăn bruă wai lăng, nai pơtô, mơnuih mă bruă ƀơi hơdôm bôh sang hră wai lăng pơtô čơđai muai pơbưp nao rai, tŭ mă bôh thâo bruă mă; ngă tui bruă pơčeh phrâo amăng pơphun mông ƀong huă kơ čơđai, kah hăng bruă dưm dăm hơdră ƀong huă, rơnoh ƀong, gơnam ƀong rim hrơi, tui rơwang hrơi tơjuh, tui bơyan, mơng anun, djru ruah mă lu gơnam ƀong jơman, kiăng mông ƀong huă mơng čơđai lu mơta hăng pơhlôm gơnam bơbuă./.