VOV4.Jarai - Ƀơi tơring čar Kontum hơdôm blan hlâo mrô mơnuih F0 khom pơjrao hơbit đĭ truh hơdôm rơtuh čô mơnuih lĕ truh hơdôm hrơi akô̆ blan 4 anai hrŏ trun lu laih. Tơlơi pơhing mơng Gơnong bruă ia jrao tơring čar Kontum brơi ƀuh, ră anai ƀơi tơring čar kơnong kơ hmâo 65 čô mơnuih F0 glăk pơjrao hơbit ƀơi hơdôm bôh sang ia jrao.

Sang ia jrao să Ia Čim, plơi prong Kontum lăi pơthâo kơ mơnuih ƀôn sang tơdơi kơ tlâ̆o vaccine pơgang Covid-19

Hrom hăng anun mrô mơnuih F0 pơdah gah rơngiao kơtang khom nao pơ̆ sang ia jrao pơjrao hmâo rơnoh hrŏ trun laih. Nai prin tha ơi ia jrao chuyên khoa II Võ Văn Thanh, Khua Gơnong bruă ia jrao tơring čar Kontum brơi thâo, hrom hăng wai lăng klă, lăng tui, pơjrao brơi 3.500 čô mơnuih F0 ră anai glăk dô̆ čơlah mă pô pơjrao ƀơi sang, gơnong bruă ia jrao tơring čar ăt gơgrong hlâo mơn kơ bruă pơjrao, lăi pơthâo hơdôm mơnuih tơdơi pơjrao giong tơlơi ruă Covid-19. Mơng phun klin ngă truh ră anai gơnong bruă ia jrao tơring čar Kontum hmâo čih pioh 45.000 čô mơnuihh ƀă Covid-19. Amăng anun hmâo rơbêh kơ 40.000 čô mơnuih dô̆ čơlah mă pô lăng tui pơjrao suaih ruă ƀơi sang.

Siu H’ Prăk: Pơblang