VOV4.Jarai - Amăng hrơi blan laih rơgao, hơdôm tơring čar kual Dap kơdư hơmâo pơtrut tañ bruă tlâ̆o vaccine pơgang klin Covid-19, amăng anun đing nao ƀing čơđai mơng 5 truh pơ gŭ 12 thun, lơ̆m ƀing čơđai glăk mut sang hră.

Dak Lak lĕ tơring čar tlâ̆o vaccine pơgang klin Covid-19 brơi kơ ƀing čơđai mơng 5 truh pơ gŭ 17 thun dŏ aset. Tui ơi Hoàng Hải Phúc, Kơ-iăng khua anom bruă wai pơgang tơlơi duam ruă tơring čar Dak Lak, ba truh kơ bruă vaccine tlâ̆o pơgang brơi ƀing čơđai amăng thun hnưr anai dŏ aset lĕ yua ƀing amĭ ama čơđai aka ƀu brơi ană bă nao tlâ̆o. Lu mơnuih brơi thâo vaccine amra hơmâo lu anŏ pơglăi sat, bơbeč nao tơlơi suaih pral hăng ngă čơđai ƀu hơdor hơdôm tơlơi ƀing gơñu hrăm…Hrŏm hăng anun, yua klin Covid-19 tơdu trun laih, yua anun ƀing amĭ ama ƀing čơđai ngă amưng. Kiăng kơ pơtrut tlâ̆o vaccine brơi ƀing čơđai mơng 5 truh 17 thun, gơnong bruă ia jrao amra pơtrut bruă gum hrŏm hăng gơnong bruă pơtô pơjuăt kiăng pơtô pơblang, pơtrut pơsur ƀing amĭ ama čơđai ba ană bă nao tlâ̆o ia jrao, kiăng kơ pơhlôm pơgang klin amăng mơnuih mơnam, bĕ hĭ bruă amra ngă klin hơđuh glăi lar hyu amăng sang hră lơ̆m čơđai pơwŏt glăi mut sang hră.

“Hăng bruă tlâ̆o brơi ƀing čơđai mơng 5 truh 12 thun kiăng kơ hơmâo tơlơi gum hrŏm mơng gơnong bruă pơtô pơjuăt kiăng ngă hiưm pă ƀing nai pơtô, sang hră pơtô pơblang kiăng ƀing čơđai, ƀing amĭ ama čơđai thâo hluh anai lĕ tơlơi dưi, hăng bruă kiăng ngă tui mơng rĭm čô čơđai, amĭ ama čơđai dong kiăng kơ ngă hiưm pă pơhlôm pơgang klin amăng mơnuih mơnam. Tơdah ƀu tlâ̆o djop vaccine amăng abih bang mơnuih, djuai klin phrâo BA.4, BA.5 amra lar hyu amăng tơring čar Dak Lak mơtăm yơh. Tơdah ƀu pơhlôm tlâo brơi abih bang klin Covid-19 amra hơđuh glăi dong”.

Dak Lak pơtrut tañ bruă tlâ̆o vaccine pơgang Covid-19

Kiăng kơ pơsir hĭ bruă dŏ lu mơnuih dŏ pơtah tai, ngă amưng amăng bruă pơgang klin Covid-19, amăng hrơi blan laih rơgao, tơring čar Lâm Đồng hơmâo gir run pok pơhai lu hơdră bruă, sit biă ñu lĕ pơtrut tañ bruă tlâ̆o ia jrao brơi ƀing čơđai sang hră hlâo kơ hrơi ƀing čơđai mut sang hră. Kiăng kơ bruă pơgang klin Covid-19 klă hloh, hơmâo lu dong mơnuih nao tlâ̆o ia jrao, tơring čar Lâm Đồng glăk pok pơhai bruă tlâ̆o vaccine Covid-19 amăng đơ đam tơring čar, amăng anun đing nao tlâ̆o pơgiong ară tal 3 brơi kơ ƀing čơđai mơng 12 truh pơ gŭ 18 thun hlâo kơ hrơi ƀing čơđai mut sang hră thun hrăm 2022-2023. Dong mơng hrơi pơphun hơmâo pơhưč lu čơđai nao tlâ̆o ia jrao tui tơlơi jak iâu mơng gơong bruă ia jrao. Amon Trần Thanh Vy, čơđai sang hră gưl dua Lộc Sơn, plơi prong Bảo Lộc brơi thâo:

“Kâo ăt prap rơmet lui hlâo hăng nao pơ anih tlâ̆o ia jrao djơ̆ mông, djơ̆ hrơi. Laih dong, kâo jak iâu gơyut gơyâo nao tlâ̆o ia jrao hrŏm, gum tơngan hrŏm ngă tui djơ̆ hơdôm tơlơi Kơnuk kơna ta pơtrun kiăng pơgang klin Covid-19”.

Kiăng pơtrut bruă tlâ̆o vaccine, phrâo anai, Jơnum min mơnuih ƀon sang tơring čar Dak Nông pơphun hrơi “Nao tlâ̆o vaccine pơgang klin Covid-19” thun 2022. Mah hơmâo laih rơbêh 87% mrô mơnuih mơng 18 thun pơ glông ƀơi Dak Nông nao tlâ̆o vaccine ară tal 3, dong tal 6 amăng đơ đam dêh čar, samơ̆ bruă tlâ̆o vaccine Covid-19 ƀơi lu anih ƀơi Dak Nông glăk hơdư̆ glăi, sit biă ñu tlâ̆o ară tal 2 brơi čơđai mơng 5 thun truh pơ gŭ 12 thun, ară tal 3 brơi ƀing čơđai mơng 12 truh pơ gŭ 18 thun. Ƀơi anăp kơ tơlơi anai, Jơnum min mơnuih ƀon sang tơring čar Dak Nông rơkâo hơdôm anom bruă bơdjơ̆ nao amăng đơ đam tơring čar pơdah pran gơgrong, pơƀut mơnuih mă bruă kiăng kơ tañ tlâ̆o brơi djop kơ ƀing čơđai mơng 5 truh pơ gŭ 12 thun; gir run pơgiong tañ hloh kơ bruă tlâ̆o ară tal 4 brơi ƀing mơnuih mơng 18 thun pơ glông hăng pơtrut tañ tlâ̆o ară tal 3 brơi ƀing čơđai mơng 12 truh pơ gŭ 18 thun tui tơlơi črâo trun mơng Ding jum ia jrao. Ơi Nguyễn Văn Toàn - Khua gơnong bruă pơtô pơjuăt tơring čar Dak Nông brơi thâo, bruă pơphun hrơi “Nao tlâ̆o vaccine pơgang klin Covid-19” amăng hrơi mông ƀing čơđai glăk mut sang hră, tơlơi anai yôm biă mă, hăng ƀing čơđai djop gưl hrăm lĕ ƀing mơnuih arăng đing nao biă mă.

“Kiăng kơ praplui hrơii čơđai mut sang hră, gơnong bruă ia jrao gum hrŏm hăng gơnong bruă pơtô pơjuăt hơmâo akŏ bruă, mơng anai truh kơ hrơi pơphun mut sang hră sit nik kiăng kơtưn amăng bruă tlâ̆o vaccine brơi ƀing čơđai. Amăng anun gum hrŏm kiăng kơ ngă tui hơdôm hơdră bruă kiăng pơgang lu tơlơi duam ruă, sit biă ñu duam đung drah dong. Boh tơhnal anai hơmâo tơlơi git gai mơng Jơnum min truh pơ 2 gơnong bruă hăng hơdôm anom bruă bơdjơ̆ nao, sit biă ñu Jơnum min mơnuih ƀon sang tơring glông, plơi prong kiăng kơ ngă tui tơlơi anai, hăng lăng glăi hơdôm hơnong pơkă. Djop phường, să, tơring kual mơ̆ mrô mơnuih tlâ̆o dŏ aset, khŏm đing nao dong kiăng kơ dưi ngă djơ̆ hăng hơnong pơkă mơ̆ kơnuk kơna pơtrun”.

Dak Nông pơphun hrơi “Nao tlâ̆o vaccine pơgang klin Covid-19”

Kar kăi tui anun mơn, anom bruă bơdjơ̆ nao tơring čar Gia Lai ăt glăk pok pơhai lu hơdră bruă kiăng kơ pơtrut tañ bruă tlâ̆o vaccine Covid-19 brơi ƀing čơđai mơng 5 truh pơ gŭ 12 thun. Ơi Đinh Hà Nam - Kơ-iăng khua gơnong bruă ia jrao Gia Lai brơi thâo, kiăng kơ tañ amăng bruă tlâ̆o vaccine Covid-19 brơi ƀing čơđai amăng hnưr anai, tơring čar Gia Lai hơmâo ngă hăng glăk gir run pok pơhai lu hơdră bruă anun lĕ: gum hrŏm kjăp hăng gơnong bruă pôr pơhing, gơnong bruă pơtô pơjuăt lăi pơthâo, pơtrut pơsur amĭ ama čơđai; kơtưn amăng pel ĕp, krăo lăng, pơđur pok pơhai tlâ̆o ia jrao amăng ƀon lan. Ơi Nam brơi thâo, ră anai, rĭm hrơi tơring čar Gia Lai ăt hơmâo hơdôm pluh čô mơnuih ƀă klin Covid-19. Yua anun, gơnong bruă ia jrao pơtă pơtăn ƀing amĭ ama čơđai, kiăng ba ană bă nao tlâ̆o ia jrao kiăng pơhlôm pơgang klin brơi ƀing čơđai, biă mă ñu giăm hrơi mut sang hră laih.

“Nao pơđur tơl sang, iâu talephôn kơ ƀing amĭ ama čơđai pơgiăng ană bă nao tlâ̆o ia jrao. Pơ anăp anai, bruă pơtô pơblang lĕ bruă yôm hloh. Sit biă ñu hăng ƀing khul git gai ƀơi ƀon lan, ƀơi să, phường, tơring kual hrŏm hăng hơdôm boh sang hră iâu pơthưr ƀing čơđai nao tlâ̆o ia jrao. Gơnong bruă ia jrao lêng kơ pok na nao hơdôm anih tlâ̆o ia jrao, hăng amra nao tlâ̆o tơl plơi pla ala ƀon. Tơlơi čang rơmang prong hloh mơng ƀing gơmơi lĕ ƀing amĭ ama brơi ană bă nao tlâ̆o ia jrao kiăng pơhlôm pơgang klin brơi kơ rĭm čô mơnuih”…

Hăng lu hơdră bruă phara, gong gai hăng gơnong bruă bơdjơ̆ nao ƀơi hơdôm tơring čar kual Dap kơdư hơmâo ngă hăng glăk pơtrut tañ bruă tlâ̆o vaccine Covid-19 brơi abih bang mơnuih, amăng anun đing nao ƀing čơđai, lơ̆m ƀing čơđai mut sang hră laih.

Siu Đoan: Pơblang