Črăn 1, ƀing tơhan kơnuk kơna tơring čar Lâm Đồng hơmâo pơphun 32 wơ̆t tal hyu ĕp, rŭ kuai hơmâo 26 per tơlang aka ƀu thâo anăn. Djop sang bruă ngă hrŏm mă čơđeh, meh tơlang 3.625 ƀơi ƀut pơsat djop anŏ gêh găl ba pơčrang ADN, ngă giong bruă jao hlâo kơ 3 blan tui hrơi pơkă.

Kông an tơring čar Lâm Đồng hơmâo mă pơƀut 1.300 meh tơlang hăng čơđeh mơnuih amăng sang  anŏ, mơnuih amăng kơnung djuai pô rơngiă, mă kơnung djuai gah amĭ mơ̆ng pô aka thâo krăn tơlang ƀing tơhan pơsăn drơi. Ngă tui črăn tal dua dơ̆ng amăng bruă mă ječ ameč 500 hrơi mlam hyu ĕp rŭ kuai pơsat tơhan djai pơsăn drơi, tơring čar Lâm Đồng pơkă tơhnal jao boh ƀiă khom ĕp 100 per tơlang dơ̆ng či pơsit anăn krăn pô. Kiăng dưi ngă rơnoh jao anai, djop sang bruă amăng glông bruă kơđi čar, ăt pơtrut kơtang tơlơi gơgrong ba amăng bruă mă, abih bang wơ̆t mơnuih ƀôn sang lăi pơthâo brơi tơlơi pơhing sit thâo. Ƀing tơhan kơnuk kơna hơdai gum hrŏm djop sang bruă khul mơnuih mơnam mut phung, gong gai plơi pla hăng mơnuih ƀôn sang gum hrŏm.