VOV4.Jarai - Gơnong bruă ia jrao tơring čar Lâm Đồng glăk tañ pok pơhai kơčăo bruă tlâ̆o vaccine pơgang Covid-19 kơ čơđai muai mơng 5 truh kơ yŭ 12 thun. Đơ đam tơring čar ră anai hmâo rơbêh kơ 179.600 čô čơđai mơng 5 thun truh yŭ kơ 12 thun. Tal tlâ̆o pơgang blung a pioh kơ hnưr mơnuih anai, pơkă hlâo amra hmâo 13.700 čô čơđai mơng 11 thun truh 12 thun, dưi tlâ̆o vaccine Moderna.

Lâm Đồng tlâ̆o 13.700 liều vaccine pơgang Covid-19 kơ čơđai muai

Ră anai, Gơnong bruă ia jrao tơring čar Lâm Đồng hmâo pơpha abih bang mrô vaccine anai kơ hơdôm anom bruă amăng tơring čar kiăng hơdôm bôh anom pơphun tlâ̆o pơgang tui tơlơi pơkă, hăng amra ngă giong amăng lơ 25/4. Yă Huỳnh Thị Phương Duyên, Kơ-iăng Khua Gơnong bruă ia jrao tơring čar Lâm Đồng brơi thâo, hrom hăng prăp lui klă kơ tal tlâ̆o pơgang hlôm hlâo, hơdôm anih anom amăng tơring čar lăi pơthâo dong kiăng mơnuih ƀôn sang huăi lui raih bruă pơgang pơgăn klin kheng./.  

Siu H’ Prăk: Pơblang