Tom brơi (13/8), đơ đam tơring čar Lâm Đồng hmâo čih pioh giăm truh 4.000 čô mơnuih ruă djơ̆ hmơi, đĭ rơbêh kơ 3.800 čô mơnuih bơhmu hăng thun hlâo. Hơdôm tơlơi ruă kơčung tơkai tơngan hăng mơbah, duam pơđung drah ăt đĭ tañ mơn amăng hơdôm rơwang hrơi tơjuh jê̆ hăng anai, hăng abih bang mrô mơnuih ruă ƀơƀrư̆ hmâo čih pioh giăm truh 1.600 čô mơnuih hăng rơbêh kơ 2.700 čô mơnuih, amăng anun hmâo sa čô mơnuih djai yua kơ duam pơđung drah. Jơnum min mơnuih ƀôn sang tơring čar Lâm Đồng hmâo rơkâo laih Gơnong bruă ia jrao hăng hơdôm gơnong bruă, anom bruă, plơi pla gơgrong hlâo, khom črâo ba, pok pơhai ba glăi bôh tơhnal hơdôm bruă pơgang, pơgăn klin ruă; pơhlôm mơnuih mă bruă, ia jrao gun, put jrao, măi mok mă yua hăng anih anom mă bruă kơ bruă mă anai.

Jơnum min mơnuih ƀôn sang tơring čar Lâm Đồng jao kơ Gơnong bruă ia jrao git gai, gum hrŏm hăng hơdôm bôh anom bơdjơ̆ nao hăng hơdôm bôh să, phường, kual phara ha jăn gơgrong hlâo pơphun hơdôm grŭp hyu mă bruă, pel ĕp, lăng tui, djru bruă pơgang, pơgăn klin ruă ƀơi hơdôm bôh anom, plơi pla; hmao tlôn lăi pơthâo glăi, ba tơbiă Jơnum min mơnuih ƀôn sang tơring čar pel ĕp, črâo ba hăng hơdôm bôh yôm yak rơgao kơ pô dưi gơgrong./.