Ƀơi mông jơnum, kiăng anăp nao tơhnal pơkă Việt Nam gir run ƀu hơmâo mơnuih djai yua tơlơi ruă asâo djơ̆ tuai truh thun 2030, tơring čar Gia Lai ƀuăn hrŏm hăng amăng dêh čar, pơtrut mă bruă pơgăn kman duăm ruă yua kman asâo djơ̆ tuai hăng dua hơdră yôm. Hăng anom bruă pơjrao hlô mơnong rông: Ngă hrŏm gong gai kơnuk kơna djop plơi pla kơtưn wai lăng khul asâo eo mơnong rông jĕ giăm ană mơnuih.

Gah anom bruă pơjrao duăm ruă lĕ: khom ngă tui djop mơnuih asâo kĕ eo kuač tlâ̆o ia jrao pơgang djop djel, pơjrao tong ten nam rơka asâo kĕ eo kuač laih anun pơtô brơi tlâ̆o jrao vaccine pơgang pơhlôm djơ̆ hăng tơlơi pơkă. Ƀrô tal anai, khua mua pơ ala hơdôm ding jum, anom bruă gơnong dlông, khua mua pơ ala mơ̆ng jar kmar, khua mua tơring čar Gia Lai hơmâo kĭ pơkôl gum tơngan hrŏm pơhlôm, pơgang tơlơi ruă djơ̆ tuai.