Anun lĕ, yă Đỗ Thúy Nga, Khua anom bruă čang rơmang, mơnuih arăng pơ anăn đah kơmơi plơi prong jưh jom ba gru hlâo thun 2022, ơi ia jrao tong ten hăng bruă mă, djru ba 400 čô čơđai muai ƀu klă drơi jăn hơdôm thun rơgao.

Lu thun laih rơgao, ƀing čơđai muai sang hră mơ̆ng Anom bruă čang rơmang dŏ pơ anih mrô sang 82/198, jơlan amrĕ mrô 290 Kim Mã Ba Đình, Hà Nội juâ̆t ƀuh na nao ơi ia jrao Đỗ Thúy Nga nao pơ sang bruă lơm 8 mông mơguah hrơi sa, hrơi klâo, hrơi rơma pioh mă bruă pơtô ba ƀing čơđai muai ƀu klă drơi jăn. Anom bruă čang rơmang anai pok bah amăng mơ̆ng 7 mông 30 mơnit rĭm mơguah, truh ră anai hơmâo abih bang 53 čô čơđai sang hră mơ̆ng 3 thun  truh 16 thun ƀu klă drơi jăn ƀudah ƀu khin jĕ giăm hăng mơnuih gah rơngiao. Hơmâo 12 čô nai pơtô brơi ƀơi 4 boh anih hrăm, laih anun hơmâo tơlơi djru mơ̆ng ƀing tơdăm dra čơđai sang hră hăng hlăk ai pơyơr pran jua mơ̆ng tač rơngiao.

Yă Đỗ Thuý Nga, lĕ ơi ia jrao rơnuk gưl blung a glăi mă bruă pơ sang ia jrao tơring glông Thạch Thất ngă khua anom pơjrao čơđai muai laih anun arăng brơi nao mă bruă pơ Jơnum min wai lăng ƀing amĭ hăng čơđai muai, Anom bruă Pơtô hăng pơjuăt kuân Ba Đình. Thun 1998, glăi pơdơi abih thun bruă ñu hăng sang anŏ pioh lu mông mă bruă djru pran jua pioh prong tui anom bruă čang rơmang:

“Hlăk dŏ mă bruă pơ sang ia jrao lu čơđai muai ruă sơ̆l dlô Japan, pioh glăi tơlơi ƀu klă amăng dlô akŏ čơđai, kah hăng čơđai tơmlư̆, ƀu beč bal ôh pơkă hăng čơđai muai pơkŏn. Kâo ƀuh ta mă bruă aka ƀu ngă giong bruă kơ sa čô ơi ia jrao, yua kơ anun, ră anai, kâo pơmin sit glăi pơdơi abih thun bruă pok anih pơtô kơ čơđai muai tơnap tap anai, yua anun ană đah kơmơi kâo brơi yua ding dăng lŏn sang anai sĭ lŏn pơ sang Thành Công mă prăk man pơdong anih ngă bruă anai”

Thun 2002, Anom bruă čang rơmang dưi akŏ pơdong, yă Đỗ Thúy Nga čih pôr tơlơi pơhing amăng hră kơnăl, pioh iâu pơmut čơđai sang hră hăng nai pơtô laih anun anom bruă pơphun mă bruă jai hrơi pok pơhư prong. Ƀu kơnong pơtô đôč ôh, anom bruă anai dŏ čem rông ba, pơdong anih dŏ glăi, pit đih kơ ƀing čơđai nao hrăm.

Hăng 53 čô čơđai sang hră ƀu klă drơi jăn hlăk tui hrăm amăng anih hrăm anai,  rơnoh prăk  amĭ ama čơđai apah mơ̆ng 2 klăk mơkrah truh 5 klăk sa čô blan. Ơi ia jrao Đỗ Thúy Nga lăi: hăng rơnoh prăk pơhrui mă hơdôm anun, anom bruă jŭ yap pơkă hnong djơ̆ hơdră kiăng djop prăk yua laih anun rơkâo tơlơi djru mơ̆ng gah rơngiao dơ̆ng, ñu lăi:

“Sa tơlơi dŏ bơngơ̆t lu mơ̆ng kâo lĕ kiăng pơđĭ tui rơnoh prăk kơ ƀing nai pơtô, mơnuih mă bruă lu ƀiă, samơ̆ tơdah pơhrui prăk apah mơ̆ng sang anŏ čơđai sang hră lĕ ăt tơnap mơ̆n. Lu sang anŏ ƀun rin, ƀu hơmâo prăk duh kơ ană bă djop kah hăng anŏ kiăng. Yua kơ anun, rơnoh prăk hơmâo pơhaih tơpă, jao abih kơ ƀing nai pơtô, mơnuih mă bruă pơmin mă yua hiư̆m mơ̆ng djơ̆ găl, abih blan pơpă pơsit abih blan anun, tơdah blan pơpă yua prăk djop, dŏ rơbêh ƀiă pioh glăi kơ blan tơdơi, laih anun sem lăng sang anŏ čơđai pơpă tơnap tap hloh, pơhrŏ prăk duh mơ̆ng arăng".

Tơdơi kơ 22 thun akŏ pơdong truh ră anai, anom bruă čang rơmang hơmâo pơtô hăng djru ba rơbêh 400 čô čơđai ƀu klă drơi jăn, hơmâo tơlơi ruă, tơlơi hơdip tơnap tap phara. Hơmâo lu čơđai muai hrăm thâo thăi, pơblih tơlơi dŏ dong ƀong huă ngă mơak hăng ană plơi pla, mơnuih mơnam pơkŏn. Hăng rơnoh prăk djru hrom mơnuih mơnam tui anun, ơi ia jrao Đỗ Thúy Nga hơmâo tŭ mă tơlơi apah bơnai anăn “Đah kơmơi plơi prong jưh  jom ba gru hlâo thun 2022”. Pran jua mă bruă, tơlơi hur har mơ̆ng yă Nga hơmâo lu mơnuih pơpŭ bơni biă mă, gơyut gơyâo, ƀing ngă bruă hrom bơni mơ̆n. Yă Lê Thị Thu, 72 thun, nai pơtô hơmâo mă bruă 20 thun amăng anom bruă čang rơmang anai lăi:

“Lơ̆m  bưp wa ñu yă Nga pơ anih mă bruă phrâo, kâo ƀuh mơta sa lĕ tơlơi khăp pap mơ̆ng ñu, ñu sa čô mơnuih tơ-un muih biă mă. Ƀuh čơđai phañ, ƀlĕ ia mơdung lĕ, ñu mă đing hmư̆, pơkă lăng drơi jăn laih anun čih anăn ia jrao pơjrao kơ čơđai. Pran jua ñu, sit ngă bruă hơgĕt klă kơ čơđai muai hă ñu ngă abih pran jua mơtam”.

Hăng abih tơlơi thâo hrăm gah bruă ia jrao hăng pơtô hrăm mơ̆ng yă Đỗ Thúy Nga, pioh abih kơ anom bruă čang rơmang. Anih mơ̆ ñu tŭi apui bơngač kơ tơlơi đăo kơnang, tơlơi hok mơak, čang rơmang mơ̆ng lu sang anŏ laih anun čơđai muai ƀu klă drơi jăn djơ̆ hăng anăn ñu tơlơi čang rơmang biă mơ̆n.