Kah hăng tơđar, lơ 16 rim blan, ơi ia jrao Y Nham Niê, Khua Anom ia jrao să Krông Na, tơring glông Buôn Đôn gum hrom hăng ƀing mă bruă mơng sang ia jrao nao pơ̆ ƀôn Drăng Phôk, să Krông Na pioh pel ĕp tơlơi ruă, lăi pơthâo tơlơi suaih pral kơ mơnuih ƀôn sang. Ƀôn Drăng Phôk dŏng dơlăm amăng kual phun Dlai York Đôn, ataih mơng Sang ia jrao să giăm truh 20 km, anun bruă đuăi hyu pel ĕp tơlơi ruă bưp lu tơlơi tơnap biă. Rim tal hyu pơ̆ ƀôn, ơi ia jrao Y Nham leng kơ hơneč mă lăi pơhing bruă pơgang tơlơi ruă kơ neh wa.

 “Amăng kual asuek, ataih anai lĕ tơlơi ruă lu biă, biă ñu tơlơi duam pơgrun ăt dô̆ ngă mơn, laih anun hmâo tơlơi klin ruă pơkon bơbeč truh lu dong. Tơlơi pơmin mơnuih ƀôn sang lĕ ƀu lu, mơnuih ƀôn sang thâo tơlơi ruă kah mơng hyu ĕp ơi ia jrao, bơ̆ bruă pơgang hlôm hlâo tơlơi ruă, klin ruă kah hăng ƀu hmâo ôh”.

 Hlâo adih, ƀing gum bruă ia jrao plơi khom hyu rim sang pơtă neh wa hrơi nao pel ĕp rim blan tơlơi duam ruă lĕ, ră anai, sit truh lơ 16 rim blan, neh wa gơgrong nao mă pơ̆ sang jơnum plơi pla pioh dưi pel ĕp hăng lăi pơthâo tơlơi suaih pral. Amai H’ Thép Knul ƀơi ƀôn Drăng Phôk, brơi thâo:

  “Ơi ia jrao Nham rai pơ̆ anai pel ĕp lăng, lăi pơthâo hăng plơi pla ƀơi anai hur har pran jua biă, gơnang kơ ơi ia jrao lĕ plơi pla thâo hơdră bơwih brơi tơlơi suaih pral”.

 Hăng sa čô mơnuih djuai ania Êđê tơkeng rai hăng prong đĭ ƀơi să Ea Ƀar, tơring čar Buôn Đôn, tơdơi kơ hrăm giong gưl dlông bruă ia jrao, thun 2002, ayong Y Nham Niê nao mă bruă ƀơi Sang ia jrao să Ea Ƀar. Mơng thun 2016 truh ră anai, ơi ia jrao Y Nham Niê dưi pơsit nao ngă Khua Sang ia jrao să Krông Na. Rơbêh kơ 20 thun hăng bruă pô mă hăng hmâo laih 7 thun bruă mă ataih mơng sang rơbêh kơ 20km ƀu hmâo hlơi thâo hluh hloh kơ ñu, ñu thâo tơlơi hơdip mơda mơng neh wa kual asuek, ataih, kual guai dêh čar bưp lu tơlơi tơnap; ăt dô̆ mơn lu phiăn juăt sô hơđăp ƀu tŭ yua ngă bơdjơ̆ nao tơlơi suaih pral mơng mơnuih ƀôn sang.

Hăng hơdôm bôh thâo hmâo hrăm hăng abih pran jua mă bruă, ơi ia jrao Y Nham ƀu huĭ kơ jơlan nao rai tơnap tap, hrơi pơ-iă ăt kah hăng hrơi hơjan, gir run gum hrom hăng ƀing gŏp hăng khul mơnuih gum bruă ia jrao pơsur mơnuih ƀôn sang lui hĭ phiăn sô hơđăp ƀu tŭ yua, lăi pơthâo bơwih brơi tơlơi suaih pral kơ mơnuih ƀă ană, pơsur amĭ ama čơđai ba ană nao tlâ̆o ia jrao pơgang hlôm hlâo djơ̆ hrơi pơkă. Gơnang kơ tơlơi gir run mơng ơi ia jrao Y Nham hăng khul mơnuih mă bruă ia jrao ƀơi plơi pla, bruă bơwih brơi tơlơi suaih pral blung a kơ mơnuih ƀôn sang ƀơi să Krông Na ba glăi lu bôh tơhnal. Mrô mơnuih tơkeng ană tal 3 hăng tơlơi pơdô̆ rơkơi bơnai mơng muai, pơdô̆ giăm drah kơtăk ƀơi plơi pla hrŏ trun lăp yap ba biă, mrô tlâ̆o pơgang hlôm hlâo hmâo rơbêh kơ 70%. Ơi ia jrao Y Nham lăi pơthâo:

 “Pran jua pô yôm phăn hloh lĕ bơwih brơi tơlơi suaih pral kơ djop mơnuih, ƀu kah pha hlơi ƀơi hơpă ôh, neh wa kiăng lĕ, kơnuk kơna ba mơnuih nao lĕ kâo nao đôč. Kâo gir run na nao mă bôh thâo, tơlơi găn rơgao pô hmâo pioh bơwih brơi kơ neh wa đôč”.

 Ƀu djơ̆ kơnong kơ abih pran jua măng bruă bơwih brơi tơlơi suaih pral kơ mơnuih ƀôn sang, hăng bruă apăn Khua Sang ia jrao să, ơi ia jrao Y Nham dô̆ gơgrong hlâo ba tơbiă kơčăo bruă rơđah kơ rim bruă mă mơng Sang ia jrao tui rim tal, rim blan ăt kah hăng gơgrong hlâo amăng bruă pơkă lăng hlâo tơlơi klin ruă ƀơi plơi pla kiăng hmâo hơdôm tơlơi ba tơbiă, pơphô brơi hmao tlôn hăng gưl dlông. Hrom hăng anun, ơi ia jrao Y Nham dô̆ abih pran jua pơtô brơi kơ mơnuih amăng bruă sang ia jrao kiăng gơñu pơđĭ tui bruă mă mơng pô. Ayong Y Sới Hwing, Kơ-iăng Khua Sang ia jrao să Krông Na brơi thâo:

“Wa Nham lĕ sa čô mơnuih hur har pran jua, mă bruă thâo gơgrong. Rim blan tơdơi kơ jơnum grŭp ping gah hơpă wa Nham leng kơ ba tơbiă sa tơlơi ruă hơpă pioh lăi pơthâo, kiăng ba tơbiă sa jơlan gah lom bưp thơ, ñu ăt hmâo pơtô laih hlâo, bôh thâo mơng ñu amra lăi pơthâo kơ ƀing adơi ayong ƀơi Sang ia jrao, kiăng lom mơ̆ ñu hyu pơ̆ hơpă ƀing adơi ayong amăng Sang ia jrao dưi pơsir mă pô”.

 Hơdôm pran jua tuh rơyuh mơng ơi ia jrao Y Nham Niê sit nik lăp pơpŭ, ñu ƀu djơ̆ kơnong kơ sa čô ơi ia jrao rơgơi gah bruă mă, bruă jao, hmâo pran jua klă hiam ôh mơ̆, ñu dô̆ jing gru ba jơlan hlâo amăng gơnong bruă ia jrao kual guai dêh čar dong. Yua kơ tơlơi pơdŏng pơjing hăng dưi djă pioh pran đăo gơnang kiăng hmâo neh wa tui gưt djru laih ơi ia jrao Y Nham pok pơhai truh kih hơdôm Jơlan hơdră ia jrao dêh čar kơ plơi pla sa hơdră ba glăi bôh tơhnal./.