Glăk bơwih brơi kơ ană ruă ƀơi Anom pel ĕp - hơkrŭ glăi drơi jăn tơdơi kơ pơjrao ječ, Sang ia jrao pơjrao mơnuih ruă hyuing akô̆ glô tơring čar Dak Lak, amai H’ Loanh Niê ƀơi Čư̆ Dliê M’nông, tơring glông Čư̆ Mgar brơi thâo, ană ñu hmâo tơlơi ruă kron glô mơ̆ng muai, kơnang kơ mơñum ia jrao na nao anun tơlơi ruă ană ñu hơđong. Khă hnun hai, hơdôm hrơi jê̆ hăng anai, pơ-iă hang sui hrơi, ngă ană ñu jing ruă kơtang, kơañăk na nao hăng hlăk hluai.

 “Juăt ñu pơdơi mơñum ia jrao lĕ ñu kơañăk. Tal anai mơñum ia jrao na nao ăt ruă kơañăk mơn, năng ai ñu yua pơ-iă hang. Sa hrơi ƀuh ñu kơañăk sa wot lĕ brơi mơñum ia jrao mơ̆ ƀu ƀuh plai ƀiă ôh, ƀuh mơ̆ng 3-4 wot lĕ ba nao pơ̆ sang ia jrao”.

Đih hrŏm ƀơi anih ană amai H’Loanh lĕ pô ruă Nguyễn Đức Lĩnh, tơkeng thun 2000, ƀơi să Trung Hòa, tơring glông Čư̆ Kuiñ. Tui hăng yă Nguyễn Thị Quỳ, amĭ pô ruă, rơgao hăng anai 5 thun, yua kơ bruă mă glêh glar, ñu hmâo tơlơi ruă hyuing kơañăk hăng hmâo pơjrao brơi laih. Hơdôm thun rơgao, Lĩnh nao rai dô̆ dŏng ƀong huă hăng mă bruă kah hăng arăng mơn. Rơgao hăng anai 2 blan, Lĩnh ƀu hmâo mơñum ia jrao djơ̆ tui tơlơi pơtô ba mơ̆ng ơi ia jrao, nao hrŏm hăng anun adai pơ-iă hăng ngă tơlơi ruă lok glăi hăng khom ba nao pơ̆ sang ia jrao pioh pơjrao:

 “Ayuh hyiăng pơ-iă hang lĕ ñu kơañăk hơdôm wot, tơlơi hlăk hluai ngă kơtang hloh. Kâo ba ñu nao pơ̆ sang ia jrao, ƀuh ơi ia jrao klâ̆o jrao kơ ñu kâo ƀuh ñu pit hmâo ƀiă, ră anai akă plai đơi ôh, ăt dô̆ hlăk hluai mơn”.

Tui hăng mrô yap mơ̆ng Anom pel ĕp – hơkrŭ glăi tơdơi kơ pơjrao ječ, Sang ia jrao pơjrao mơnuih ruă hyuing akô̆ glô tơring čar Dak Lak, mơ̆ng blan 3 truh ră anai, hơnong ñu rim hrơi Anom tŭ mă pel ĕp brơi rơbêh kơ 100 wot čô mơnuih ruă, đĭ năng ai ñu 20% bơhmu hăng hlâo kơ anun, mrô mơnuih ruă ba nao pơ̆ sang ia jrao ăt đĭ lu mơn. Ơi ia jrao Nguyễn Thị Bé, Khua Anom pel ĕp – Hơkrŭ glăi tơdơi kơ pơjrao ječ, Sang ia jrao pơjrao tơlơi ruă akô̆ glô tơring čar Dak Lak brơi thâo, mơnuih ruă amăng hơdôm hrơi anai biă ñu lĕ ară glô, kơañăk, ƀu pơhiăp klao hăng arăng, bơngot amăng drơi jăn, pran jua... Lu mơnuih ruă ba nao lơm amăng pran jua ñu ƀu mơ-ak kơtang, dô̆ pơmin ča, hyu pơsuh arăng, ur hrek... Bôh than đĭ lu mrô mơnuih ruă lĕ hmâo lu bôh than ba truh, amăng anun ayuh hyiăng pơplih, pơ-iă hang sui hrơi jing bôh than bơdjơ̆ nao ară drah, tơlơi suaih pral mơ̆ng djop mơnuih, biă ñu hơdôm mơnuih mă bruă hmâo tơlơi pơmin lu, mơnuih tha rơma hmâo tom tơlơi ruă pơkon, đah kơmơi tơdơi kơ tơkeng ană... Pioh hơdư̆ ƀiă tơlơi ngă glăi tơlơi ruă ƀơi mơnuih ruă, amăng hơdôm hrơi anai, mơnuih mơ̆ng sang anô̆ khom na nao lăng ba hăng mơnuih ruă. Lơm ƀuh hơdôm tơlơi pơdah kah hăng ƀu mơhao ƀong huă, ƀu thâo pit, bơngot amăng drơi jăn, ƀu thâo pô ngă hơget, pô sang khom ba nao pơ̆ sang ia jrao tañ pơjrao brơi kiăng plai ƀiă ruă kơtang amra ba truh bruă ngă huĭ rơhyưt. Ơi ia jrao Nguyễn Thị Bé pơtă:

 “Ƀơi anăp tơlơi pơ-iă hang tui anun pơtă ƀing ruă tâ̆o hloh mơñum ia jrao djop, na nao djơ̆ tui tơlơi pơtô mơ̆ng ơi ia jrao. Amăng hơdôm hrơi anai kơtưn đĭ ia mơñum pioh pơđoh tơbiă ia jrao amăng drah tơbiă. Hăng mơnuih ruă thâo nao mă bruă lĕ, bĕ hơdôm hrơi pơ-iă hang kơtang đơi, ƀu dô̆ amăng pơ-iă kơtang”./.