Kơnong amăng 2 blan akŏ thun 2024, tơring glông Krông Pač hơmâo 3 čô mơnuih djai yua djơ̆ tuai, jing tơring glông hơmâo mrô mơnuih ƀă kman djơ̆ tuai lu hloh mơ̆ng tơring čar Dak Lăk. Ơi Y Doãn Niê, Kơ-iăng khua Jơnum min mơnuih ƀôn sang tơring glông Krông Pač pơsit, bruă pơgang ruă djơ̆ tuai mơ̆ng tơring glông glăk bưp lu tơlơi tơnap yua lu sang anŏ rông asâo, eo ƀu kiăo tui tơlơi pơtô mơ̆ng ƀing apăn bruă pơgang kman ôh:“Mơnuih ƀôn sang rông asâo eo ƀơi tơring glông juăt prưh lui pơ hmua, ƀing ơi ia jrao hlô mơnŏng lu wơ̆t laih nao tlâ̆o pơgang samơ̆ sang anŏ ƀu thâo kiăo mă ôh, đa hlong či ƀu brơi tlâ̆o vắc xin mơtăm yơh”.

Ƀơi plơi prong Buôn Ma Thuột ƀudah djŏp anih pơpă tŭ mơn pơ tơring čar Dak Lăk, mơ̆ng plơi truh pơ tơring kual, plơi prong lêng kơ ƀuh arăng prưh lui asâo gah rơngiao. Tơlơi anai ngă sat kơ mơnuih nao rai ƀơi jơlan biă. Amai Trịnh Thị Hồng Hạnh, ƀơi phường Tân Lợi, plơi prong Buôn Ma Thuột dŏ bral na nao yua asâo kĕ mơ̆ng hlâo:“Sui mơ̆ng anai ha wơ̆t hrơi tơjuh kâo rơbat tơkai nao pơ čơ, glăk rơbat nao lĕ tŭ kơ hơmâo asâo amăng asuek kơjơč rai kĕ. Lơ̆m anun kâo dŏ kơtuă, braih biă mă, tŭ kơ đuăi ôh, samơ̆ kâo jai đuăi lĕ asâo jai kiăo kơtang hloh. Ƀuh asâo arăng prưh gah rơngiao kâo tơtư̆ biă”.

Yap rim thun, tơring čar Dak Lak hơmâo năng ai 6.000 čô mơnuih asâo, eo kĕ, khŏm nao pơjrao pơgang hlâo. Kơnong amăng akŏ thun truh ră anai, tơring čar hơmâo 4 čô mơnuih djai yua kman djơ̆ tuai.

Ơi Đỗ Xuân Dũng, Kơ-iăng khua gơnong bruă ngă hmua hăng pơđĭ tui ƀôn lan tơring čar Dak Lăk brơi thâo, phun tơhnal hơmâo kman djơ̆ tuai kơtang tui lĕ yua aka ƀu wai lăng pŭ asâo, eo; mrô tlâ̆o vắc xin kman djơ̆ tuai aset biă, kơnong hơmâo 37%. Mơta pơkŏn dong bruă bơtơhmal wai lăng asâo rông, tlâ̆o vắc xin djơ̆ tuai kơ asâo, eo aka ƀu khut khăt ôh.

“Mơ̆ng hlâo aka ƀu ƀuh anom bruă pơpă ôh bơtơhmal lơ̆m pioh hơmâo bruă asâo eo kĕ. Tơlơi phiăn hơmâo laih samơ̆ ƀing ta aka ƀu mă yua ôh. Rơngiao kơ bruă pôr pơthâo bruă pơgang kman djơ̆ tuai kiăng ngă tui djơ̆ hăng tơlơi phiăn. Samơ̆ ƀing rông asâo, eo ƀu hla tui tơlơi phiăn hăng ba truh tơlơi djai brŭ yua asâo eo kĕ lĕ anom apăn bruă dưi ngă kơđi hình sự hăng pô rông asâo, eo tui tơlơi phiăn”.

Tui hăng ơi Nguyễn Thiên Văn, Kơ-iăng khua jơnum min mơnuih ƀôn sang tơring čar Dak Lăk, kiăng pơgang kman djơ̆ tuai hơđuh đĭ, ăt kah hăng plai ƀiă hơmâo mơnuih djai yua djơ̆ tuai, anom apăn bruă hăng gong gai kiăng pơƀut ngă bruă đah mơ̆ng pơgang kman djơ̆ tuai mơ̆ tơring čar hơmâo pơtrun. Amăng anun, khŏm pơđĭ tui bruă wai lăng pŭ asâo eo; pơđĭ tui mrô tlâ̆o vắc xin pơgang djơ̆ tuai, laih dong, pơtrut pôr pơhing kiăng mơnuih ƀôn sang thâo rơđah kơ tơlơi hŭi rơhyưt mơ̆ng kman djơ̆ tuai. Ơi Nguyễn Thiên Văn lăi, tơlơi pơmin hăng gum djru mơ̆ng mơnuih ƀôn sang jing boh pơkhoă pok rai tơlơi truh kih amăng bruă pơgang kman djơ̆ tuai.

“Hơdôm boh tơring đing nao bruă pôr pơhing amăng plơi pla đah mơ̆ng pơđĭ tui tơlơi thâo pơmin mơ̆ng mơnuih ƀôn sang kơ tơlơi hŭi rơhyưt mơ̆ng kman djơ̆ tuai hăng ană mơnuih. Mơnuih rông asâo, eo tlâ̆o pơgang vắc xin djơ̆ tuai kơ pŭ asâo, eo. Lơ̆m asâo, eo kĕ khŏm nao pơ sang ia jrao pơčrang lăng, pơjrao hmao tlôn”.

Dak Lăk glăk amăng bơyan không phang, jing amuñ ngă kman djơ̆ tuai ƀơi pŭ asâo, eo lar hyu, pơhŭi tơlơi hơdip ană mơnuih. Yua hnun, hrŏm hăng tơlơi mă bruă khut khăt mơ̆ng anom apăn bruă, mơnuih ƀôn sang kiăng pơđĭ tui tơlơi pơmin pơgang kman djơ̆ tuai đah mơ̆ng plai biă hơmâo kman djơ̆ tuai./.