Hrŏm hăng hơdôm boh ƀon lan đơ đam dêh čar, tơring čar Ninh Bình lĕ sa amăng hơdôm boh tơring čar hơmâo giăm 100 tơlơi ngă yang, ngui ngor anet prong hơmâo pơphun amăng bơyan akŏ thun phrâo. Amăng anun, hơmâo hơdôm tơlơi ngui ngor yôm phara amăng bơyan bơnga, pơhưč lu tuai čuă ngui nao lăng. Ơi Phùng Văn Giang, Kơ-iăng khua anom bruă wai lăng mơnong ƀong huă hơdjă tơring čar Ninh Bình brơi thâo: bơyan ngui ngor thun 2023, Khul git gai wai lăng mơnong ƀong huă tơring čar Ninh Bình hơmâo akŏ bruă pel ĕp, wai lăng mơnong ƀong huă hơdjă amăng hơdôm hrơi ngă yang, ngui ngor:

“Blung hlâo lĕ mă yua djop mơta tơlơi hăng bruă pôr pơhing kiăng kơ lăi pơthâo hơdôm tơlơi pơkă mơng kơnuk kơna kơ bruă pơhlôm mơnong ƀong huă hơdjă mơng pơkra pơjing hăng sĭ mơdrô. Hăng črâo ba mơnuih ƀon sang thâo amăng bruă djă pioh gơnam ƀong huă brơi hơdjă; đing nao hơdôm gơnam tam juăt blơi lu amăng bơyan ngui ngor. Laih dong, mơng lơ 15/12/2022 truh lơ 15/3/2023, djop anom bruă ƀơi ƀon lan đơ đam dêh čar ăt pơphun bruă pơtô pơblang kiăng pơhlôm mơnong ƀong huă hơdjă hăng pơphun nao pel ĕp mơng djop gơnong bruă, anom bruă kiăng pơhlôm mơnong ƀong huă hơdjă, hmao tlôn ĕp ƀuh hăng pơsir hĭ hơdôm bruă ngă soh”.

Hrơi ngă yang Chùa Hương ƀơi să Hương Sơn, tơring glông Mỹ Đức, ƀôn prong Hà Nội lĕ hrơi ngui ngor sui hloh, truh pơ 3 blan. Ơi Nguyễn Bá Hiển, Khua anom bruă wai lăng anih ngui ngor Hương Sơn brơi thâo: hơmâo akŏ pơjing grup pel ĕp kơ bruă pơhlôm mơnong ƀong huă hăng pơsir hĭ hmao tlôn hơdôm tơlơi ngă soh.

“Ƀing gơmơi hơmâo akŏ pơjing grup hyu pel ĕp pơlir hơbit djop gơnong bruă, amăng anun hơmâo anom bruă ia jrao, wai lăng sĭ mơdrô hăng hơdôm anom bruă bơdjơ̆ nao hrŏm hăng gong gai ƀon lan kiăng đing nao črâo ba hăng pơtô pơblang brơi neh met wa, wŏt hơdôm bruă ngă soh, ƀu djơ̆ hăng tơlơi pơkă mơng khul pơphun ngă yang Chùa Hương amăng bruă pơhlôm mơnong ƀong huă kah hăng pơkă tong ten nua sĭ mơdrô ƀơi hơdôm anih sĭ gơnam”.

Tui tơlơi pơkă bruă mă “Kơtưn pel ĕ, krăo lăng hăng pơgăn mơnong ƀong huă ƀu hơdjă amăng bơyan ngui ngor thun 2023”. Anom bruă wai lăng sĭ mơdrô git gai anom bruă wai lăng sĭ mơdrô hơdôm tơring čar, ƀôn prong kơtưn amăng bruă gum hrŏm hăng hơdôm anom bruă bơdjơ̆ nao pel ĕp na nao hơdôm anih djă pioh, tum pơƀut glăi gơnam tam kual giăm guai, hơdôm anom bruă sĭ mơdrô, siêu thị, sang čơ, anih djă pioh gơnam rơ-ơ̆, hơdôm anom bruă blơi mut sĭ mơdrô mơnong ƀong huă dưm amăng hĭp rơ-ơ̆….Laih dong, rơkâo pơsir hĭ khut khăt hơdôm gơnam aka ƀu thâo tong ten anih pơkra pơjing mơng anun pơgăn hĭ bruă sĭ gơnam ƀu hơdjă. Ơi Nguyễn Đức Lê, Kơ-iăng khua anom bruă wai lăng sĭ mơdrô brơi thâo:

“Ƀing gơmơi plih mơng bruă pel ĕp hlâo hơdai nao tơdơi dong, kiăng ngă hiưm pă brơi hơdôm anom bruă pơkra pơjing, blơi mut, sĭ mơdrô hơdôm gơnam ƀong huă, tañ ba gơnam pơkra mơng ƀing gơñu truh pơ mơnuih ƀon sang. Samơ̆, tơdơi kơ pel ĕp ƀing gơmơi ƀuh hơdôm bruă ngă soh ƀudah gơnam tam ƀu djơ̆ hăng tơlơi pơkă lơ̆m ba hyu sĭ mơdrô lu hloh. Bruă pơhrui glăi amra pơsir hĭ tơnap tap biă mă. Mơ̆ yôm hloh tui ră anai lĕ, mơnuih ƀon sang hơmâo mă yua gơnam ƀu hơdjă, ƀudah ƀu pơhlôm bơbeč nao tơlơi suaih pral, yua anun yơh ƀing gơmơi ăt rang kơđiăng, anom bruă wai lăng sĭ mơdrô lêng kơ lăng bruă pơgăn hơdôm tơlơi ngă soh amăng pơhlôm mơnong ƀong huă hơdjă lĕ bruă yôm phun…

Khul git gai hơdôm bruă bruă gơnong glông  kơ bruă pơhlôm mơnong ƀong huă hơdjă lăi rơđah: bơyan ngui ngor thun 2023 yôm phăn biă mă yua anai lĕ hrơi blan kiăng hơkrŭ glăi tơlơi kơ abih klin kheng. Yua anun, djop ding jum, gơnong bruă, anom bruă, gong gai ƀon lan, anom bruă bơdjơ̆ nao, grup pel ĕp pơlir hơdôm anom bruă kiăng gum hrŏm kjăp, pơtrut bruă pel ĕp, plai ƀiă ngă hră pơ-ar amăng pel ĕp mơng gơnong bruă hăng hơdôm mơnong ƀong huă blơi mut. Tui anun, tŏ tui hơmâo hơdră bruă, jơlan hơdră tong ten, kiăng pơtrut, pơtrut pơsur sĭ mơdrô hơdôm mơnong ƀing huă hơdjă, gơnam hữu cơ ƀơi hơdôm anih sĭ mơdrô. Sit biă ñu pơtă pơtăn, gơnam sĭ mơdrô kiăng hơmâo tơlơi črâo ba tong ten, lăp djơ̆ amăng wai lăng gơnam hơdjă ba sĭ mơdrô amăng plang internet. Bruă pel ĕp, lăi pơthâo kơ gơnam hơdjă hơmâo pơtrut kơtang, na nao kiăng abih bang mơnuih ngă tui tơlơi tơlơi phiăn amăng pơkra, sĭ mơdrô mơnong ƀong huă, pơhlôm brơi mơnuih blơi yua amăng bơyan bơnga, hrơi ngui ngor./.