VOV4.Jarai - Hơmâo ƀuh pơ dêh čar Khač rơnuč thun 2019, Covid-19 hmao tlôn dong tah jing klin prong ngă kơ rŏng lŏn tơnah rung răng kơtang. Truh mông anai, klin anai ngă rơbêh 6 klăk 500 rơbâo čô mơnuih djai amăng mrô rơbêh 600 klăk čô mơnuih ƀă klin.

Rŏng lŏn tơnah gir run, ĕp hơdră pơkra djŏp djuai vaccine hăng hơdră pơjrao đah mơng plai ƀiă hơmâo mơnuih ruă kraih hăng djai yua Covid-19 ngă. Yua hơmâo tơlơi gir tui anun, truh mông anai, hơmâo tơlơi klă hiam laih, lơ̆m rŏng lŏn tơnah dưi pơgang hĭ.

Khă hnun, ăt amuñ hơmâo klin hơđuh glăi dong mơn, yua djuai phrâo mơng virus SARS-CoV-2 ăt dŏ đôč. Yua hnun, hơdôm boh dêh čar kiăng tlâ̆o djŏp vaccine kơ ƀing amuñ ruă kơtang, laih anun pơčrang lăng kman, pơgang hŭi virus lar hyu dong. Tui hăng Anom bruă ia jrao rŏng lŏn tơnah, blan 10 anai, ƀing kơhnâo mơng Anom bruă anai amra pơsit glăi klin Covid-19 ăt jing bruă ječ ameč gah ia jrao ƀơi rŏng lŏn tơnah dong mơn hă ƀŭ.

Găn rơgao hrơi blan tơnap tap wơ̆t hăng lu tơlơi rơngôt prong mơng klin Covid-19 ngă rai, truh ră anai Việt Nam dưi pơgang laih klin laih anun hơdip amăng hrơi blan phrâo “dưi hơdip rơnuk rơnua, pơgang hơdeč, pơgang tŭ yua klin Covid-19”. Rơgiao kơ anun ăt pơphun tlâ̆o vaccine pơgang Covid-19 ƀơi abih bang, tlâ̆o arăt 3 arăt 4...kiăng dưi pơgang klin kơjăp, dêh čar ta ăt phru tui mơn hơdră pơgang klin, ngă lăp djơ̆ hăng mông anai, djru pơđĭ kyar bơwih ƀong.

Ƀing ta lui hĭ pơhaih gah ia jrao, laih dong ƀu kŏm pơƀut lu mơnuih hăng dŏ pơčlah dong tah. Phrâo anai hloh lĕ tơlơi pơplih khŏm kiăng gôm ƀô̆ lơ̆m tơbiă hyu gah rơngiao. Hlâo adih, bơnal gôm ƀô̆ jing gơnam nao hrŏm hăng ƀing ta mơtăm, ƀu thâo lui ôh lơ̆m tơbiă hyu, ră anai hơmâo pơkă tui hluai mơnuih mơn, tui hluai kơ anih ƀing ta đuăi hyu mơn mơng gôm ƀô̆ pơgang Covid-19. Tơlơi pơhing 5K ăt pơplih jing 2K+ (bơnal gôm ƀô̆ + pơdjai kman + vaccine + ia jrao + pơjrao + măi mok phrâo + tơlơi thâo hluh mơng mơnuih ƀon sang...)

Dêh čar ta hơmâo tlâ̆o rơbêh 258 klăk liêu vaccine pơgang Covid-19 laih anun jing sa amăng hơdôm boh dêh čar hơmâo mrô mă yua liêu vaccine hăng tlâ̆o vaccine lu hloh ƀơi rŏng lŏn tơnah. Yua hơmâo tlâ̆o vaccine lu, ƀing ta dưi pơgang klin. Khă hnun hai, hăng djuai phrâo mơng klin anai, mrô mơnuih ƀă klin đĭ lu glăi laih, pơphun mơng blan 7/2022. Lơ̆m anun, hơdôm blan hlâo kơ anun, rim hrơi dêh čar ta kơnong hơmâo 500 truh 700 čô mơnuih đôč, truh blan 7 lĕ mrô anai truh kơ 1.000 čô mơnuih, ră anai năng ai 2.900 čô mơnuih ƀă klin. Bơhmu hăng blan 7, mrô mơnuih ƀă Covid-19 amăng blan 8 đĭ 2,4 wơ̆t, hơmâo 24 čô mơnuih djai, lu tui 18 čô.

Mrô mơnuih ruă kơtang, djai ăt lu tui mơn. Mơng akŏ blan 9 truh ră anai, kơnong amăng 2 hrơi đôč dêh čar huăi hơmâo mơnuih djai yua Covid-19, bơ hrơi pơkŏn rim hrơi hơmâo mơng 1 truh 2 čô, ƀơi anŏ ñu hơmâo truh 5 čô mơnuih djai. Ding jum ia jrao lu wơ̆t hơmâo tơlơi pơtrun kiăng hơdôm boh tơring čar tlâ̆o vaccine tañ ƀiă, pơgang klin klă đah mơng plai ƀiă hơmâo mơnuih djai...

Ƀơi Dak Lăk, klin Covid-19 amăng hrơi blan rơgao ăt pơplih tơnap mơn. Tui hăng mrô jŭ yap mơng Anom bruă pơgang tơlơi duam ruă tơring čar Dak Lăk, kơnong amăng 3 blan tal 3, tơring čar čih pioh hơmâo rơbêh 1.300 čô mơnuih ƀă Covid-19. Lăp đing nao, mrô mơnuih ƀă klin lu tui amăng blan 9, amăng blan 9, Dak Lăk ăt čih pioh hơmâo 4 čô mơnuih djai yua Covid-19 ngă.

Kiăng pơgăn klin Covid-19 lar hyu, Dak Lăk pơtrut tui bruă pôr pơhing ăt kah hăng ječ ameč tlâ̆o vaccine pơgang Covid-19 kơ djŏp mơnuih. Tui anun, truh lơ 25/9, Dak Lăk hơmâo tlâ̆o pơgang arăt 1 vaccine pơgang Covid-19 kơ ƀing čơđai mơng 5 truh kơ prong hloh. Arăt 2 hăng arăt tlâ̆o lok glăi tal 1 kơ mơnuih mơng 12 truh kơ prong hloh ăt hơmâo lu hloh mơn, ƀudah dưm dưm hăng mrô hơmâo tlâ̆o amăng dêh čar ta. Khă hnun hai, mrô tlâ̆o lok 2 arăt 2 kơ ƀing 18 thun hăng arăt 2 kơ čơđai mơng 5 truh yŭ kơ 12 thun dŏ kaih laih anun hơmâo aset biă bơhmu hăng hơnong pơkă, anun lĕ 66% hăng 44%.

Dak Lăk tlâ̆o vaccine pơgang klin Covid-19

Amăng lơ 24/9 phrâo rơgao, Jơnum min mơnuih ƀon sang tơring čar Dak Lăk hơmâo pơphun ngă bruă pôr pơhing pơgang klin Covid-19 amăng tơlơi hơdip phrâo hơmâo anăn “Yua kơ sa Việt Nam kơjăp hăng suaih pral” laih anun tlâ̆o vaccine pơgang Covid-19 kơ ƀing čơđai mơng 5 truh yŭ kơ 18 thun. Ƀơi mông ngă bruă, khua mua tơring čar Dak Lăk pơsit, tơring čar ăt gir ngă tui hơdôm hơdră pơgang klin Covid-19 hăng 3 tơlơi phun anun lĕ: pơčrang kman, brơi pơčlah, pơjrao. Laih dong, kiăng abih bang anom bruă, khul grup hăng mơnuih ƀon sang gum pơgang, ngă tui tơlơi pơtrun 2K hơmâo: Bơnal gôm ƀô̆, Pơdjai kman wơ̆t hăng tlâ̆o vaccine, ia jrao, bruă pơjrao, mă yua măi mok phrâo, tơlơi thâo pơmin mơng mơnuih ƀon sang hăng hơdôm hơdră pơgang pơkŏn dong. Hrŏm hăng anun jak iâu abih bang mơnuih ƀon sang tŭ ư hăng bruă tlâ̆o vaccine pơgang covid-19, kiăng tlâ̆o brơi tañ hloh hăng ƀing čơđai mơng 5 truh yŭ kơ 18 thun.

Siu H’Mai: Pơblang