-Truh lơ 23/10 đơ đam rŏng lŏn tơnah hơmâo čih pioh 628 klăk čô mơnuih ƀă kman Covid 19, amăng anun rơbêh 6 klăk 500 rơbâo čô mơnuih djai yua Covid 19. Lu dêh čar ăt čih pioh hơmâo na nao mơnuih ƀă hăng djuai kman phrâo pơblih mơ̆ng kman virus SARS CoV-2 hăng anŏ ƀă hyu hmar biă mă pơkă hăng djuai kman hlâo kơ anun.

-Tui hăng nai prin tha Fahad Razak, sa čô mơnuih rơgơi kơhnâo dêh čar Canada pô kơsem min klin Covid 19 brơi thâo, drơi kman pơblih phrâo mơ̆ng virus corona juăt ƀuh amăng bơyan hlim akŏ bơyan puih, ngă kơ mrô mơnuih ƀă lu hăng djai klin. Tơlơi truh klin djơh hăng anai amra kơtang glăi amăng thun anai. Nai prin tha Fahad Razak lăi pơtong, tơdah ƀing ta ƀu ƀă glăi kman phrâo amăng bơyan Covid 19 lu hloh, sit mơ̆n ƀing mơnuih rơgơi kơhnâo amra pôr pơthâo abih klin yơh amăng bơyan phang pơ anăp adih.

-Kiăng gir run hloh pioh pơtrut bruă ngă pơhlôm, pơgang klin Covid 19 hlăk amăng hrơi blan či đut, anom bruă WHO pơtă pơtăn hơmâo 6 jơlan hơdră brơi kơ djop dêh čar ngă ding kơna Khul anai. Blung hlâo khom tuh pơ alin tlâ̆o pơgang djop abih bang khul mơnuih amuñ ƀă klin hloh. Dua lĕ ăt pơtrut bruă pơčrang kman SAR CoV-2 hăng hơdôm ƀing duam ruă jơlan suă jua pơkŏn, hơmâo tom mơnuih pơtŭk hơdrap.

Mơnuih duam ƀă klin Covid 19 hlăk pơjrao ƀơi sang ia jrao prong kual Dap Kơdư

Klâo lĕ pơhlôm bruă mă pơgang tơlơi suaih pral pơjrao ƀing ƀă kman Covid 19, lir hơbit hăng bruă mă pơjrao duam ruă mơ̆ng blung a; dăp hơdră, prăp pơgang hlâo klin hơđuh rai hăng hơdră blơi prăp gơnam yua gah bruă ia jrao hăng mơnuih mă bruă. Pă lĕ ngă tui djơ̆ hơdră pơhlôm pơgang hăng pel ĕp kman amăng djop sang ia jrao. Tŏ tui dơ̆ng, kơnuk kơna khom bơkơtuai rơđah rơđong hăng mơnuih ƀôn sang lăi nao kơ anŏ pơblih phrâo hơdră bruă pơdjơ̆ nao pơgang klin Covid 19.

-Ƀơi Việt Nam, tui hăng mrô jŭ yap mơ̆ng Ding jum ia jrao, mơ̆ng akŏ blan 10 truh lơ 24/10, Việt Nam hơmâo čih pioh 22 rơbâo čô mơnuih phrâo ƀă klin Covid 19, sa hrơi aka truh mơ̆n 1000 čô, hrŏ ƀiă pơkă mơkrah blan 9. Yap truh lơ 23/10 lĕ đơ đam dêh čar hơmâo tlâ̆o djop giăm 262 klăk liêu vaccine pơgang Covid 19.

-Pơhiăp git gai jơnum, kơtưn kơ bruă pơhlôm pơgang klin hăng bruă tlâ̆o pơgang vaccine Covid 19 pơphun amăng lơ 20/10 phrâo rơgao, Kơ-iăng khua ding jum ia jrao yă Nguyễn Thị Liên Hương rơkâo djop tơring čar ăt gleng nao kơ bruă pok pơhai lu hơdră pơhlôm pơgang klin tui hăng tơlơi git gai mơ̆ng kơnuk kơna, Khua dêh čar laih anun tui hăng tơlơi pơčrâo ba mơ̆ng ding jum ia jrao, djop ding jum, anom bruă pơkŏn.

Tơlơi pơtô ngă tui 2 K pioh pơhlôm pơgang klin Covid 19 amăng tơlơi pơhing phrâo

Ngă tui khut khăt, pok pơhai sa amăng plĕ lu hơdră pơhlôm, pơgang klin; biă mă ñu pơtrut tañ tlâ̆o vaccine pơgang Covid 19, čih pioh djop boh tơhnal tlâ̆o pơgang vaccine hăng pôr tơlơi pơhing glăm ba amăng bruă mă, tơlơi thâo hluh mơ̆ng mơnuih ƀôn sang, plơi pla….boh nik ñu amăng bơyan puih phang hlăk či truh, jai lu mơnuih hơmâo tơlơi ruă jơlan suă jua hăng ƀă klin hơdrap, mut đih pơjrao pơ sang ia jrao.

-Ƀơi Dak Lak, tơlơi pơhing Covid 19 amăng blan 10 rơgao hơmâo mrô hrŏ tui mrô mơnuih ƀă. Yap truh lơ 24/10, tơring čar hơmâo čih pioh 200 čô mơnuih ƀă, hrŏ tui rơbêh ha mơkrah pơkă hăng blan 9. Lăp đing nao biă mă, hơmâo hơdôm hrơi amăng blan 10 tơring čar hơmâo 2 čô mơnuih djai yua Covid 19, abih 2 čô mơnuih djai anai lêng kơ tha rơma laih, hơmâo lu tơlơi ruă mơ̆ng hlâo hăng aka ƀu tlâ̆o pơgang vaccine Covid 19 ôh.

-Bruă mă tlâ̆o pơgang Covid 19 ăt dưi hơmâo anom bruă ia jrao tơring čar Dak Lak pok pơhai khut khăt mơtam amăng blan 10. Yap truh lơ 20/10, Dak Lak hơmâo mrô mơnuih tlâ̆o jrum tal 1 hăng tal 2 kơ khul mơnuih mơ̆ng 12 thun pơngŏ lĕ djop laih. Arăt tal 3 kơ khul mơnuih mơ̆ng 18 thun pơngŏ hơmâo rơbêh 87% hăng arăt tal 4  rơbêh 70%. Arăt tal klâo kơ khul mơ̆ng 12 thun pơngŏ djop 75%. Dak Lak ăt hơmâo tlâ̆o djop brơi kơ čơđai mơ̆ng 5-11 thun arăt tal 1 hăng arăt tal 2 kơ khul anai truh 56%. Tơring čar ăt ngă tui hơdră pơhlôm, pơgang klin Covid 19 hăng 3 hơdră phun:  pơčrang kman, brơi dŏ pơčlah, pơjrao phara. Laih dơ̆ng rơkâo đjop anom bruă, khul grup, djop sang bruă, mơnuih ƀôn sang ngă hrom, ăt pơtrut ngă tui djơ̆ tơlơi pơtrun 2K hăng ngă tui djop tơlơi pơtô pơkŏn pơhlôm pơgang klin Covid 19 amăng tơlơi pơhing phrâo mơ̆ng anom bruă ia jrao djop gưl hơmâo pơtô laih.