VOV4.Jarai-Ră anai, anom bruă ia jrao amăng dêh čar hlăk pơtrut tlâ̆o ia jrao vaccine pơgang kơ lu mơnuih, anăp nao kiăng dưi pơgang klin amăng kual plơi pla pioh pơgăn khut khăt klin covid 19. Laih dơ̆ng, bruă pơjrao mơnuih F0 jing mơnuih ƀă klin laih amăng sang anŏ mơtam lĕ, hăng ƀing mơnuih duăm djong, ră anai djop bruă hlăk pơwơ̆t glăi tơlơi hơdip mơda kah hăng tơđar.

Ƀơi anăp kơ tơlơi pơhing mrô mơnuih ƀă covid 19 ăt dŏ lu, ƀôn prong Đà Nẵng hơmâo git gai pơtrut pok pơhai sang ia jrao dưi ba hyu pơjrao djop anih, kiăng hmao kru wai lăng, pơjrao kơ ƀing F0 pơ sang anŏ mơtam. Mơ̆ng anun, pơhrŏ ƀiă tơlơi kơtrâ̆o kơ sang ia jrao prong pơjrao mơnuih ƀă klin hăng wai lăng mơnuih duăm ruă.

Phường Thanh Khê Tây, kuân Thanh Khê lĕ sa amăng lu phường ƀơi ƀôn prong Đà Nẵng pok pơhai sang ia jrao hyu pơjrao tơl sang kơ ƀing F0 duăm djong. Sang ia jrao ƀudah khul ơi ia jrao mơ̆ng phường djru pơjrao brơi kơ 147 čô mơnuih F0 pơ sang anŏ, truh ră anai 50 čô suaih laih duăm. Ơi ia jrao Đỗ Văn Đô, Khua sang ia jrao phường Thanh Khê Tây brơi thâo, bruă mă rĭm hrơi mơ̆ng mơnuih ngă bruă amăng sang ia jrao phường lĕ čih anăn mơnuih F0 tui hluai khul, phung mơnuih hơmâo tơlơi ruă phara. Ƀing ngă bruă ia jrao juăt pơtruh nao rai tơlơi pơhiăp tơña bla hăng mơnuih ƀă covid 19, pơhiăp telephôn kiăng thâo tơlơi suaih pral hăng pơtô brơi mơ̆ng ataih hơdră pơjrao tơdah kiăng:

“Hơmâo hơdôm čô mơnuih duăm mưn ruă amăng tơda ƀudah ruă kian hăng hơmâo lu tơlơi mưn pơkŏn thơ, kâo pô mơtam nao ĕp lăng, pơkă brơi tơlơi duăm ruă kơ ƀing anun. Truh abih mơguah ƀuda habih mông  tlam čih pioh anăn ƀing ƀă kman pơpă ta hơmâo nao ĕp lăng tơl sang, kiăng kơ thâo hơdră pơjrao hiư̆m pă dơ̆ng thơ, tơdah kiăng”.

Mơnuih ngă bruă ia jrao hyu pơjrao tơl sang phường Thanh Khê, Đà Nẵng nao tơl sang tơña bla hăng pơjrao mơnuih F0

Ƀơi Kuận Sơn Trà, ƀôn prong Đà Nẵng rĭm hrơi mơtam čih pioh giăm 200 čô mơnuih ƀă F0. Djop sang ia jrao hyu pơjrao ƀơi djop anih mơ̆ng 7 boh phường amăng kuận pơphun ngă bruă tui anun soh, djru kơ khul khua mua git gai pơgang klin amăng kuận dưi thâo wai lăng, krăo lăng bruă pơjrao ƀing F0 ƀơi sang anŏ đah mơ̆ng klă hloh.

Rĭm sang ia jrao hyu pơjrao tơl sang prăp lui dua boh sưng đih, djop ia jrao dưm amăng hip, akhăn gôm ƀô̆, măi pơkă lăng drah rô, tơnŏk tơpư̆,…laih anun djop mơta ia jrao bơwih brơi kơ bruă pơčrang kman. Ơi Huỳnh Văn Hùng, Kơ-iăng Khua jơnum min mơnuih ƀôn sang kuận Sơn Trà, ƀôn prong Đà Nẵng brơi thâo, yua ƀing ngă bruă gah ia jrao ƀiă đơi, anun khom jak iâu wơ̆t ƀing ngă bruă gah ia jrao pơdơi abih thun bruă, ƀing hlăk ai pơyơr pran jua djru hrom djop sang ia jrao hyu pơjrao tơl sang:

“Jơnum min mơnuih ƀôn sang djop phường hơmâo jak iâu ƀing djru bruă, ƀing hlăk ai pơyơr pran jua ngă hrom. Truh ră anai, hăng mrô pơjrao F0 ƀơi sang anŏ amăng kuân lĕ rơbêh 1.600 čô mơnuih duăm. Boh tơhnal anai ră anai hơđong laih. Hơdôm bruă mă mơ̆ng pơtô brơi mơnuih ruă pơgang mă pô truh kơ pơsir tơlơi rơkâo, tơlơi tơña bla mơnuih ruă hmao kru”.

Ră anai, ƀôn prong Đà Nẵng hơmâo giăm 30 sang ia jrao hyu pơjrao tơl sang laih anun mă bruă hơđong biă mă. Tui hăng tơlơi pơtong lăng, djop sang ia jrao, blung a hơmâo ba glăi boh tŭ yua sit nik, djru ngă hrŏ ƀiă tơlơi kơniă pơjrao kơ mơnuih duăm ƀing F0 duăm djong amăng sang ia jrao prong.

Khua ding jum ia jrao ơi Nguyễn Thanh Long

Tui hăng Khua ding jum ia jrao, ơi Nguyễn Thanh Long, bruă pơjrao kơ ƀing duăm djơ̆ covid 19 djong ră anai tŭ yua biă mă amăng dêh čar ta. Mrô mơnuih djai yua kơ tơlơi ruă anai hrŏ mơ̆n. Ngă tui Hră pơtrun 128 mơ̆ng Kơnuk kơna brơi bong glăi lăp djơ̆, rơnuk rơnua, ĕp tong ten tŭ yua klin covid 19, Ding jum ia jrao pơblih hơdră wai lăng tơlơi truh sat djơ̆ lăp mơ̆n, tui tơlơi pơhing hrom abih bang amăng rŏng lŏn tơnah. Biă mă ñu, tơdơi kơ pơsit kiăng ƀing F0 djong dưi pơjrao pơ sang anŏ, sang ia jrao prong, anih pơjrao lu mơnuih lĕ hrŏ ƀiă, klă hiam kơ bruă ngă tui pơjrao mơnuih duăm ruă, mrô djai lĕ ƀiă tui.

“Yôm hloh mông anai lĕ ƀing ta khom tlâ̆o vaccine pơgang brơi djop mơnuih, sa amăng hơdôm dêh čar tlâ̆o pơgang lu hloh amăng rŏng lŏn tơnah kơ bruă tlâ̆o vaccine. Samơ̆ ƀing gơmơi ăt pơtong glăi mơ̆n, vaccine lĕ sa amăng bruă lăng kah boh khuă, gai kăl hruă kjăp phun ba tơlơi hơdip mơda, bruă mă pơwơ̆t glăi kah hăng tơđar, hrom hăng lu hơdră pơjrao djơ̆ lăp pơkŏn.

Yua kơ anun, Ding jum ia jrao lăi pơthâo hăng kơnuk kơna, Khua dêh čar pok pơhai hơdră tlâ̆o ia jrao pơgang amăng bơyan pơdơi têt ăt mă bruă mơ̆n, ƀu pơdơi ôh kiăng tlâ̆o pơgang djop kơ abih bang hlơi truh hrơi, blan pơkă. Hơdôm mơnuih glăi ƀong têt pơ plơi pla, dưi rơkâo tlâ̆o pơgang pơ plơi pla gơñu pô pơ anun yơh”.

Ding jum ia jrao khom prăp lui djop ia jrao vaccine pơgang covid 19 pioh tlâ̆o kơ mơnuih ƀôn sang. Bruă tlâ̆o vaccine ƀu pơgô̆ ôh samơ̆ kiăng pơtrut mơnuih ƀôn sang thâo hluh rơđah anŏ gêh găl, tŭ yua mơ̆ng bruă tlâ̆o pơgang. Ƀuh rơđah, rơbêh kơ 80% mrô mơnuih ƀă klin covid 19 djai hrơi blan rơgao yua aka ƀu tlâ̆o djop arăt vaccine tui tơlơi pơkă laih anun lu kơ ƀing tha rơma, lu thun laih hăng hơmâo tơlơi ruă kraih laih mơ̆n.

Khua ding jum ia jrao ơi Nguyễn Thanh Long lăi pơtong, bruă mă tlâ̆o ia jrao pơgang amăng bơyan phang amra tañ mơ̆n ba tơlơi hơdip pơwơ̆t glăi kah hăng tơđar.

"Ƀing gơmơi tơnap tap laih giăm 2 thun rơgao hăng boh tơhnal ƀing ta dưi ba glăi prong prin mơ̆n. Ƀing ta ăt rơkâo hơdor tơngia kơ abih bang sang anŏ ƀing ơi ia jrao, ăt khom gleng nao, ngă anih kơnang pioh kơ ƀing ngă bruă gah ia jrao hơđong pran jua mă bruă. Ƀing gơmơi bơni mơ̆n kơ mơnuih ƀôn sang hơmâo gum hrom, djru, ngă hrom anom bruă ia jrao laih anun abih bang glong bruă kơđi čar ăt hnun mơ̆n dưi pơgăn hĭ ƀiă klin kheng duăm ruă.

Ƀrô amăng thun phrâo rơkâo mơ-it hiăp pơpŭ kơ abih bang ƀing ngă bruă gah ia jrao, ơi ia jrao, nai ia jrao sa thun phrâo dơ̆ng hiam drơi jăn, pran jua, mơak klă hăng ngă bruă tŭ yua lu hloh laih anun yôm hloh dơ̆ng tañ dưi pơgăn hĭ klin kheng duăm ruă, tañ ba tơlơi hơdip mơda pơwơ̆t glăi tơlơi hơdip mơda kah hăng tơđar.

Nay Jek: Pơblang