Anai lĕ thun tal 9 tơring čar Gia Lai pơphun bruă mă amăng hơdră Jơlan ngă bruă ia mriah. Hơdôm wơ̆t hlâo kơ anai, bruă mă jak iâu pơyơr drah dưi hơmâo lu mơnuih ƀôn sang tŭ ư ngă hrŏm ƀơi Gia Lai, mrô mơnuih nao čih anăn pơyơr drah jai hrơi lu laih anun anung drah mă răk pioh thun tơdơi lu hloh kơ thun hlâo.

Tui hăng Khul jak iâu pơphun bruă pơyơr drah ƀơi Gia Lai, mơ̆ng akŏ thun truh ră anai, đơ đam tơring čar hơmâo pơphun 54 wơ̆t pơyơr drah, tŭ mă rơbêh 10.400 anung drah. Amăng hơdră jơlan ngă bruă ia mriah tal anai, Khul khua mua pơphun pơkă tơhnal bruă kiăng hơmâo boh ƀiă 600 anung drah, dưi djop drah pioh pơjrao kơ mơnuih duăm ruă amăng sang ia jrao. Ƀơi mông jơnum, hơmâo apah bơni hăng jao hră bơni kơ 17 khul grup, 3 boh sang anŏ hăng 25 čô mơnuih tŭ mă hră bơni yua hur har hloh jak iâu pơyơr drah tơlơi khăp pap thun 2023-2024.