Juăt nao pơjrao pơ sang ia jrao prong kual Dap kơdư, ơi Mai Thanh Nhàn, dŏ amăng să Hoà Thắng, plơi prong Buôn Ma Thuột, tơring čar Dak Lak brơi thâo, ñu hok mơ-ak biă mă hơdôm tơlơi pơplih amăng ngă hră pơ-ar lơm nao khăm pơjrao:

“Ră anai nao khăm pơjrao tơlơi ruă gêh gal biă mă hăng huăi rơngiă lu hrơi mông. Hlâo anun lĕ khŏm čih mrô dŏ tơguăn laih anun pioh glăi hră pơhlôm nua ia jrao, tơdơi kơ ơi ia jrao khăm giong kah mơng nao duh prăk hăng mă glăi hră pơhlôm nua ia jrao yua anun rơngiă lu hrơi mông. Ră anai yua boh thâo phrâo, bruă ngă tui anai tañ biă mă”.

Ngă gêh gal hloh brơi mơnuih ruă, bruă pơplih yua boh thâo phrâo hơmâo Sang ia jrao prong kual Dap kơdư pok pơhai amăng djop mơta anun lĕ: čih anăn khăm pơjrao tui hră pơhlôm nua ia jrao mơ̆ yua căn cước công dân dưm čip, jao hră duh hră điện tử, duh prăk ƀu kiăng brơi tơl tơngan, pơkôl hrơi mông pot glăi khăm amăng măi mok…Tui ơi Nguyễn Trí Dũng, Khua anom bruă yua boh thâo măi mok phrâo, djop hră pơ-ar khăm pơjrao, prăk duh hăng hơdôm plang yua pơlăi nao rai lêng kơ pơdah brơi tong ten soh:

“Măi mok wai lăng phrâo gêh gal biă mă brơi mơnuih duam ruă lơm nao khăm hăng pơjrao yua ƀing gơñu ƀu kiăng djă ba hră pơ-ar. Mơng anun sang ia jrao ăt ngă lu mơta bruă brơi lăp djơ̆, tơlơi pơhing amăng hră pơhlôm ia jrao ăt pơhlôm brơi”.

Ră anai rĭm hrơi, sang ia jrao prong kual Dap kơdư tŭ mă giăm 1.500 čô mơnuih nao khăm pơjrao hrŏm hăng rơbêh 1.600 čô mơnuih glăk đih pơ sang ia jrao. Ơi ia jrao Trịnh Hồng Nhựt-Kơ-iăng khua sang ia jrao brơi thâo, bruă pơplih yua boh thâo phrâo ba glăi lu anŏ pơplih tong ten amăng djop bruă.

“Sang ia jrao prong kual Dap kơdư hơmâo pok pơhai mă yua ha wŏt lu măi mok amăng ngă hră pơ-ar hăng yua amăng khăm pơjrao kah hăng amăng wai lăng djop gơnam măi mok pơkŏn kiăng ba glăi boh tŭ yua kah hăng tañ amăng ngă hră pơ-ar, ngă gêh gal brơi mơnuih duam ruă kah hăng pơhlôm brơi ƀing ơi ia jrao hơmâo lu hrơi mông kiăng pơjrao brơi mơnuih ruă.”

Ơi Nguyễn Hữu Vũ Quang, kơ-iăng khua gơnong bruă ia jrao tơring čar Dak Lak brơi thâo, ƀu djơ̆ kơnong sang ia jrao tơring čar đôč ôh, bruă pơplih yua boh thâo măi mok phrâo ăt pok pơhai amăng hơdôm sang ia jrao ƀơi ƀon lan. Djop sang ia jrao hơmâo yua boh thâo măi mok amăng bruă wai lăng, khăm pơjrao, bruă tlâ̆o ia jrao pơgang…Măi mok wai lăng ƀơi sang ia jrao ƀon lan hơmâo pok pơhai ƀơi 185 boh sang ia jrao să, phường, tơring kual. Ră anai hơmâo laih 21 boh sang ia jrao hơmâo măi mok pơčrang lăng, črâo brơi bruă khăm pơjrao mơng ataih. Gơnong bruă ia jrao ăt hơmâo pok pơhai yua măi mok hăng anăn “Ơi ia jrao kơ abih bang mơnuih” kiăng pơplih amăng bruă khăm pơjrao brơi mơnuih ƀôn sang hăng hrưn đĭ klă dong amăng bruă khăm pơjrao amăng djop sang ia jrao ƀon lan.

Ơi Nguyễn Hữu Vũ Quang lăi pơthâo, pơ anăp anai, gơnong bruă ia jrao tơring čar Dak Lak tŏ tui pơplih phrâo amăng bruă mă, kjăp dong amăng bruă mă, bruă wai lăng laih dong tŏ tui pơtrut tañ pơplih yua boh thâo măi mok phrâo.

“Blung hlâo lĕ pơjing anih djă pioh kiăng hră pơ-ar khăm pơjrao điện tử kơ mơnuih ƀôn sang dưi lăi pơthâo amăng hơdôm anih anom djă pioh hră pơ-ar dêh čar ƀudah hơdôm boh sang ia jrao; dua dong lĕ pơđĭ kyar yua boh thâo phrâo lơm mơnuih ƀôn sang pơmut amăng plang VNEID pơmut hră khăm pơjrao amăng anih djă pioh dêh čar; tlâo dong lĕ lăi pơthâo bruă khăm pơjrao mơng ataih brơi mơnuih ƀôn sang hăng anom bơwih ƀong sĭ mơdrô, gir run djop bruă bơwih brơi gah ia jrao amăng djop sang ia jrao lêng kơ pơhlôm djop hră pơ-ar./.”