VOV4.Jarai-Ƀơi tơring čar Daklak, ră anai mrô mơnuih djơ̆ Covid-19 glăk đĭ tañ hăng rơbêh kơ 4000 čô mơnuih sa hrơi. Tơlơi anai hmâo ngă bơdjơ̆ nao prong mơnuih mă bruă ia jrao. Dong mơng hrơi Ding jum ia jrao hmâo tơlơi pơkă, pơtô ba bruă pơjrao F0 ƀơi sang, hrom hăng bruă mă yua plăng facebook, bruă wai lăng, pơjrao mơnuih ruă Covid-19 jing rơnang ƀiă, ƀing ơi nai ia jrao djru mơnuih ruă pơjrao tơlơi ruă tui hơdôm grup čat Zalo ba glăi tŭ yua biă.

 Rơnuč blan 1 phrâo rơgao, amai N.T.P ƀơi phường Ea Tam, plơi prong Buôn Ma Thuột thâo ču ƀă kơman Sars-CoV-2. Tơdơi kơ nao lăi pơthâo hăng anom ia jrao hăng ngă hră rơkâo pơjrao tơlơi ruă ƀơi sang, amai N.T.P dưi pơtô brơi gum hrom grup čat Zalo pioh kơ ƀing F0 pơjrao ƀơi sang pơ̆ phường Ea Tam. Lăng ƀuh bruă mă anai djơ̆, gêh gal kơ bruă pơjrao ƀơi sang, amai N.T.P tŭ ư gum hrom. Lăi pơthâo kơ hơdôm tơlơi găn rơgao lom gum hrom grup čat anai, amai N.T.P ruai glăi:

“Hơdôm hrơi rơnuč blan 1, kâo dưi pơtô brơi dô̆ čơlah, pơjrao ƀơi sang lom djop djơ̆ hơdôm tơlơi pơkă hăng biă ñu lĕ, hmâo tơlơi gum djru hur har mơng grup Zalo pơjrao F0. Lom kâo gum hrom grup, hmâo laih hơdôm rơtuh čô, amăng anun hmâo wot mơnuih mă bruă ia jrao, mơnuih ruă hăng mơnuih suaih ruă. Amăng hơdôm hrơi dô̆ čơlah lĕ, bruă gum hrom grup Zalo djru kâo plai ƀiă pơmin hne adih, yua kơ rim hrơi khom dô̆ ƀơi anih 4 bơnah pơnăng sang. Bơhmu hăng bruă khom nao pơ̆ anih dô̆ čơlah hơbit kah hăng hlâo adih lĕ, dưi pơjrao ƀơi sang hăng hmâo tơlơi lăi pơthâo, gum djru mơnuih mă bruă gah ia jrao tui jơlan facebook ƀu djơ̆ kơnong kơ djru brơi kơ kâo đôč ôh mơ̆, ƀing mơnuih ruă Covid-19 ăt ƀuh plai ƀiă mơn bơngot amăng pran jua”.

Tui hăng ơi ia jrao Ngô Mạnh Cường, Khua Anom ia jrao phường Ea Tam, plơi prong Buôn Ma Thuột, pơphun mơng ƀing ruă Covid-19 leng kơ mưn ƀuh pơdah rơnang đôč hăng bôh thâo pơjrao ƀơi hơdôm bôh sang ia jrao ƀu lu anun lu F0 rơkâo pơjrao mă pơ̆ sang. Khă hnun hai, yua kơ khul mơnuih mă bruă ia jrao ƀơi phường ƀiă, ƀu dưi hyu rim sang djru brơi kơ mơnuih ruă, anun anom ia jrao hmâo gơgrong hlâo mă yua facebook kiăng djru bruă wai lăng, pơjrao, amăng anun hmâo pơjing grup čat Zalo. Grup anai yua kơ anom ia jrao pơjing hăng mơnuih mă bruă ia jrao lĕ mơnuih wai lăng, ngă bruă lăi pơthâo, pơtô brơi hăng pơblang brơi tơlơi ƀu rơđah mơng F0 pơjrao ƀơi sang. Anai ƀu djơ̆ glông pôr pơhing tŭ yua mơng gơnong bruă ia jrao ôh mơ̆ ñu dô̆ jing anih pioh ƀing ruă Covid-19 lăi pơthâo nao rai tơlơi găn rơgao, pơsur pran jua tơdruă, djru ngă hơđong pran jua, plai ƀiă bơdjơ̆ nao sat tơdơi kơ pơjrao suaih ruă Covid-19. Ơi ia jrao Ngô Mạnh Cường brơi thâo:

“Ră anai phường Ea Tam hmâo năng ai ñu 1300 truh 1400 čô mơnuih F0 pơjrao ƀơi sang. Hăng mrô mơnuih ruă lu tui anai mơ̆ ƀu hmâo Zalo hă, ƀu thâo hơdôm čô mơnuih mă bruă ia jrao mơng djop brơi bruă wai lăng, yua kơ bruă khom ngă lu biă, kah hăng lăng tui anô̆ pơdah amăng drơi jăn, kah hăng: pơ-iă drơi jăn, pơtuk, tơnap suă jua, dol tơda, pơkă mrô oxy amăng drah (Spo2), pơtô brơi kiăng thâo krăn gru nam ruă kraih kiăng lăi pơthâo kơ mơnuih nai ia jrao… Rơgao kơ Zalo, mơnuih ruă dưi lăi pơthâo glăi tơlơi suaih pral mơng pô rim hrơi hăng nai ia jrao, kiăo tui anun mơ̆ krăp lăng, pơtô brơi bruă pơjrao”.

Ơi ia jrao Cường lăi lĕ bruă mă yua hơdră phrâo 4.0 amăng wai lăng, pơjrao mơnuih ruă Covid-19 gêh gal biă. Bơhmutu ñu kah hăng mơnuih nao mă bruă khom hmâo hră pơ-ar pơsir pơdơi duam ruă čơkă mă prăk mơng hră pơgang gah mơnuih mơnam, pơ ala kơ khom ba tơlơi pơsit pơjrao ƀơi sang kơ ri  mơnuih lĕ mơnuih mă bruă ia jrao kơnong kơ kiăng mơ-ĭt tơlơi pơsit kơ grup čat Zalo lĕ hơdôm rơtuh čô mơnuih ruă amra hmâo mă, ƀu rơngiă mông nao rai. Hơdôm mơnuih ruă hơpă mưn ƀuh hling hlang lĕ kơnong kơ lăi pơthâo kơ grup ƀudah iâu mơnuih mă bruă ia jrao, amra dưi gum djru mơtăm. Hơdôm tơlơi klă mơng Zalo anai glăk djru lu biă bruă pơgang, pơgăn Covid-19, hrŏ trun ƀiă bruă kơ sang ia jrao.

Tui hăng ơi ia jrao Lại Quang Miễn, Kơ-iăng Khua Anom ia jrao plơi prong Buôn Ma Thuột, mrô mơnuih F0 đĭ tañ amăng ƀiă hrơi ngă tơnap kơ bruă ia jrao, yua anun bruă ba F0 ruă rơnang pơjrao ƀơi sang jing djơ̆ biă. Khă hnun hai, mơnuih F0 ƀu thâo hơbin ôh tơlơi ruă amra kơtang đĭ kiăng pơjrao hmao tlôn, anun amra bơdjơ̆ nao tơlơi hơdip. Yua anun, bruă mă yua grup Zalo lăi pơthâo hơdôm tơlơi pơdah amăng drơi jăn, jơlan gah pơjrao, hơdră mă bruă jrao djơ̆ amra ba glăi tơlơi hơđong pran jua kơ mơnuih ruă. Lăi pơthâo dong kơ bôh tŭ yua lom pơjing grup Zalo djru ƀing F0 pơjrao ƀơi sang, ơi ia jrao Lại Quang Miễn brơi thâo:

 “Kiăng gal brơi kơ bruă pok pơhai pơjrao F0 ƀơi sang, anom ia jrao hmâo pơjing laih lu grup Zalo. Grup anai hmâo lu bôh tŭ yua, sa lĕ thâo hmao tlôn sa dua hră pơ-ar pơtô brơi mơng gưl dlông. Dua lĕ, lăi pơthâo nao rai bôh thâo lom dô̆ pơjrao. Tlâo lĕ, hơdră mă yua jrao djơ̆, pơhlôm hăng tŭ yua. Grup anai ăt dưi lăi pơthâo rơđah mơn, kơnong kơ dưi lăi pơthâo amăng bruă ia jrao, bruă wai lăng, rơngiao kơ anun ƀu dưi lăng thâo tơlơi pơkon ôh. Ră anai grup dưi pok pơhai ƀơi 25 bôh anom ia jrao, amăng anun hmâo 21 bôh anom ia jrao să, phường hăng 4 bôh sang ia jrao mơnuih ƀôn sang”.

Djơ̆ mơng lăi, bruă mă yua Zalo amăng pơjrao F0 ƀơi sang djru yôm phăn biă kơ gơnong bruă ia jrao, hrom hăng anun djru hơđong pran jua kơ mơnuih ruă. Čang rơmang, pơ̆ anăp anai, bruă mă yua internet hăng plăng facebook amra ngă tui ba glăi bôh tŭ yua amăng bruă pơgang, pơgăn klin Covid-19, mơng anun, khul mơnuih apăn bruă, mă bruă ia jrao hmâo dong mông hăng tơlơi gal đing nao ngă klă hloh bruă bơwih brơi tơlơi suaih pral kơ mơnuih kiăng hloh pơkon./.

Siu H’Prăk: Pơblang