VOV4.Jarai - Sa, dua bruă hơmâo abih bang mơnuih đing nao ră anai lĕ kiăng kơ tlâ̆o ƀudah lui tlâ̆o vaccine pơhrua dong brơi kơ ƀing čơđai hăng bruă tlâ̆o ară tal 4 brơi ƀing mơnuih pơprong. Phrâo anai, Kơ-iăng Khua dêh čar ơi Vũ Đức Đam rơkâo Ding jum ia jrao črâo brơi tong ten bruă tlâ̆o vaccine pơhrua dong; lăi pơthâo rơđah kơ anŏ pơglăi tơdơi kơ tlâ̆o ia jrao; anăm brơi kơƀah ia jrao, gơnam tam, măi mok gah ia jrao yua kơ mơnuih ruă kă. Tui hăng hră lăi pơthâo mơng Ding jum ia jrao: hrơi blan giăm anai, amăng rŏng lŏn tơnah, djuai klin Omicron jing djuai klin lar hyu kơtang hloh ngă čeh čar jing djuai BA.2; BA.2.3, BA.2.3.2; lơ̆m djuai BA.5 ƀuh ƀơi lu dêh čar, him lăng amra lar hyu amăng dêh čar ta mơng anun amra ngă lu tui mơnuih ƀă klin Covid-19 pơ anăp dong. Ƀơi Việt Nam, mrô mơnuih ƀă klin Covid-19 amăng hrơi blan laih rơgao glăk hrŏ trun kơtang samơ̆ mrô phrâo ƀiă ăt dŏ đĭ tui ƀơƀrư̆ mơn amăng hơdôm hrơi laih rơgao ƀơi sa, dua boh tơring čar, ƀôn prong. Yua anun, kiăng tŏ ngă tui hơdôm hơdră pơgang, tlâ̆o vaccine pơhrua dong, hăng tlâ̆o glăi brơi kơ ƀing mơnuih amuñ ƀă klin hăng tŏ tui pôr pơhing kiăng mơnuih ƀon sang kơđiăng amăng bruă pơgang klin kheng.

Sit biă ñu, bruă tlâ̆o vaccine pơgang klin Covid-19 dŏ kaih, biă mă ñu tlâ̆o ară tal 3, tlâ̆o brơi ƀing pơprong hăng tlâ̆o brơi ƀing čơđai mơng 5 truh pơ gŭ 12 thun. Đa ƀuh dŏ djă pioh lu vaccine Covid-19 ƀơi gơnong glông hăng hơdôm boh ƀon lan, tơlơi anai amra ngă kơ ia jrao abih hrơi mă yua hăng khŏm pơrai hĭ tơdah ƀu pơtrut kơtang bruă kah pha hăng pok pơhai tlâ̆o vaccine pơ anăp dong. Lăi pơthâo tong ten dong kơ bruă bơdjơ̆ nao anŏ pơglăi tơdơi kơ tlâ̆o vaccine pơgang klin Covid-19, Kơ-iăng Khua ding jum ia jrao Nguyễn Thị Liên Hương brơi thâo: Truh ră anai Anom bruă ia jrao rŏng lŏn tơnah hăng hơdôm boh dêh čar lêng kơ pơsit vaccine lĕ hơdră pơgang klă hloh kiăng pơgang klin Covid-19. Amăng rŏng lŏn tơnah, lu boh dêh čar hơmâo tlâ̆o vaccine pơgang klin Covid-19 ară tal 3, tal 4 brơi mơnuih ƀon sang. Rơbêh 80 boh dêh čar hăng kual lŏn hơmâo pok pơhai tlâ̆o vaccine brơi ƀing čơđai mơng 5 truh pơ gŭ 12 thun hăng sa, dua boh dêh čar tlâ̆o brơi ƀing čơđai pơ gŭ 5 thun.

“Ră anai aka ƀu hơmâo tơlơi kơsem min hơpă ôh kiăng pơsit vaccine Covid-19 amra hơmâo anŏ pơglăi sat sui kơ tơlơi suaih pral kơ rĭm čô mơnuih. Lơ̆m ia jrao pơgang klin Covid-19 amra hrŏ trun kơtang, yua anun, kiăng kơ klă dong amăng pơgang, ƀing ta kiăng tlâ̆o ară tal 3, tal 4 tui tơlơi črâo trun mơng Ding jum ia jrao. Tlâ̆o vaccine pơgang klin Covid-19 kiăng pơhlôm tui tơlơi rơkâo amăng pơgang klin kheng, yua anun mơnuih ƀon sang kiăng nao tlâ̆o vaccine djơ̆ hrơi mông pơkă, djop ia jrao”.

Kơ-iăng Khua dêh čar ơi Vũ Đức Đam rơkâo djop ding jum, gơnong bruă, ƀon lan kơsem min, lăng nao tơlơi găn rơgao mơng hơdôm boh dêh čar amăng bruă pok prong tlâ̆o brơi vaccine pơhrua (ară tal 3,4), trun tui thun čơđai dưi tlâ̆o vaccine. Kơ-iăng khua dêh čar ơi Vũ Đức Đam rơkâo:

“Ding jum ia jrao kiăng sem lăng glăi hră pơ-ar hlâo anun, đa hơmâo hră pơ-ar čih tong ten kiăng djop tơring čar dưi pơphun tlâ̆o brơi ƀing mơnuih tui tơlơi pơkă, kơtưn amăng bruă pơtô pơblang, sit biă ñu kơ djuai klin phrâo, anŏ pơglăi mơng vaccine, ngă hiưm pă kiăng pơhlôm rơnuk rơnua blung hlâo hăng sui thun pơ anăp. Kiăng čih tong ten amăng hră pơ-ar mơng Ding jum ia jrao lơ̆m hơmâo laih tơlơi pơgôp hiăp mơng Ding jum ia jrao črâo brơi tlâ̆o brơi ƀing hlơi, ƀing mơnuih amăng thun pơkă kiăng kơ ba gru amăng bruă tlâ̆o vaccine”.

Siu Đoan: Pơblang