Tui anom bruă wai pơgang tơlơi duam ruă tơring čar Dak Lak, dong mơng blan 6 truh lơ 29/9, đơ đam tơring čar hơmâo 33.120 čô mơnuih ruă mơta, lu hloh lĕ ƀing čơđai sang hră. Gơnong bruă ia jrao tơring čar Dak Lak glăk ječ ameč pok pơhai hơdôm hơdră kiăng pơgang hŭi kman lar hyu. Amăng mrô rơbêh 30 rơbâo čô mơnuih ruă hơmâo rơbêh 29 rơbâo ƀuh ƀơi hơdôm boh sang hră. 3 boh tơring glông hơmâo lu mơnuih ruă hloh hơmâo Buôn Đôn, Čư̆ Kuin hăng Čư̆ Mgar, lêng rơbêh 2.000 čô.

Ƀơi anăp kơ tơlơi ruă mơta glăk lar hyu kơtang amăng tơring čar, sit biă ñu ƀơi ƀing čơđai sang hră, gơnong bruă ia jrao tơring čar Dak Lak hơmâo gum hrŏm hăng hơdôm anom bruă bơdjơ̆ nao kơtưn amăng bruă pel ĕp, kiăo tui lăng, pơčlah hăng pôr pơhing hơdôm hơdră pơgang ƀơi hơdôm boh sang hră hăng amăng mơnuih mơnam. Hrŏm hăng anun, hơdôm boh sang ia jrao ăt gơgrong pơhlôm ia jrao kiăng hmao tlôn pơjrao brơi mơuih ruă hăng amra tŭ mă, pơjrao brơi mơnuih ruă.