VOV4.Jarai - Ră anai hơdôm boh tơring čar amăng dêh čar ta brơi čơđai nao hrăm pơ sang hră laih, wơ̆t hăng ƀing čơđai hnưr thun hơmâo tlâ̆o laih vaccine pơgang Covid-19 hăng ƀing čơđai amăng thun aka ƀu tlâ̆o vaccine. Amăng hrơi mông Covid-19 ăt dŏ kơtang đôč, anom apăn bruă hơmâo ngă lu hơdră pơgang tơdah hơmâo F0 amăng sang hră, laih anun kiăng prăp lui hơdră pơjrao hrơi čơđai sang hră ƀă klin Covid-19.

Mah čơđai ƀă klin Covid-19, čơđai ruă kơtang ƀiă đôč samơ̆ ăt hơmâo mơn pô čơđai lơ̆m hơmâo lu đơi mơnuih ƀă klin. Lơ̆m čơđai nao hrăm glăi, him lăng mrô mơnuih ƀă klin Covid-19 amra lu hloh. Yua hnun, ƀing kơhnâo lăi nao dlăm biă kơ bruă pơgang laih anun ƀu dưi pioh hơmâo lu čơđai ƀă klin lơ̆m ha wơ̆t, yua dah djuai jrao pơjrao Covid-19 ƀu brơi yua ƀơi ƀing čơđai ôh. Khua sang ia jrao pơjrao čơđai Kơnuk kơna Trần Minh Điển lăi, bruă ngă hiư̆m pă đah mơng pơhlôm rơnuk rơnua kơ ƀing čơđai nao pơ sang hră hơmâo lu mơta tơlơi mơn, amăng anun hơdôm boh sang hră, gong gai hăng sang ia jrao kiăng prăp lui hơdră pơgang rơnuk rơnua kơ sang hră. Rơngiao kơ anun, amĭ ama ƀing čơđai kiăng pơtô brơi ană bă, hrŏm hăng sang hră pơtô brơi ƀing čơđai thâo pơgang klin, biă ñu lĕ ngă tui “5K”. Lơ̆m ƀuh mơnuih đing đăo ƀă klin ƀudah ƀă klin SARS-CoV-2 laih amăng anih hrăm, sang hră kiăng hơđong, anăm bral ôh, ngă hrŏm hăng sang ia jrao lăi pơthâo glăi kơ sang anŏ ƀing čơđai đah mơng thâo anih nao rai, đuăi hyu mơng pô ƀă klin:

“Ƀing ta khŏm hyu sem klă ƀơi sang hră anun đôč laih anun kơnong kiăng sem lăng hơdôm boh kơƀang mơ̆ pô čơđai anun dŏ hrăm, sa dua anih mơ̆ pô anun hyu ngui, ƀing ta ƀu krư̆ amăng sang hră, krư̆ amăng hlao anih hrăm anun ôh. Sang hră rơnuk rơnua lĕ ƀu djơ̆ ƀu hơmâo Covid-19 ôh, sang hră rơnuk rơnua lĕ ƀing ta prăp rơmet lui hơdră pơgang, hyu ĕp kru tañ, ƀing ta thâo pơgăn hĭ hơdôm anih bơdjơ̆ nao pô ruă, tui anun pơhlôm brơi sang hră rơnuk rơnua”.

Tơdah čơđai ƀă hĭ klin Covid-19 lĕ amĭ ama ƀing čơđai kiăng hơđong pran mơn, anăm bral, bơngơ̆t đơi ôh. Lơ̆m ană bă dŏ pơ sang, amĭ ama khŏm krăp lăng tơlơi suaih pral ană bă, sem lăng tơlơi ruă hiư̆m pă đah mơng thâo djru, lăi pơthâo kơ sang ia jrao kiăng ană bă hơmâo ơi ia jrao pơjrao brơi klă hloh. Khua sang ia jrao pơjrao čơđai Kơnuk kơna Trần Minh Điển pơtă pơtăn:

“Anai lĕ tơlơi ruă klin kheng, yua hnun bruă brơi dŏ hơjăn jing yôm biă. Tơdah ƀing ta ƀu pơčlah čơđai lĕ hŭi ƀă kơ pô pơkŏn dong, amĭ ama, ơi yă, biă ñu lĕ ƀing đah kơmơi glăk ƀă pi. Yua hnun, lơ̆m hơmâo tơlơi truh, rim sang anŏ kiăng hơđong pran jua, hla tui tơlơi pơtô ba mơng sang ia jrao, pơjrao pơ sang hiư̆m pă laih anun ruă hiư̆m pă jing nam ruă kơtang hloh tơ̆ mơng hơmâo khăm pơ sang ia jrao ƀudah đih pơ sang ia jrao, tui anun kiăng pơhlôm rơnuk rơnua kơ ƀing čơđai”.

Ƀơi mông jơnum phrâo anai kơ bruă pơjrao brơi ƀing čơđai ƀă klin Covid-19, Kơ-iăng khua dêh čar ơi Vũ Đức Đam jao kơ Ding jum ia jrao git gai, ngă hrŏm hăng Ding jum pơtô hăng pơjuăt laih anun hơdôm anom bruă bơdjơ̆ nao prăp lui hơdră pơgang lơ̆m brơi čơđai nao hrăm glăi, hơmâo čơđai ƀă klin Covid-19. Laih dong, ječ ameč ngă pơgiong hră pơ-ar, pơtrun hră pơtô ba hơdră pơjrao Covid-19 hăng ƀing yŭ kơ 18 thun, biă ñu ƀing čơđai yŭ kơ 12 thun.

VOV1:Čih - Siu H’Mai: Pơblang